Sastupki rasiejcam u ramkach handlovaha pahadnieńnia, padpisanaha Fradkovym i Sidorskim, aceńvajucca na 2—2,5 młrd dalaraŭ. Usio dziela tannych enerhanośbitaŭ.
23 sakavika ŭ Miensku było padpisanaje mižuradavaje pahadnieńnie pra zachady ŭ raźvićci handlova‑ekanamičnaha supracoŭnictva pamiž Biełarusiaj i Rasiejaj. Uzamien na istotnyja sastupki Biełaruś atrymała kvoty na cukar dy harantyju na pastaŭki enerhanośbitaŭ.
Biełaruski i rasiejski premjery sustrelisia ŭ ramkach adkryćcia pasiedžańnia savietu ministraŭ tak zvanaj sajuznaj dziaržavy. Rasiejski premjer Michaił Fradkoŭ padkreśliŭ, što heta pačatak pierachodu da rynkavych adnosinaŭ.
Vynikam sustrečy stałasia skasavańnie abmiežavańniaŭ na impart rasiejskaj sielskahaspadarčaj techniki, praduktaŭ, u pryvatnaści piva i tytuniovych vyrabaŭ, a taksama spynieńnie dziaržaŭnaha subsydyjavańnia biełaruskich pradpryjemstvaŭ‑eksparcioraŭ. Sastupki rasiejcam u handli abyšlisia biełarusam u 2—2,5 młrd dalaraŭ u hod.
Adnačasova byli padpisanyja pahadnieńnie pra pastaŭki biełaruskaha cukru na rasiejski rynak u bližejšyja dva hady i balans paliŭna‑enerhietyčnych resursaŭ tak zvanaj sajuznaj dziaržavy na 2007 h. Ad hetaha momantu buduć skasavanyja pieraškody ŭ vyhladzie adzinaha mytnaha kalidoru, što dahetul dziejničaŭ u dačynieńni da biełaruskich vytvorcaŭ cukru. Pastaŭlać cukar u Rasieju buduć usie čatyry biełaruskija cukrovyja pradpryjemstvy. Pry hetym buduć kiravacca hurtovymi cenami, paraŭnalnymi z cenami rasiejskich vytvorcaŭ.
Padpisańnie balansu paliŭna‑enerhietyčnych resursaŭ šerah rasiejskich ŚMI padajuć jak sustrečny krok Rasiei ŭ adkaz na skasavańnie handlova‑ekanamičnych abmiežavańniaŭ.
Hazeta «Kommiersant» stavić u pramuju zaležnaść sastupki biełaruskaha boku ad mahčymaści Biełarusi praciahvać baraćbu za rasiejskuju naftu. Pavodle dakumentu, sioleta Biełaruś atrymaje ad Rasiei 21,2 młrd kubametraŭ hazu i nia mienš za 17,6 młn tonaŭ nafty. Varta nahadać, što paśla ŭviadzieńnia tranzytnych mytaŭ Rasiejaj na pastaŭki nafty ŭ Biełaruś, rasiejskija naftavyja kampanii zaŭvažna skaracili pierapampoŭvańnie nafty na biełaruskija NPZ. Što praŭda, namieśnik kiraŭnika Minpramenerha Rasiei Ivan Macieraŭ na pieramovach u Miensku patłumačyŭ, što balans jurydyčna nie źjaŭlajecca abaviazkovym dla vykanańnia. Adnak «Kommiersant» miarkuje, što heta daje Biełarusi dadatkovuju mahčymaść apelavać da balansu ŭ vypadku dalejšaha raźvićcia naftahazavaha kanfliktu, tym bolš što pytańnie pra atrymańnie rasiejskaha kredytu na zakupki nafty i hazu pakul nia vyrašanaje.
Hazeta «Viedomosti» taksama padaje ŭviadzieńnie kvotaŭ na biełaruski cukar jak uzajemnuju sastupku na źniaćcie biełaruskim bokam handlovych abmiežavańniaŭ. Vydańnie taksama nahadvaje, što padpisać dakument musili jašče 20 sakavika, adnak biełarusy nie pahadzilisia z terminami ŭstupleńnia ŭ siłu asobnych punktaŭ damovy, a taksama nastojvali na spraščeńni režymu ŭvozu ŭ Rasieju aŭtamabilaŭ. Pavodle infarmacyi hazety, byŭ dasiahnuty kampramis: biełarusy pahadzilisia na niepryncypovyja źmieny ŭ terminach ustupleńnia ŭ siłu asobnych punktaŭ damovy, a taksama dali zhodu na vynas sprečak ab pastaŭkach aŭto pa‑za ramki ŭkładzienaj damovy.
Pavodle słovaŭ kiraŭnika mienskaha analityčnaha centru «Stratehija» Leanida Zaiki, biełaruskaja pramysłovaść u vyniku padpisańnia damovy moža panieści straty, jakija častkova možna kampensavać za košt pastavak u Rasieju miasa i traktaroŭ.
