U aŭtorak z ranicy naviedniki biełaruskaj staronki Vikipedyi byli niamała ździŭlenyja, nie pabačyŭšy na resursie anivodnaha materyjału. Pry naciskańni na spasyłki ŭ źmieście, vyskokvała fraza: «Zaraz tekst na hetaj staroncy adsutničaje. Vy možacie pašukać hetuju nazvu ŭ inšych staronkach albo redahavać hetuju staronku».
«Ad samaha pačatku biełaruskaja versija Vikipedyi była stvoranaja klasyčnym pravapisam, — kaža adzin ź jaje aŭtaraŭ Viačasłaŭ Radzivonaŭ. — Praź niekatory čas utvaryłasia hrupa prychilnikaŭ aficyjnaha pravapisu. Nichto nie zabaraniaŭ im raźmiaščać na Vikipedyi artykuły narkamaŭkaj. Jany i pačali pacichu rabić takija materyjały, ale ich nie zadavalniała, što interfejs Vikipedyi byŭ «taraškievicaj». Paśla čaho źjaviłasia hrupa raskolnikaŭ, ich usiaho čałaviek piać, jakija pažadali stvaryć svaju versiju Vikipedyi. U žniŭni letaś prychilniki narkamaŭki rabili zapyt kiraŭnikam Vikipedyi na stvareńnie staronki na «narkamaŭcy», ale ŭ vyniku hałasavańnia, jakoje doŭžyłasia amal da kanca 2006 hodu, im było admoŭlena».
Tady ž prychilniki «narkamaŭki» stvaryli svoj prajekt, hetak zvany inkubatar, dzie raźmiaščali artykuły napisanyja aficyjnym pravapisam, usiaho jany stvaryli 3 565 artykułaŭ. (Klasyčnym pravapisam było bolš za 6000 artykułaŭ.)
Niadaŭna byli źmienienyja praviły padačy zajavak na stvareńnie Vikipedyi, ciapier nia treba hałasavańnie, a ŭsio vyrašaje fond Vikimedyi, jaki zabiaśpiečvaje pracu Vikipedyi. 27 sakavika prahramist z Horadni Jury Tarasievič paviedamiŭ, što ichny «inkubatar» pierachodzić na novy adras Hałoŭnaja staronka, dzie dahetul raźmiaščałasia staronka biełaruskaj Vikipedyi, napisanaja «taraškievicaj», takoje rašeńnie pryniaŭ fond Vikimedyja. Viačasłaŭ Radzivonaŭ razvodzić ruki: «Čamu na miesca našaj Viki pastavili ichnuju — nieviadoma!».
Na stan 14:00 27 sakavika hałoŭnaja staronka biełaruskaj Vikipedyi mieła ŭžo interfejs aformleny «narkamaŭkaj». Tam ža napisana [styl, leksyka, hramatyka zachavanyja — NN.]:
«Uvaha. Heta biełaruskamoŭny prajekt, jakaja robicca vyklučna ŭ narmatyŭnaj biełaruskaj movie. Pastanovaju uładaŭ Vikipiedyi jon pieraniesieny pad hetuju damiennuju nazvu. Heta nie raniejšy prajekt be.wikipedia.org. Papiaredniaje źmieściva, z pryčyny nieadpaviednaści techničnym standartam, jakimi kirujecca Vikipiedyja, pieraniesiena ŭ asobny raździeł, los i nazva jakoha buduć udakładniacca — uładami Vikipiedyi. Kalektyŭ hetaha prajektu nie robić takich pastanoŭ i nie maje na ich upłyvu. Nam nie paviedamili zahadzia, hetaksama jak i vam. A tyja, chto ananimna vandalić tut, nie robiać ničoha karysnaha, i, pavodle nieaficyjnaj infarmacyi, navat škodziać, pryčym mienavita «klasyčnamu» prajektu. Kalehi vikipiedysty, my dobra viedajem, što šmat kamu biełaruskaja mova nie mova, kali jana narmatyŭnaja — dyk, kali łaska, ahledźciesia, ci vy sapraŭdy chočacie supracoŭničać u prajekcie, jaki pryncypova pracuje tolki ŭ narmatyŭnym varyjancie biełaruskaj movy».
Takim čynam, pa-raniejšamu nichto nia viedaje, kudy dzielisia zvyš 6 tysiač artykułaŭ, jakija byli raźmieščanyja na raniejšaj staroncy Vikipedyi. Kali jany byli źniščanyja, to heta budzie najbolšy vypadak internet-vandalizmu ŭ historyi biełaruskaha sieciva.
Pavodle Jurja Tarasieviča z Horadni, adnaho ź inicyjataraŭ pieravodu Vikipedyi na aficyjny pravapis, usie byłyja artykuły na Vikipedyi, napisanyja taraškievicaj, nia źniščanyja, a pieraniesienyja sa standartnaha mižnarodnaha kodu Vikipedyi na rasšyreńnie inkubatar. Ale pakul što na hetaj staroncy nijakich tekstaŭ niama. Sp.Tarasievič miarkuje, što narkamaŭka — lepšaja za taraškievicu platforma dla raspaŭsiudu biełaruščyny ŭ siecivie, bo jana «nie takaja ekskluziŭnaja i nie takaja kanfrantyŭnaja».
Uviečary stała viadoma, što artykuły, napisanyja taraškievicaj, zachoŭvajucca na be-x-old.wikipedia.org
