Na kanferencyi ŭ Vilni ŭmoŭna abjadnanyja demakraty dyskutujuć pra stratehiju i — nu kaniešnie! — pra kanhres.
Čarhovy raz pryznačany termin praviadzieńnia apazycyjnaha forumu — travień. Milinkieviču, miarkujučy pa ŭsim, vykrucili ruki.
Naŭrad ci pytańnie kanhresu nadta chvaluje kahości, akramia apazycyjnaha bamondu. Cikaviej daviedacca pra stratehiju.
Kaniešnie, pa frahmentarnych paviedamleńniach rabić vyčarpalnyja vysnovy ciažka. Ale voś kvintesencyja, daniesienaja praz radyjo "Svaboda": hałoŭnaja meta — praviadzieńnie ŭ Biełarusi svabodnych vybaraŭ.
Čakajcie, niešta znajomaje!
Uzdymaju svoj ŭeb-archiŭ.
24 krasavika 2006 hodu Vincuk Viačorka anansuje asnoŭnuju metu kampanii "Za svabodu", što kładziecca ŭ padmurak paślavybarnaj stratehii ADS: "Palityčnaje patrabavańnie — praviadzieńnie svabodnych i spraviadlivych vybaraŭ".
29 traŭnia letaś Alaksandar Milinkievič z nahody zaćviardžeńnia stratehii ADS na paŭtara hady kaža pra "vyrazna sfarmulavanyja mety". "Ich my vyznačyli tak: pa-pieršaje, adstaŭka režymu i abviaščeńnie svabodnych vybaraŭ. Pa-druhoje, pieramoha demsiłaŭ na svabodnych vybarach. I pa-treciaje, demakratyja, dabrabyt, niezaležnaść".
Cytaty možna doŭžyć.
Karaciej, stratehija pa-raniejšamu palahaje ŭ tym, što lepiej być zdarovym dy bahatym, čym biednym dy chvorym:)
Chto suprać? Chto ustrymaŭsia? Adnahałosna!
Zrešty, kali biaz ściobu, to novaje ŭ stratehii ŭsio ž jość. Sa słoŭ raspracoŭnikaŭ, apazycyja pieranosić akcent z vuličnych akcyj na "evalucyjny praces", abo "mirny šlach madernizacyi". To bok revalucyja admianiajecca :) Naviersie mohuć vycierci pot ź iłba.
Biezumoŭna, treba być realistami. Nu niama, niama revalucyjnaj sytuacyi! A kvołyja ručainki manifestantaŭ tolki dyskredytujuć ideju vuličnych akcyjaŭ.
I, kaniešnie ž, biełaruskaje hramadztva tak ci inačaj budzie evalucyjanavać. Tolki jakija vahary ŭździejańnia na praces bačacca apazycyjnym kreatyŭnikam? Niaŭžo ŭlotki z papularnym vykładańniem teoryi evalucyi ŭ versii kanhresu?
Naŭrad ci ŭłada planuje razdać apanentam ministerskija partfeli dla udziełu ŭ "mirnaj madernizacyi". To bok ŭsio adno zastajecca baraćba. Ale ž lubaja baraćba — samba, dziu-do, karate i palityčnaja taksama! — maje arsenał pryjomaŭ. Jakija kankretnyja pryjomy prapanuje tytulnaja apazycyja — pakul što zastajecca vialikaj tajamnicaj.
