Na šostym źjeździe Biełaruskaj sacyjał‑demakratyčnaj partyi (Hramada) kolišniaha deputata Pałaty pradstaŭnikoŭ Siarhieja Skrabca abrali ŭ kiroŭnyja orhany BSDP. Paśla svajho abrańnia ŭ Centralnuju radu i Vykanaŭčy kamitet partyi Siarhiej Skrabiec zajaviŭ, što prezydenckija vybary ŭ Biełarusi mohuć adbycca ŭžo sioleta i zaklikaŭ pačać da ich rychtavacca.
«Heta ciapier adna z hałoŭnych zadač partyi», — skazaŭ palityk i dadaŭ, što, aproč hetaha, «nieabchodna terminova pačać padrychtoŭku da parlamenckich vybaraŭ, jakija buduć naleta».
«Užo za dva hady da parlamenckich vybaraŭ hatovyja śpisy ludziej, jakich ułada pryznačaje ŭ nastupny skład parlamentu», — zajaviŭ Siarhiej Skrabiec.
«Ja liču, što partyja musić vystavić jak minimum, na 110 akruhaŭ pa try čałavieki. Pracavać z akruhami i rychtavać kandydataŭ treba ŭžo zaraz, kab nie praziavać vybarčuju kampaniju, jak heta było z vybarami ŭ miascovyja saviety».
Na dumku Siarhieja Skrabca, u budučyni sacyjał‑demakratyčnyja partyi Biełarusi abjadnajucca ŭ adnu strukturu. Pavodle jahonych słovaŭ, Mikoła Statkievič, Stanisłaŭ Šuškievič i Alaksandar Kazulin skazali, što hatovyja pačać abjadnaŭčy praces sacyjał‑demakrataŭ Biełarusi, paviedamlaje pres‑słužba partyi AHP.