Rasieja vusnami ministra Łaŭrova prapanavała Ŭkrainie dapamohu ŭ vychadzie z palityčnaha kryzysu. Adrazu zhadvajecca, jak Maskva "dapamahła" Biełarusi ŭ 1996-m.
Tady desant na čale z "ciažkavahavikam" Čarnamyrdzinym vykruciŭ ruki pradstaŭnikam Viarchoŭnaha Savietu. Šlach da pierarobki kanstytucyi na karyść prezydenta byŭ adčynieny. Nastupstvy dobra viadomyja.
Uvohule ž luboje paraŭnańnie kulhaje. Siońnia niekatorym našym kamentataram z demakratyčnaha lahieru karcić pravieści paralel, užyŭšy zanadta prostuju schiemu. Maŭlaŭ, va ŭkrainskim vypadku tolki polusy pamianialisia miescami. U nas tady parlament abaraniaŭ zavajovy demakratyi, a na Ŭkrainie — naadvarot: prahresiŭny, vesternizavany prezydent Juščanka praz rospusk Rady spyniaje paŭzučy kontrrevalucyjny pieravarot pramaskoŭskaha retrahrada Janukoviča.
Nia toje što heta całkam niasłušna, ale nasamreč usio značna bolej składana. I Juščanka — demakrat umoŭny, i Janukoviča nia varta ličyć prarasiejskim. I pra duel tut kazać ciažka, bo ci nia ŭvieś ahoń haryć z byłoj "hazavaj pryncesy". Uvohule va ŭkrainskaj sytuacyi baraćba palityčnaja ščylna pieraplecienaja sa zmahańniem aliharchičnych kłanaŭ (symptamatyčna, što skandał spravakavała nibyta pierakupka deputataŭ).
Lohka sprahnazavać, što biełaruskija dziaržaŭnyja medyi znoŭ adpijarać ukrainski kryzys pa poŭnaj prahramie. Maŭlaŭ, zaraz kančatkova vidno, što ad kalarovych revalucyjaŭ dabra nie čakaj. Tolki tłum dy škoda.
Adnak jość niekalki pryncypovych momantaŭ.
Siońnia na Ŭkrainie, chaj sabie i sa skrypam, funkcyjanujuć demakratyčnyja mechanizmy. Zaraz apošniaje słova budzie, badaj, užo nie za vuličnym pratestam. Vuń Cimašenka ŭžo adhavorvaje svaich prychilnikaŭ ad Majdanu: maŭlaŭ, heta projdzieny etap. Vyśviatleńnie ž stasunkaŭ u miežach demakratyčnych praceduraŭ — pry ŭsim tłumie, ekstrymie, vykidach adrenalinu — heta ŭžo cyvilizavany šlach. Vyhladaje na toje, što Ŭkraina pierachvareła revalucyjaj. Majecca šaniec, što tamtejšyja elity raźviažuć kanflikt biaz hvałtu. Dy i ŭvohule pakrysie napracujuć dośvied kampramisaŭ. Važna toje, što za eŭrapiejski vektar vystupajuć — chacia b verbalna — i prezydent, i premjer. Tak što Zachad u roli traciejskaha sudździ maje dastatkova mocny ŭpłyŭ.
Chutčej varta vieści havorku pra chvaroby rostu jašče nie sfarmavanaj ukrainskaj demakratyi, ličyć mienski palitolah Andrej Fiodaraŭ. Jon źviartaje ŭvahu i na taki važny momant: tamtejšaja ekanomika pracuje ŭ dastatkova aŭtanomnym režymie, nia nadta zaležyć ad palityčnych katavasijaŭ.
Sapraŭdy, nasupierak zmročnym prahnozam, jana, ekanomika, nia lasnułasia ŭ vyniku "pamarančavaj revalucyi". U pryvatnaści, mienavita ciaham apošnich dvuch hadoŭ dobra pryrastaje handal ź Biełaruśsiu. Reč u tym, što tam značna dalej, čym u nas, prasunulisia rynkavyja reformy. A rynak užo sam pa sabie zadaje inšyja parametry hramadzka-palityčnaha žyćcia. Heta ŭžo zusim nia toje, što naša piramidalnaja, zamknionaja na adnu asobu systema. Na Ŭkrainie jak minimum jość pluralizm i perspektyva vyrašeńnia kalizijaŭ raźvićcia ŭ cyvilizavanych, instytucyjnych formach.
U siońniašnich biełaruskich umovach takoj perspektyvy praktyčna nie vidno. Sytuacyja nahłucha zakarkavanaja. I džyn ź plaški moža kali-niebudź narabić spraŭ.
