Piaćdziesiat hod tamu šeść eŭrapiejskich krainaŭ abjadnalisia dziela stvareńnia ŭnikalnaj formy rehijanalnaj arhanizacyi. Jaje metaj było nie dapuścić viartańnia vajny na eŭrapiejski kantynent – vajny, što pakidaje paśla siabie tolki śmierć i spustašeńnie.
Hetaja inicyjatyva, biez sumnievu, akazałasia nadzvyčaj paśpiachovaj. Na praciahu nastupnych piacidziesiaci hod krainy, što pryniali ŭ joj udzieł, dasiahnuli biesprecendentnaha ŭzroŭniu miru, dabrabytu i stabilnaści. Nie spyniajučysia na hetych dasiahnieńniach, jany pašyryli intehracyju na šerah inšych sferaŭ. Za hety peryjad arhanizacyja vyjšła za miežy handlovaha bloku, što kaardynavaŭ handlovuju palityku krainaŭ‑udzielnikaŭ i ŭstaloŭvaŭ ahulnyja źniešnija taryfy. Abjadnoŭvajučy 27 dziaržavaŭ, ciapierašni Eŭraźviaz jość palityčnaj arhanizacyjaj, jakaja dziejničaje ŭva ŭsich sferach, ź jakimi źviazanyja najbolš surjoznyja vykliki XXI stahodździa.
Dla krainaŭ usiaho śvietu heta aznačaje, što siońnia my źjaŭlajemsia dla ich čymści bolšym za handlovaha partnera. EZ – heta stratehičny partner u takich raznastajnych sferach, jak supraćdziejańnie mižnarodnamu teraryzmu, baraćba ź źmienami klimatu i VIČ/ŚNIDam, urehulavańnie najbolš vostrych kanfliktaŭ na planecie.
U stasunkach ź mižnarodnymi partnerami my imkniemsia raspaŭsiudžvać kaštoŭnaści, jakija, na našuju dumku, dapamahli nam dasiahnuć eŭrapiejskaha pośpiechu. Naš dabrabyt staŭ vynikam specyfičnaj formy rehijanalnaha supracoŭnictva, što raźvivajecca razam z pahłyblenaj addanaściu ideałam demakratyi, pravoŭ čałavieka i viaršenstva zakona. Mienavita hetym dośviedam, jaki jość sakretam našaha ŭłasnaha pośpiechu, my i imkniemsia padzialicca ź inšymi diazržavami.
Na mižnarodnaj arenie Eŭraźviaz dziejničaje ŭ cełym šerahu raznastajnych sferaŭ. U toj ža čas ahulnaja źniešniaja palityka EZ – adnosna novy element našaj dziejnaści: jana ŭsio jašče znachodzicca ŭ stadyi raźvićcia. My razumiejem, što časam našym partneram składana dakładna zrazumieć, jak pracavać z Eŭraźviazam. Adnak, niahledziačy na toje, što EZ, mahčyma, nia samy prosty mižnarodny partner, jon, biez sumnievu, zastajecca adnoj z samych upłyvovych siłaŭ u sučasnym śviecie. I my majem ambicyi pa ažyćciaŭleńni jašče bolšaha ŭniosku ŭ raźvićcio mižnarodnaj supolnaści i našych partneraŭ pa ŭsim śviecie.
Časta zabyvajuć, što Eŭraźviaz – heta najbujniejšy suśvietny donar mižnarodnaj dapamohi. Na siońniašni dzień my akazvajem 60% usioj aficyjnaj suśvietnaj dapamohi, što dajecca na mety raźvićcia; a abjom uniosku Eŭrapiejskaj Kamisii składaje bolš za 7 młrd. eŭra. My imkniemsia ažyćciaŭlać efektyŭnuju baraćbu ź biednaściu i vydzialać humanitarnuju dapamohu ŭsim krainam i rehijonam, jakija jaje patrabujuć.
Akramia taho, my nakiroŭvajem svaje resursy dla zabieśpiačeńnia dabrabytu i stabilnaści inšych dziaržavaŭ. EZ raspracavaŭ unikalny mechanizm dapamohi krainam pierachodnaha peryjadu. Našyja viedy ŭ hetaj sfery sfarmavalisia dziakujučy ŭłasnamu dośviedu – dośviedu dapamohi krainam Paŭdniovaj Eŭropy, a ŭ dalejšym krainam Centralnaj i Ŭschodniaj Eŭropy ŭ ažyćciaŭleńni pierachodu da rynkavaj ekanomiki i adkrytaha hramadztva. Siońnia my sprabujem vykarystać hetyja viedy i ŭmieńni ŭ inšych rehijonach, kab dapamahčy bolšaj kolkaści dziaržavaŭ dasiahnuć analahičnaha ŭzroŭniu dabrabytu i stabilnaści.
