 |
Sustaršynia Fondu sacyjalna‑ekanamičnaha supracoŭnictva Leanid Sinicyn i biznesoviec, były alimpijski čempijon Uładzimier Parfianovič abnarodavali «Mienski manifest biełaruska‑rasiejskaha jadnańnia».
Heta palityčnaja platforma prychilnikaŭ biełaruska‑rasiejskaj intehracyi. Aŭtary piajuć dyfiramby biełaruska‑rasiejskamu «jadnańniu». Jany zaklikajuć da «stvareńnia sajuznaje dziaržavy na asnovie rasiejskaj kanstytucyi», h.zn. ŭvachodžańnia Biełarusi ŭ skład Rasiei na pravach subjekta Rasiejskaj Federacyi.
U jakaści pieršych krokaŭ da hetaha jany zaklikajuć pierajści na rasiejski rubiel. Taksama jany prapanujuć pieradać biełaruskija nafta‑ i hazapravody va ŭłasnaść sajuznaj dziaržavy.
Dakument upieršyniu vyjšaŭ u śviet na žoŭtym rasiejskim sajcie Stringer.ru. Sajt «Biełaruski partyzan» pieradrukavaŭ jaho biez kamentaroŭ.
Varta nahadać, što niadaŭna inšaja hrupa palitykaŭ (Skrabiec, Frałoŭ) praviała mitynh na płoščy Banhałor u padtrymku intehracyi. Vyjšaŭ kanfuz: na jaho sabrałasia ŭsiaho 10 čałaviek. Jak bačym, u baraćbie za rasiejskuju padtrymku nazirajecca kankurencyja.
Abodva palityki, što padpisali manifest, vyjšli z atačeńnia Łukašenki. Sinicyn byŭ kiraŭnikom Administracyi prezydenta i arhanizataram pieršaha referendumu, jaki zakłaŭ asnovy dziaržaŭnaha ładu. Parfianovič byŭ abrany ŭ pałatu pradstaŭnikoŭ pa prezydenckim śpisie. Ni Sinicyn, ni Parfianovič nie padtrymlivali demakratyčnych kandydataŭ na vybarach 2001 i 2006 hadoŭ.
Uładzimier Parfianovič: «Našu ideju padtrymlivajuć praktyčna ŭsie ŭ biełaruskim uradzie»
Eks‑deputat pałaty pradstaŭnikoŭ Uładzimier Parfianovič u hutarcy z karespandentam «Našaj Nivy» paćvierdziŭ, što jon razam ź Leanidam Sinicynym staŭ zasnavalnikam «Mienskaha manifesta biełaruska‑rasiejskaha adzinstva». Taksama jon vykazaŭsia za ŭvachodžańnie Biełarusi ŭ skład Rasiei.
«Naša Niva»: Ź jakoj metaj stvaraŭsia hety ruch?
Uładzimier Parfianovič: Heta naš krok, kab palepšyć adnosiny z brackim rasiejskim narodam. Prabačcie za hrubaść, ale toj tryndziož pra biełaruska‑rasiejskaje abjadnańnie, jaki my štodnia čujem pa našym telebačańni, paprostu dastaŭ. Jon nie pryvodzić da realnaha palapšeńnia adnosinaŭ miž našymi krainami. My vystupajem za toje, kab pačali vykonvacca ŭsie raniejšyja abaviazacielstvy biełaruskaha boku, što da intehracyjnych pracesaŭ. Naša zadača zrušyć biełaruska‑rasiejski sajuz ź miortvaj kropki, u jakuju jon trapiŭ.
«NN»: Vy, badaj, pieršyja biełaruskija palityki apošnich hadoŭ, jakija adkryta vystupajuć za ŭvachodžańnie Biełarusi ŭ skład Rasiei.
UP: Mnie, zdajecca, što biełaruskaja hramadzkaść užo saśpieła da hetaha kroku. Razam z tym heta absalutna nie aznačaje straty suverenitetu. Biełaruś maje ŭvajści ŭ skład Rasiei na pravach asacyjavanaha člena. My taksama prosta patrabujem, kab byli vykananyja abaviazki referendumu 1995 hodu, kali pieravažnaja bolšaść biełarusaŭ vykazałasia za bolš ciesnyja adnosiny z brackim rasiejskim narodam.
«NN»: A što kankretna nam moža dać uvachodžańnie ŭ skład Rasiei?
