Ź inicyjatyvaj adkryćcia va ŭsich vyšejšych navučalnych ustanovach Biełarusi Jeŭrapiejskich centraŭ infarmacyi pra pravy čałavieka i jeŭrapiejskuju demakratyju vystupiŭ siońnia ŭ Strasbury lider demakratyčnych sił Biełarusi Alaksandr Milinkievič. Na jahonuju dumku ŭ miežach abranaha kursu na dyjałoh, Rada Jeŭropy supolna ź Jeŭrasajuzam pavinny vysunuć biełaruskamu ŭradu prapanovu adkryć u VNU krainy padobnyja centry. Abmierkavańnie inicyjatyvy adbyłosia siońnia na sustrečy Alaksandra Milinkieviča z hienieralnym sakratarom Rady Jeŭropy Tery Devisam.
— Biełaruskaja moładź pavinna mieć mahčymaść atrymlivać viedy pra Jeŭropu i jeŭrapiejcaŭ, pravy čałavieka i demakratyju niepasredna ź pieršakrynic, a nie praz pryzmu dziaržaŭnych telekanałaŭ i haziet i časopisaŭ, — adznačyŭ Alaksandr Milinkievič.
Pavodle prapanavanaha prajektu, rabočaja nazva jakoha «Demakratyja, adukacyja i Jeŭropa ŭ Biełarusi», praduhledžvajecca adkryćcio va ŭsich vyšejšych navučalnych ustanovach Biełarusi jeŭrapiejskich centraŭ infarmacyi pra pravy čałavieka i jeŭrapiejskuju demakratyju.
Na dumku Alaksandra Milinkieviča jeŭrapiejskija centry mohuć być stvoranyja na ŭzor Centra jeŭrapiejskaj dakumientacyi dy infarmacyi, jaki siońnia dziejničaje pry BDU, ale z pryncypovaj roźnicaj — centry pavinny paŭstać va ŭsich VNU Biełarusi i kaardynavać ich pracu pavinny pradstaŭniki Rady Jeŭropy ci Jeŭrasajuza.
