Cudździa Maskoŭskaha rajonnaha sudu Jury Šastakoŭ admoviŭ u zadavalnieńni pazovu ab adnaŭleńni na pracy zvolnienaha aktora Nacyjanalnaha dramatyčnaha ruskaha teatru imia Horkaha Paŭła Charłančuka. Laŭreat šmatlikich mižnarodnych teatralnych konkursaŭ i premijaŭ, artyst vyšejšaj katehoryi Pavał Charłančuk padčas sakavickich pratestaŭ 2006 hodu byŭ na Kastryčnickaj płoščy. Paśla razhonu namiotavaha lahieru jon adsiedzieŭ 10 sutak aryštu. 26 śniežnia 2006 hodu Paŭła Charłančuka zvolnili z Ruskaha teatru z farmuloŭkaj «u suviazi ź nieadpaviednaściu pasadzie».
29‑hadovy Pavał Charłančuk vielmi chutka zrabiŭ teatralnuju karjeru: atrymaŭ dva dyplomy Biełaruskaj akademii mastactvaŭ ‑‑ aktorski i režyserski, pastaviŭ niekalki dziciačych spektaklaŭ, jamu była prysvojena vyšejšaja aktorskaja katehoryja, jon źniaŭsia ŭ papularnaj telereklamie... I raptoŭna akazaŭsia «prafesijna nieprydatnym», pavodle farmuloŭki ab zvalnieńni. Aktor źviarnuŭsia ŭ sud, jaki pryznaŭ zvalnieńnie aktora zakonnym. Pavał Charłančuk padzialiŭsia svaimi ŭražańniami ad sudovaha pasiedžańnia:
«Takija śviedčańni byli, što ŭsio było vidavočna: heta ŭsio nadumana. I taki paradaksalny vynik! Navat na pieršym pasiedžańni sudździa papiaredziŭ, kab nie śmiajalisia. Śviedki cisnuli na toje, što ŭsio dobra prafesijna. Ale dva spektakli zamianić ‑‑ heta nielha, heta bje pa imidžu teatru! Juryst pytaŭsia: «Ci ŭpłyvaje heta na stan prafesijny aktorski, što jon nie ŭdzielničaje ŭ pastanoŭkach?» Jany adkazvali: «Kaniečnie! Kali mašyna nia jeździć ‑‑ jana łamajecca. Kali aktor nia hraje ‑‑ jon dehraduje».
Advakat Charłančuka Pavał Sapiełka hatovy dalej adstojvać intaresy svajho padabaronnaha:
«Na moj pohlad, rašeńnie sudu źjaŭlajecca niezakonnym i nieabhruntavanym, Charłančuk z majoj dapamohaj jaho budzie abskardžvać da apošniaj instancyi ‑‑ da staršyni Viarchoŭnaha Sudu ŭ paradku nahladu. Toje, što paradak zvalnieńnia byŭ hruba parušany ‑‑ dla mianie heta vidavočna».
Paśla adbyćcia pakarańnia letaś Pavał praciahvaŭ ŭdzielničać u spektaklach Ruskaha teatru, staviŭ novyja dziciačyja pastanoŭki:
«Ja pracavaŭ u hetyja paŭhodu. I navat novuju rolu mnie dali. I znoŭ u vieraśni niešta pačałosia. Niejki zahad pajšoŭ źvierchu praz paŭhodu».
U kancy vieraśnia ŭ Paŭła pačalisia prablemy: jaho źniali z pastanovak, spravu razhladali spačatku na pasiedžańni mastackaj rady. Kaža advakat Pavał Sapiełka:
«Kali staršynia prafkamu kaža ‑‑ i heta zafiksavana ŭ pratakole mastackaj rady ‑‑ «My ciabie pavodle zakonu zvolnić nia možam, ale heta palityka, heta idealohija». I heta prafkam, jaki pavinny stajać na abaronie intaresaŭ najomnych pracaŭnikoŭ!»
Persanalnuju spravu aktora Charłančuka razhladali na atestacyjnaj kamisii. Pavodle pałažeńnia, tudy ŭvachodziać pradstaŭniki najmalnika, pradstaŭniki administracyi teatra i hramadzkich struktur. Ale ŭ kamisiju čamuści byŭ uklučany pieršy namieśnik ministra kultury Uładzimier Ryłatka, paviedamiŭ advakat Pavał Sapiełka:
«Spadar Ryłatka pieršym vystupiŭ, začytaŭ hatovuju farmuloŭku vysnovaŭ atestacyjnaj kamisii, jakaja navat prykładzienaja da pratakołu i materyjałaŭ spravy ‑‑ navat nie pasaromielisia. I ŭsio! A dalej što abmiarkoŭvać? A potym toj samy staršynia prafkamu kaža: «Ja nia moh pajści suprać mierkavańnia kiraŭnictva». Heta zafiksavana na aŭdyjozapisu sudovaha pasiedžańnia».
Niekatoryja aktory teatru pryjšli ŭ sud abaraniać Charłančuka: narodnyja artysty Alaksandar Tkačonak i Volha Klebanovič, zasłužanaja artystka Alimpijada Šach‑Paron skazali, što paśla zvalnieńnia Paŭła dahetul nie iduć takija papularnyja spektakli, jak «Dziadzičkaŭ son», «Adziny spadkajemca» i «Dachodnaje miesca», bo ŭ teatry nia mohuć znajści paŭnavartasnuju zamienu Paŭłu Charłančuku.
