U sieradu adbyłasia pres‑kanferencyja zajaŭnikaŭ akcyi 25 Sakavika z nahody aficyjnaj admovy harvykankamu pradstavić dla akcyi Kastryčnickuju płošču i ŭčorašniaha pasiedžańnia arhkamitetu pa śviatkavańni Dnia Voli.
Alaksandar Milinkievič, Vincuk Viačorka, Ihar Šynkaryk i Aleś Stralcoŭ paćvierdzili, što zbor abjaŭlajecca na tym ža miescy i na toj ža čas – Kastryčnickaja płošča a 12‑j.
Milinkievič adznačyŭ: «My zaklikajem usich pryjści na raniej anansavanaje miesca zboru, tam my i vyznačymsia, što rabić dalej. Heta budzie zaležać ad kolkaści ludziej, jakija pryjduć na Płošču. Mahu zapeŭnić, što nichto nie źbirajecca iści na prapanavany ŭładami Banhałor».
Taksama Milinkievič padkreślivaŭ, što heta vyklučna mirnaja śviatočnaja akcyja i va ŭładaŭ chopić rozumu nie psavać ludziam hety dzień. «Z našaha boku nijakich šturmaŭ i praryvaŭ ačapleńnia nia budzie». Na 25 Sakavika aproč mitynhu zaplanavany kancert. Dzie jon moža adbycca, zajaŭniki pakul nia mohuć dakładna skazać. Pavodle adnaho z scenaroŭ, ludzi z Kastryčnickaj płoščy nakirujucca šeściem u bok Akademii navuk.
Jašče Alaksandar Milinkievič paviedamiŭ pra toje, što na Dzień Voli ŭ Miensk dakładna pryjedzie delehacyja Eŭraparlamentu, Bundestahu, polskaha Sojmu, z Rasiei maje pryjechać lider SPS Mikita Białych, budzie delehacyja z Azerbajdžanu. Pakul niama jasnaści, ci pryjeduć słavackija i łatvijskija parlamentary, bo jany sutyknulisia z prablemaj atrymańnia biełaruskich viz.
Vincuk Viačorka raskazaŭ, što, pa jahonaj niepaćvierdžanaj infarmacyi na 25 Sakavika, ułady ŭ Domie aficeraŭ zaplanavali śviatočny kancert «Za niezaležnuju Biełaruś», kudy buduć zahaniacca mienskija studenty i školniki. Viačorka pažartavaŭ, što apazycyja ŭrešcie prymusiła ŭłady pryznać 25 Sakavika śviatam.
