Znojdzienaja niadaŭna ŭ archivie Osła mapa paŭnočnych terytoryj Kanady śviedčyć pra toje, što try vyspy, jakija lažać u Arktycym i majuć płošču 60 kv. kilametraŭ, mahli b naležać Narvehii. Ułady ŭ Osła, adnak, zajavili, što nia buduć patrabavać ich viartańnia.
Hetyja vyspy adkryŭ u 1898‑1902 hh. narveski palarnik Ota Sverdrup. Jon skłaŭ mapu miascovaści dy abvieściŭ terytoryi ŭłasnaściu Narvehii. Vyspy nazvaŭ u honar svaich dabradziejaŭ — Aksela Chajberha, Elefa i Amunda Ryhnesaŭ. Jany lažać u ŭ archipelahu vyspaŭ karalevy Elizabet.
Adnak Narvehija, paśla atrymańnia niezaležnaści ad Švecyi ŭ 1905 h., nie pieraniała ŭłady nad vyspami. U skład svajoj terytoryi ich uklučyła Kanada, nabyŭšy ŭ 1930 h. u Sverdrupa za 67 tys. dalaraŭ zroblenuju im mapu, a taksama dziońnik daśledvańniaŭ, što ŭtrymlivaŭ apisańnie vyspaŭ. Dakumenty pavinny byli być dokazam atrymańnia pravoŭ na hetyja terytoryi.
Adnak kanadzkija ŭłady pazbavilisia hetych dokazaŭ – dziońnik daśledvańniaŭ pieradali siamji Sverdrupa, a mapa zhubiłasia ŭ kanadzkich dziaržaŭnych archivach.
Ciapier mapu znajšli ŭ Osła. Na dumku kanadzkaha boku, uźnikła sytuacyja, u jakoj zdolny narveski advakat moh by zapatrabavać viarnuć hetyja vyspy Narvehii.
Pradstaŭnik narveskaha ministerstva zamiežnych spravaŭ zajaviŭ, adnak, što Osła nia budzie źviartacca da Kanady adnosna vyspaŭ. «U nas chapaje miescaŭ, dzie narvežcy hetak ža sama mohuć mierznuć» – pažartavaŭ jon.
Adnak Narvehija admaŭlajecca nia tolki ad praktyčna biaźludnych vyspaŭ, ale taksama i ad pryrodnych bahaćciaŭ, što mieściacca ŭ mory. Kanadcy adkryli tam padvodnyja płasty hazu, što papiarednie aceńvajucca ŭ 1,3 młrd. kubametraŭ.
