U čaćvier deputat Dziarždumy Rasii i adzin ź lidaraŭ patryjatyčnaha kryła «Rodiny» Andrej Savieljeŭ abviaściŭ ab stvareńni novaj palityčnaj partyi. Mahčymym kiraŭnikom partyi niečakana nazvany prezident Biełarusi Alaksandr Łukašenka.
Heta adbyłosia na pasiedžańni prezidyjuma «Kanhresu Ruskich Abščyn».
Miarkujecca, što novaja partyja voźmie ŭdzieł u parłamienckich vybarach ŭ Dziarždumu, jakija adbuducca ŭ śniežni sioleta. Treba adznačyć, što ŭ rasijskim hramadstvie ŭsio bolš i bolš abmiarkoŭvajecca tema ŭdziełu Alaksandra Ryhoraviča ŭ palityčnym žyćci krainy‑susiedki.
Jeŭraradyjo źviazałasia z aŭtaram siensacyjnaj palityčnaj zajavy deputatam Dziarždumy Andrejem Savieljevym. My pacikavilisia, nakolki vierahodny takija čutki. Miž inšym, deputat Savieljeŭ źjaŭlajecca namieśnikam kiraŭnika kamiteta Dziarždumy pa kanstytucyjnym zakanadaŭstvie.
Andrej Savieljeŭ: «My nie śpiašajemsia ab hetym abjaŭlać aficyjna. Tamu što dla taho, kab heta adbyłosia, patrebny pieramovy. Tut važki nie tolki naš pohlad, ale i jaho asabistaja zhoda. Tamu takija idei vykazvajucca.
Partyja jašče nie stvoranaja, płanujecca ŭstanoŭčy źjezd, jaki projdzie ŭ siaredzinie krasavika. Ale biassprečna adno: my budzam padtrymlivać Alaksandra Ryhoraviča va ŭsich jaho pačynańniach.»
Ale ž adrazu ŭźnikaje pytańnie, ci zdolny budzie Alaksandr Ryhoravič sa svaim biełaruskim pašpartam udzielničać jakim‑niebudź čynam u palityčnym žyćci Rasii. Praciahvaje Andrej Savieljeŭ:
«Hramadzianstva Rasijskaj Fiederacyi i Respubliki Biełaruś roŭnyja. U nas roŭnaść u pravach adnoj i druhoj krainy, zhodna z tym, što ŭ nas stvorana sajuznaja dziaržava. Tamu nijakich pieraškodaŭ, na naš pohlad, nie isnuje.»
Kaniešnie, my nie mahli nie zapytacca ŭ deputata, čym abumoŭleny vybar kandydatury Łukašenki:
«Što tyčycca jaho zaprašeńnia na pasadu kiraŭnika partyi ci vyłučeńnia ŭ jakaści kandydata ŭ prezidenty Rasijskaj Fiederacyi, to heta sprava budučyni. Ja dumaju, što prablema vyrašycca bližej da vybaraŭ.
Čamu mienavita Łukašenka? Tamu što mienavita jon zaraz źjaŭlajecca lidaram usiaho słavianskaha śvietu. Adzinym suviarennym palitykam. Preztdent Rasijskaj Fiederacyi takim nie źjaŭlajecca. Tamu my budziem padtrymlivać prezidenta Biełarusi, a nie Rasii.»
Viadoma, što były staršynia partyi «Rodina» Dźmitryj Rahozin vielmi stanoŭča stavicca da kandydatury Łukašenki. Na žal, sam deputat zaraz znachodzicca ŭ vandroŭcy pa rehijonach Rasii.
My paprasili raskazać nam pra pasiedžańnie prezidyjuma «Kanhresu Ruskich Abščyn» Lidziju Michajłavu, presavuju sakratarku Dźmitryja Rahozina:
«U nas, nasamreč, absalutnaja bolšaść prychilnikaŭ Alaksandra Ryhoraviča. Našy siabry sapraŭdy chacieli b, kab jon raspaŭsiudziŭ svoj upłyŭ nie tolki na Biełaruś, ale i na astatnija krainy, pryčym jak maha šyrej.
Ale ž heta nie źjaŭlajecca ahučanaj palityčnaj linijaj Kanhresu Ruskich Abščyn. Tym nie mienš heta ŭsio čutki, u jakich jość svaja dola iściny.»
Prakamientavać, što mohuć aznačać takija prapanovy z punktu hledžańnia palityčnych technałohijaŭ Jeŭrapiejskaje radyjo paprasiła rasijskaha palitołaha, dyrektara viadomaha palityčnaha centra kansultavańnia «Nikkoła M» Ihara Mintusava:
«Tut dźvie viersii, da taho ž adna vyklučaje druhuju. Pieršaja: što z dapamohaj imia Łukašenki palityk žadaje pavialičyć ambicyi pry stvareńni novaha abjadnańnia, što źjaŭlajecca niadrennym palityčnym krokam, kab pryciahnuć da sabie ŭvahu.
A Łukašenka mienavita tamu, što ź im jość peŭnyja kansiervatyŭna‑patryjatyčnyja asacyjacyi. Ja dumaju, što ŭ peŭnaj častki rasijskaha elektarata isnuje simpatyja da spadara Łukašenki. Heta niemaładyja ludzi, aryjentavanyja na savieckija kaštoŭnaści.
A hetaha bolš čym dastatkova dziela taho, kab stvaryć niadrennuju mikra‑partyju na nacyjanalistyčnym fłanzie.»
My taksama spytali ŭ Ihara Mintusava, ci vypadkova ŭ rasijskim hramadstvie za apošni čas pačali źjaŭlajucca publikacyi nakont mahčymaha ŭdziełu Alaksandra Ryhoraviča ŭ palityčnym žyćci Rasii. Voś što jon nam raspavioŭ:
«Adnosiny da Łukašenki paśla studzieńskich padziejaŭ z hazam pamiž dźviumia krainami vielmi strymanyja. Tamu ja nie dumaju, što ŭsie hetyja pasyły iduć ad tych dziesiaci ludziej, jakija, umoŭna kažučy, prymajuć rašeńni ŭ Rasii pa ŭsich stratehična važkich pytańniach.»
Nasamreč, nichto nie spytaŭ u samoha spadara Łukašenki, ci žadaje jon sam hrać na rasijskim palityčnym poli. Da taho ž biełaruski prezident čamuści maŭčyć, kali ŭsio čaściej u Rasii vykarystoŭvajuć jaho imia z karyślivymi palityčnymi metami.
Ale ž sprava ŭ tym, što maŭčańnie taksama moža šmat čaho havoryć.
Fota lukashenko2008.ru/