UP: Ja znoŭku vas chaču supakoić, što heta zusim nie aznačaje straty suverenitetu. I naahuł ja liču, što taki krok daść novy impuls dla raźvićcia biełaruskaj movy i kultury. Heta absalutna adnaznačna. Uzrastuć ekanamičnyja suviazi miž našymi krainy, a heta budzie vyhadna absalutna ŭsim. Biełaruski biudžet stanie prazrystym, čaho niama zaraz. Chiba heta drenna? Chacia razam z tym my musim raźvitacca ź niekatorymi atrybutami niezaležnaj dziaržavy.
«NN»: Ź jakimi mienavita?
UP: Dumaju, što nia samymi pryncypovymi. Amal ža ŭsie eŭrasajuznyja krainy taksama pieradajuć častku suverenitetu Eŭraparlamentu i absalutna nichto ad hetaha nie pakutajuć. Prykładna toje samaje budzie i ŭ nas. Kaniečnie, u nas budzie ahulnaja valuta, ale heta znoŭ ža pojdzie na karyść biełaruskim biznesoŭcam i pradprymalnikam.
«NN»: Dyk čym ułasna status Biełarusi budzie adroźnivacca ad statusu Tatarstanu ci Jakucii?
UP: Kali łaska, nia błytajcie, heta absalutna roznyja rečy. Jašče raz paŭtarusia, my budziem uvachodzić u skład Rasiei jak asacyjavany člen, to bok my budziem mieć svaju alimpijskuju kamandu, siabroŭstva ŭ AAN, ściah, hierb.
«NN»: A chto budzie ŭznačalvać takuju dziaržavu?
UP: Mnie zdajecca, što heta nie samaje pryncypovaje pytańnie. Moža być prezydent, moža – parlament. U kožnaj z respublik budzie svoj kiraŭnik, a chto ź ich mienavita budzie kiravać usioj dziaržavaj, vyśvietlim paźniej.
«NN»: Vam nie zdajecca, što prychilnikaŭ intehracyi ŭ biełaruskim hramadztvie mieniej z kožnym hodam? Heta ž dakazała i niadaŭniaja akcyja Siarhieja Skrabca i Valerja Frałova.
UP: Toje, što ludzi nie pryjšli na akcyju heta adno, a toje, što jany za sajuz – heta zusim inšaje. Vyjdzicie i parazmaŭlajcie ź ludźmi na vulicy i vy pierakanajeciesia, što absalutnaja bolšaść biełarusaŭ za sajuz z Rasiejaj.
«NN»: Chto ŭ Rasiei padtrymaŭ Vašu ideju?
UP: Liču, što pra heta pakul rana havaryć, ale pierakonvaju vas, što naša prapanova ciapier aktyŭna abmiarkoŭvajecca vierchnich ešalonach rasiejskaj ułady. I chutka stanie viadoma, ci padtrymajuć tamaka nas.
«NN»: A ŭ Biełarusi?
UP: U Biełarusi bolej. Skažu vam ščyra, što našu ideju padtrymlivajuć praktyčna ŭsie dziejsnyja palityki ź biełaruskaha ŭradu. Ja mieŭ ź niekatorymi ź ich takija razmovy. Paprostu jany nia mohuć pieršyja pačynać takija inicyjatyvy, ale ŭ vypadku čaho zaŭsiody hatovyja nas padtrymać.
«NN»: Takim čynam možna havaryć, što ŭ Biełarusi źjaviłasia novaja prarasiejskaja apazycyja?
UP: Kali łaska, nie ŭžyvajcie ŭ datyčnaści nas takoje słova. My nie apazycyja, bo my majem kankretnuju pazycyju. Apazycyja kamu? Ciapierašniaj uładzie? Dyk tam ža nas praktyčna ŭsie padtrymlivajuć. Chiba što apazycyja adnamu kankretnamu čałavieku.
Kamentar Redakcyi:
Ničoha dziŭnaha ŭ źjaŭleńni takoha dakumentu niama. Uklučycie televizar: u dziaržaŭnym telepakiecie 31 rasiejskamoŭny kanał, adzin dźviuchmoŭny «Ład» i nivodnaha biełaruskamoŭnaha. Tatalnaja izalacyja biełaruskaj kultury łukašenkaŭcami padrychtavała hlebu dla źjaŭleńnia padobnaj palityčnaj prahramy.
