Mała chto z kamentataraŭ źviarnuŭ uvahu: robiačy zajavy na fabrycy harodniny, Alaksandar Łukašenka zhadaŭ i pra amerykanskija supraćrakiety. Miž tym — cikavy niuans: uviečary taho ž dnia Pucinu patelefanavaŭ Buš. I prapanavaŭ ułahodzić prablemu.
Kaniešnie, prosta tak supała. Chacia nie ździŭlusia, kali biełaruskaja prapahanda zajavić, što heta my napałochali Ameryku :)
Zvyšzadača zhadanaj rytoryki biełaruskaha kiraŭnika čytajecca lohka: uźniać u vačoch Kramla rolu Biełarusi jak rasiejskaha stratehičnaha placdarmu. Heta daje spadzieŭ na niejkija ekanamičnyja preferencyi.
Momant, zdajecca, zručny. Užo nia pieršy tydzień rasiejskija medyi dy vysokija čyny nahniatajuć temu mierkavanaha raźmiaščeńnia elementaŭ systemy supraćrakietnaj abarony ZŠA ŭ Polščy dy Čechii: maŭlaŭ, čarhovyja padkopy suśvietnaha hiehiemona! Niekatoryja rasiejskija eksperty prapanoŭvali ŭžo: kali amerykancy pojduć na heta, treba pastavić svaje rakiety siaredniaj i małoj dalokaści ŭ sajuznaj Biełarusi. Pikantnaść prapanovy ŭ tym, što Ameryku imi nie dastanieš. Možna puścić chiba na Berlin ci Paryž. Ale raźlik akurat na toje, kab ubić klin miž Eŭropaj i Štatami.
Vo jakaja idzie hulnia! Pry tym što arhumenty šerahu ekspertaŭ śviedčać: strašyłki datyčna hetych amerykanskich rakietaŭ śmiechu vartyja.
Zrešty, isteryčnuju reakcyju rasiejskich medyjaŭ dy metalovyja zajavy maskoŭskich dziejačaŭ nia varta całkam prymać za čystuju manetu. Jość, kaniešnie, niepapraŭnyja adepty chałodnaje vajny. Ale ŭvohule ciapierašniaja kiroŭnaja elita Rasiei hladzić na stasunki z Zachadam nadzvyčaj prahmatyčna. Joj jość što stračvać ad kanfrantacyi. I najbolej strymlivaje toje, što tam, na Zachadzie — jejnyja vialikija hrošy dy biznesovyja intaresy. Voś adzin z artykułaŭ, jaki trochi abmaloŭvaje zakuliśsie hetaj prablemy. Karaciej, leźci ŭ akopy kramloŭcam, pry ŭsioj vajaŭničaj rytorycy, zusim niedarečy.
Zvyš usiaho, Buš svaim telefanavańniem zrabiŭ mocny chod. Kramlu prapanavana vybudoŭvać supraćrakietnuju abaronu supolna. Prapahandovaja teza rasiejskaha boku: maŭlaŭ, nachabnyja janki znoŭ nia rajacca i nia ličacca z našymi intaresami — adrazu pavisła ŭ pavietry. Ciapier u Maskvie čuchajuć patylicu dy marmyčuć niešta zusim nievyraznaje.
Fakt toje, što rymejku "chałodnaje vajny", peŭna, nia budzie. I spadzievy biełaruskaha kiraŭnictva vyhadać na imaviernaj kanfrantacyi Maskvy z Vašynhtonam pryvidnyja. Adpaviednaja rytoryka moža spracavać tolki na niedaśviedčanuju aŭdytoryju. Zrešty, da šarahovaha rasiejskaha elektaratu zajavy biełaruskaha kiraŭnictva siońnia praktyčna nie dachodziać. Paśla naftahazavaj vajny mahčymaści aficyjnaha Miensku dziejničać na infarmacyjnym poli vialikaj susiedki jašče bolej zvuzilisia. Tak što novyja zajavy ab hatovaści zasłanić rasiejskich bratoŭ ad zachodnich ahresaraŭ naŭrad ci daduć vialiki pijaraŭski efekt. Va ŭsiakim razie, źnižak na enerhanośbity my nie dačakajemsia.
