Sajty, karespandenty jakich viali repartažy sa śviatkavańnia Dnia Voli ŭ režymie onłajn, akazalisia niedastupnymi dla biełaruskich hramadzianaŭ.
Staronka «Chartyi‑97» nie adkryvałasia prykładna ad 10‑j da 16‑j hadziny. Siabra «Chartyi‑97» Natalla Radzina skazała:
«Pakul išła akcyja, pakul ludzi źbiralisia na akcyju i pakul jana praciahvałasia, sajt nie pracavaŭ. Mienavita ŭ Biełarusi jaho nie było vidać. Jak tolki padziei ŭ centry Miensku skončylisia, akcyi zaviaršylisia, sajty pačali pracavać. Sajty blakavaŭ «Biełtelekam».
Takoje ž mierkavańnie ŭ presavaj sakratarki AHP Kaciaryny Tkačenki: «Učora ja była ŭ šoku. Nichto nie čakaŭ, što biełaruskija internet‑staronki buduć całkam u blakadzie. Blakavańnie sajtaŭ hod tamu ciahnułasia niekalki hadzin, i za hety čas usio ž niekatoryja staronki hruzilisia. Na hety raz kala siami hadzin vyjści na biełaruskija internet‑vydańni było niemahčyma».
Čynoŭniki «Biełtelekamu» admaŭlajucca kamentavać takija zajavy. Načalnik hrupy infarmacyi j kamunikacyi Alaksiej Fiedarenčyk skazaŭ: «Niama ŭ mianie takoj infarmacyi, što «Biełtelekam» adklučaŭ niečyja sajty ŭčora ci ŭ niejki inšy dzień. «Biełtelekam» nie zajmajecca adklučeńniem niejkich sajtaŭ u internecie. «Biełtelekam» — heta ekspluatacyja sietak, a nie pytańni kantentu i adpaviednaści sajtaŭ patrabavańniam inšych strukturaŭ. «Biełtelekam» nie vyrašaje pytańniaŭ pracy asobnych sajtaŭ».
Pryvatnyja pravajdery, jakija zaležać ad asnoŭnaha, dziaržaŭnaha pravajdera «Biełtelekam», tłumačać sytuacyju inačaj.
Hieneralny dyrektar biełaruskaha partału tut.by Kirył Vałošyn zhadaŭ niekalki vypadkaŭ, kali «Biełtelekam» uvohule zablakavaŭ dostup da niekatorych sajtaŭ: «Technična heta realizujecca vielmi prosta. U nas ža asnoŭny kanał naležyć «Biełtelekamu», tamu jany majuć mahčymaść na techničnym uzroŭni zabaranić karystalnikam dostup da tych ci inšych sajtaŭ. Robicca heta nieaficyjna. Ale jość dva vypadki aficyjnaha blakavańnia».
Raniej paviedamlałasia, što Biełaruś kupiła ŭ Kitai specyjalnyja systemy, jakija dazvalajuć filtravać albo blakavać «niepažadanyja» sajty. Hetaja infarmacyja aficyjna nie paćviardžajecca.
Adnak pavodle pradstaŭnika kampanii «AjPi Tełkam» Valera Hvardyjana, toje, što adbyłosia ŭčora nie zaležyć ad pryvatnych pravajderaŭ: «Usio heta idzie praź «Biełtelekam». Heta ž zdarajecca čas ad času. I niechta ž heta robić. Kali my heta nia robim, to chto robić? Heta ŭsio vyrašajecca na inšym uzroŭni».
Pavodle jurysta Michaiła Pastuchova, padobnyja dziejańni jość biespadstaŭnym umiašańniem dziaržaŭnych orhanaŭ u dziejnaść inšych arhanizacyjaŭ: «Heta parušeńnie kanstytucyjnaha prava na svabodu infarmacyi».
Blakavańnie niezaležnych kanałaŭ infarmacyi adbyvałasia padčas prezydenckich vybaraŭ 9 vieraśnia 2001 hodu, a taksama padčas referendumu 17 kastryčnika 2004 hodu i ŭ prezydenckija vybary 2006 hodu.
