Bundeskancler Niamieččyny i Prezydent Rady Eŭraźviazu Anhieła Merkiel patelefanavała siońnia ŭ Miensk Alaksandru Milinkieviču i pacikaviłasia tym, jak prachodzić Dzień Voli ŭ Biełarusi.
Siońnia ž u časie pramovy ŭ Berlinie, pryśviečanaj 50‑j hadavinie Eŭrapiejskaha Źviazu, Anhieła Merkiel zhadała pra Biełaruś i padkreśliła, što ŭ hety dzień Eŭropa vykazvaje salidarnaść ź biełarusami.
Kiroŭnaja partyja Bundestahu Chryścijanska‑demakratyčny sajuz aficyjna nakiravała na Dzień Voli ŭ Miensk svajho siabra deputata Arnalda Faatca.
U interviju «Svabodzie» spadar Faatc zajaviŭ: «Toje, pra što havaryła spadarynia Merkiel, było ažyćcioŭlena siońnia na praktycy ŭ Miensku. Razam z demanstrantami na akcyi byli praktyčna ŭsie ambasadary Eŭraźviazu, a taksama vosiem eŭraparlamentaroŭ z Polščy, Słavaččyny, Niamieččyny. Usie jany prademanstravali, što Eŭropa kłapocicca pra hramadzianskuju supolnaść u Biełarusi j što hetaja hramadzianskaja supolnaść u krainie macnieje».
Na pytańnie, nakolki ŭličyli biełaruskija ŭłady toj zaklik, ź jakim napiaredadni źviarnułasia da ich prezydenctva Eŭraźviazu, — nie pieraškadžać biełaruskim hramadzianam u realizacyi prava ładzić mirnyja schody — spadar Faatc adkazaŭ:
«U paraŭnańni z tym, što adbyvałasia letaś, siońniašniaja akcyja prajšła bolš mirna. Adnak daloka nia ŭsio ŭličyli z taho, da čaho my zaklikali biełaruskaje kiraŭnictva napiaredadni. Našyja pažadańni ŭ hetym sensie nie apraŭdalisia. Jość rečy prosta nieprymalnyja z hledzišča demakratyčnych standartaŭ.
Naprykład, pradstaŭniki ŭładaŭ z dapamohaj svaich mehafonaŭ pastajanna abryvali pramovy demanstrantaŭ, pieraškadžali im havaryć. Milicyjanty časam hvałtoŭna vyciskali ludziej z płoščy. Kali biełaruskaje kiraŭnictva choča ruchacca ŭ bok Eŭropy, jano musić pierahledzieć palicejskija tradycyi, jakija isnujuć u Biełarusi. Usie dvanaccać patrabavańniaŭ, jakija vystaŭlenyja Eŭraźviazam da aficyjnaha Miensku, zastajucca ŭ sile».
