Vypuścili palitykaŭ hetak ža niečakana, jak zatrymali. Pavodle milicyi, Siŭčyk spraŭlaŭ na vulicy naturalnuju patrebu i pry hetym łajaŭsia matam. Viačorka prosta brydkasłoviŭ. Ale sudy nad palitykami projduć za dva dni da 25 Sakavika. Viačorka: Mianie vypuścili dla Uty Capf.
Palityki Viačasłaŭ Siŭčyk i Vincuk Viačorka byli zatrymanyja ŭviečary 13 sakavika.
Upravu BNF blakavali ludzi ŭ cyvilnym. Vincuku Viačorku ŭdałosia źjechać dachaty, ale jaho zatrymali la dźviarej ułasnaje kvatery, prykładna a 22‑j. Jon paśpieŭ tolki pieradać synu Franaku małodšuju dačku Ružanu, jakaja była ź im paśla škoły.
Žonka sp.Viačorki Aryna pieražyła tryvožnyja hadziny. Varta nahadać, što tolki tydzień tamu staršynia Arhkamitetu śviatkavańnia Dnia Voli pachavaŭ baćku Ryhora, praz što vymušany byŭ pierarvać vizyt u ZŠA, dzie jon pierabyvaŭ u składzie apazycyjnaj delehacyi.
Siŭčyk byŭ zatrymany dźviuma hadzinami raniej, paśla 20‑j, na płoščy Jakuba Kołasa.
U centry horadu skroź možna było bačyć niezvyčajnuju kolkaść patruloŭ specnazaŭcaŭ u plamistaj formie. Takoje ŭražańnie, što ich pieraviali na ŭzmocnieny varyjant niasieńnia słužby. Heta nahadvała sakavik minułaha hodu, kali byli pryniatyja nadzvyčajnyja zachady, kab paralizavać raspaŭsiud ulotak.
Usiu sieradu čakali sudu. Kala Akreścina dziažuryli žurnalisty i pravaabaroncy. Ad ranku da pošukaŭ palitykaŭ dałučylisia supracoŭniki misii ABSE. Usie čakali, što, jak i letaś u sakaviku, palitykaŭ čakaje biespardonny prysud. Adnak uviečary u Siŭčyka i Viačorku vypuścili hetak ža niečakana, jak i zatrymali.
Maŭlaŭ, pratakoły zatrymańnia byli składzienyja z pracesualnymi pamyłkami i musiać być vypraŭlenyja.
Viačasłava Siŭčyka abvinavačvajuć, što jon na vulicy spraŭlaŭ naturalnuju patrebu i pry hetym mocna łajaŭsia matam. Viačorku vinavaciać tolki ŭ brydkasłoŭi.
Sudy nad palitykami pieraniesienyja na 23 sakavika. A 10:00 u Savieckim sudzie adbudziecca praces nad Vincukom Viačorkam, a 11:00 – nad Viačasłavam Siŭčykam.
V. Viačorka skazaŭ, jak źviazaŭ: «Mianie chapali ŭ minułym hodzie, za 11 dzion da prezydenckich vybaraŭ 19 sakavika. I ciapier taksama aryštavali roŭna za 11 dzion da Dnia Voli. Dumaju, što mižnarodnaja reakcyja syhrała svaju rolu. Ciapier ja daviedaŭsia, što ŭ Miensk pryjechała Uta Capf — pravodzić seminar z uładami. Značyć, mianie časova vypuścili dla Uty Capf».
Alaksandar Milinkievič zajaviŭ, što nijakija zapałochvańni nie pavinny mianiać planaŭ Demakratyčnych siłaŭ na 25 Sakavika.
* * *
Vyzvaleńnie V.Viačorki aznačaje, što adbudziecca pryznačanaja na piatnicu, 14.00, on‑łajn‑kanferencyja ź im na sajcie nn.by.
