2 traŭnia kiraŭnictva hramadzkaha abjadnańnia «Biełaruski litaraturny fond» atrymała aficyjny list ź Viarchoŭnaha sudu Respubliki Biełaruś. Heta była pozva na sudovaje raźbiralnictva hramadzianskaj spravy pa zysku Ministerstva justycyi ab likvidacyi «Biellitfondu». Raźbiralnictva było pryznačanaje na 3 traŭnia ŭ 14:30.
Jak raspavioŭ dyrektar HA «Biellitfond» Aleś Danilčyk, kiraŭnictva arhanizacyi dasłała ŭ sud chadajnictva z prośbaj pieranieści raźbiralnictva na bolš poźni termin. «My apelavali da 143 artykuła Hramadzianska‑pracesualnaha kodeksu, jaki harantuje bakam sudovaha raźbiralnictva pradstaŭleńnie ŭ nieabchodnaj kolkaści času na padrychtoŭku da pracesu» — patłumačyŭ sp. Danilčyk. Padrychtavacca da sudovaha raźbiralnictva ciaham 24 hadzinaŭ (uličvajučy načny čas sutak) pa‑prostu niemahčyma, adnak sud adchiliŭ chadajnictva fondu. Raźbiralnictva adbyłasia ŭ adsutnaść upaŭnavažanaha pradstaŭnika «Biellitfondu». Pa słovach A. Danilčyka, na sudzie trojčy začytali tekst zysku Minjustu — spačatku pradstaŭnik hetaj arhanizacyi, zatym supracoŭnik prakuratury, jaki pahadziŭsia z pretenzijami Minjustu, a taksama sudździa Samaluk V.I. Zaŭtra ab 11:00 budzie vyniesieny vyrak.
Nahadajem, što ŭ 2003 hodzie Ministersva justycyi nakiravała ŭ «Biellitfond» list z prapanovaj unieści emblemu svajoj arhanizacyi ŭ Dziaržaŭny hieraldyčny rehistr. U 2006 h. arhanizacyja atrymała papiaredžańnie za nievykanańnie toj prapanovy. U tym ža hodzie Minjust vynies čarhovaje papiaredžańnie fondu: na adnym sa schodaŭ pry hałasavańni pa paviestcy dnia byli ŭličany hałasy siabroŭ arhanizacyi, jakija nie zmahli trapić na schod, ale svaimi davieranaściami ŭpaŭnavažyli niekatorych členaŭ «Biellitfondu» hałasavać ad ich imia.
Sajuzu piśmieńnikaŭ udałosia sarvać sprobu Miniustu likvidavać arhanizacyju, dziakujučy masavaj mabilizacyi tvorcaŭ u abaronu. Sudździa nie navažyŭsia vynieści źniščalnaje rašeńnie ŭ prysutnaści Buraŭkina, Arłova dy Ipatavaj. Praŭda, Buraŭkinu toj praces kaštavaŭ infarktu. U hetym razie Miniust dziejničaje sprytniej.