Eŭraźviaz maje hustuju sietku farmalnych pahadnieńniaŭ, zaklučanych z cełym šeraham krainaŭ śvietu. Usiaho EZ maje na planecie 130 pradstaŭnictvaŭ, u tym liku i na Ŭkrainie, jakija zajmajucca pytańniami ŭ sferach handlu, enerhietyki, navakolnaha asiarodździa, pravoŭ čałavieka i baraćby ź mižnarodnaj złačynnaściu. My stvarajem usio bolšuju kolkaść instrumentaŭ źniešniaj palityki, što zakranajuć nia tolki handal albo palityku ŭ sfery źniešniaj dapamohi, ale i pytańni chutkaha reahavańnia na humanitarnyja kryzisy ci funkcyjanavańnia eŭrapiejskich palicejskich i vajenych misijaŭ u roznych rehijonach śvietu. Uzmacniajučy svaju rolu na planecie, my imkniemsia vykarystać hetyja instrumenty jak maha bolš paśladoŭna i efektyŭna, niezaležna ad taho, idzie havorka pra Livan, Zachodnija Bałkany albo Demakratyčnuju Respubliku Konha.
Užo siońnia naš uniosak u vyrašeńnie mižnarodnych prablemaŭ istotny: Eŭraźviaz hraje važnuju rolu ŭ pošuku šlachoŭ urehulavańnia kanfliktu na Bližnim Uschodzie albo sytuacyi vakoł iranskaj jadziernaj prahramy. EZ jość suśvietnym lideram u pytańniach baraćby ź źmienami klimatu ci ŭ sfery enerhietyčnaj biaśpieki, źjaŭlajučysia prykładam dla inšych dziaržavaŭ. Niama sumnievaŭ, što ŭsie hetyja pytańni buduć zastavacca ŭ centry ŭvahi mižnarodnaj hramadzkaści na praciahu bližejšych miesiacaŭ i hod.
Na naš pohlad, šlach da ich vyrašeńnia lažyć vyklučna praz partnerstva. Mienavita z hetaj pryčyny my nadajem takoje značeńnie adnosinam z našymi partnerami pa ŭsim śviecie. I mienavita tamu my adstojvajem ideju šmatbakovaha padychodu ŭ vyrašeńni prablemaŭ albo pryniaćci rašeńniaŭ. My całkam padtrymlivajem takija instytuty suśvietnaha kiravańnia, jak Arhanizacyja Abjadnanych Nacyjaŭ albo Suśvietnaja handlovaja arhanizacyja. My taksama imkniemsia ažyćciaŭlać dalejšaje supracoŭnictva z našymi partnerami dla ŭmacavańnia hetych arhanizacyjaŭ i šmatbakovaha paradku, što padtrymlivajecca imi i što zasnavany na dakładnych praviłach.
EZ nia jość zavieršanym prajektam. Našyja instytuty i ich paŭnamoctvy ŭsio jašče znachodziacca ŭ stadyi raźvićcia, pieradusim u sfery źniešniaj palityki. Adnak, užo na siońniašni dzień zrazumieła, što dla mnostva krainaŭ śvietu EZ jość niečym bolšym za handlovaha partnera, jakim jon byŭ niejki čas tamu. Jany bačać stratehičnuju kaštoŭnaść uzmacnieńnia supracoŭnictva z nami; my, u svaju čarhu, bačym stratehičnuju kaštoŭnaść uzmacnieńnia supracoŭnictva ź imi.
Padobnym čynam, hramadzianie EZ čakajuć ad svaich lideraŭ pieraŭtvareńnia Eŭropy ŭ mahutnuju mižnarodnuju siłu. Jany chočuć, kab my palepšyli nia tolki žyćcio eŭrapiejcaŭ albo hramadzianaŭ susiednich dziaržavaŭ, a i žyćcio ludziej uva ŭsim śviecie. Mienavita takoj jość našaja meta na bližejšyja 50 hod: my imkniemsia vykarystać eŭrapiejskija dasiahnieńni minułych piaci dziesiacihodździaŭ – naš dabrabyt, naš mir i naš dośvied – nia tolki dla padtrymańnia našaha ŭłasnaha standartu žyćcia, ale i dla karyści inšych dziaržavaŭ i rehijonaŭ śvietu.
