 |
Za apošnija čatyry miesiacy realnaja naličanaja zarpłata rabotnikaŭ źniziłasia na 6 pracentaŭ
U lutym hetaha hoda ŭ paraŭnańni sa studzieniem u Biełarusi adznačana źnižeńnie siaredniaj naličanaj zarpłaty.
Jak paviedamlaje Ministerstva statystyki i analizu, siaredniaja naličanaja zarpłata rabotnikaŭ skłała ŭ lutym 614.327 rubloŭ. Pavodle padlikaŭ BiełaPAN, u naminalnym vyražeńni heta na 0,5% mienš, čym u studzieni (było 617.244 rubla), na 8% mienš, čym u śniežni minułaha hoda (668.049), na 0,5% bolš, čym u listapadzie (611.482), i na 0,7% mienš, čym u kastryčniku (618.425).
U realnym vyražeńni (z ulikam rostu spažyvieckich cen) u lutym zarpłata źmienšyłasia na 1,3% u paraŭnańni sa studzieniem, na 10,9% - u paraŭnańni sa śniežniem, na 2,9% - ź listapadam, na 6% - z kastryčnikam.
Siaredniaja naličanaja zarpłata rabočych i słužačych u lutym u paraŭnańni sa studzieniem źniziłasia ŭ naminalnym vyražeńni na 0,5% (z 636.739 da 633.804 rubloŭ), u realnym - na 1,3%.
U valutnym ekvivalencie siaredniaja naličanaja zarpłata rabotnikaŭ za dva miesiacy 2007 hoda źniziłasia z 312,2 da 286,8 dołara ZŠA i z 237,1 da 217,1 jeŭra. Zarpłata rabočych i słužačych źmienšyłasia z 321,8 da 295,9 dołara i z 244,4 da 224,0 jeŭra.
U 2006 hodzie siaredniaja naličanaja zarpłata rabotnikaŭ u naminalnym vyražeńni ŭzrasła na 18,8%, u realnym - na 11,5%, rabočych i słužačych - adpaviedna na 18,5 i 11,2%. Pry hetym u lutym 2006 hoda było adznačana pavieličeńnie zarpłaty paśla jaje padzieńnia ŭ studzieni. U sioletnim lutym źnižeńnie zarpłaty praciahnułasia.
Fota photo.bymedia.net
