Viktar Korzun, aŭtar filmu «Vasil Bykaŭ. Viartańnie», źniaŭ druhuju svaju stužku, pra Čarnobyl.
«Naša Niva»: Jak uźnikła ideja zdymać film mienavita pra Čarnobyl?
Viktar Korzun: Kali jość mahčymaść niešta zrabić, to najlepš rabić heta na surjoznuju temu. Pra Čarnobyl pačynajuć zabyvać. Narod spakojna stavicca da trahiedyi. Jość asobnyja publikacyi pierad 26 krasavika, ale hetaha mała. Ja pierad pačatkam pracy nad filmam kansultavaŭsia z ekspertami ŭ čarnobylskaj trahiedyi, u tym liku i ź Jurjem Bandažeŭskim. Ja imknuŭsia pakazać jak maha bolš abjektyŭnuju karcinu Čarnobylu.
«Tam nie piajuć ptuški»
«NN»: Chto ŭ filmie hieroi?
VK: Heta prafesar, člen‑karespandent Akademii navuk Ivan Nikitčanka i zvyčajnaja dazymetrystka z Brahinščyny Nastaśsia Piatroŭna, likvidatarka Čarnobylskaj katastrofy. Jana adna ź niamnohich, jakija zastalisia tamaka kantralavać sytuacyju z radyjacyjaj. Nie chaču nazyvać jaje proźvišča, kab u jaje nie było prablem, bo jana vielmi davierliva pastaviłasia da nas. U kožnym zaražanym rajonie jość punkt kantrolu za radyjacyjaj. Na adnym ź ich jana j pracuje.
Cikava vyjšła: my tolki pryjechali da jaje i adnačasova da jaje pryjechali ludzi ź Miensku, jakija naźbirali hryboŭ i chacieli pravieryć ich na radyjacyju. Jana kaža, što doza radyjacyi ŭ hrybach pieravyšanaja. I što vy dumajecie: nazaŭtra my sustrakajem hetuju siamju, jakaja nas zaprašaje da siabie dadomu pajeści hryboŭ...
A i sama Nastaśsia Piatroŭna — typovaja žycharka tych miaścinaŭ. Jana kaža, što radyjacyja nia pachnie, jaje rukami nie pamacaješ, dyk čaho jaje bajacca. Jana kaža, što ničoha nie zdarajecca, a paśla raskazvaje, što na minułym tydni pamior adzin jaje adnahodak, za im adrazu druhi. Niejki jejny svajak pamior ad raku. Hierainia vielmi dobra siabie pačuvaje, chodzić paŭsiul, zamiaraje radyjacyju. Jana nie baicca, kaža: ja ž ruki myła. Hetaja žančyna kaža, što pierasialać ludziej nia varta, bo heta biessensoŭna...
«NN»: A što kaža Nikitčanka?
VK: Nikitčanka padychodzić z pazycyi navukoŭca, kaža, što Čarnobyl udaryŭ nia tolki pa Biełarusi, ale i pa ŭsim śviecie. Ja, jak režyser, chaču, kab čałaviek sam usio supastaŭlaŭ i prychodziŭ da niejkich vysnovaŭ, kab naradžałasia treciaja iścina. Ni Nikitčankava, ni hetaj dazymetrystki, a niešta treciaje. Praz heta film i zaviecca «Vieryć tolki vietru». Nie chaču stvarać tannych emocyjaŭ...
«Naŭrad ci film pakažuć pa BT»
«NN»: A što zapomniłasia najbolš za čas pierabyvańnia ŭ zabrudžanych rajonach?
VK: Roznyja niezvyčajnyja rečy. Akazvajecca, što kukuruza absalutna nie nabiraje radyjacyi, choć jaje pasadzi na samim čarnobylskim reaktary... Što tamaka raście čornaja biaroza. Poŭna roznych źviaroŭ, pačali zapuskać zubroŭ. U lasach čarnobylskich rajonaŭ nie piajuć ptuški...
«NN»: Jak Vy dumajecie, ci moža film być pakazany na BT?
VK: Mahčyma, adbuducca zakrytyja pakazy ŭ niekatorych kinateatrach pierad 26 krasavika. Na BT — naŭrad ci, bo ŭ filmie — praŭda. Hieroi filmu havorać pa‑roznamu, ale ŭsie havorać praŭdu, a heta — samaje strašnaje dla našaha telebačańnia.
* * *
Pakaz filmu adbudziecca 24 krasavika ŭ 19:00 na Siadzibie BNF, vuł. Varvašeni (Mašerava), 8.
