Dahetul svajaki i paplečniki byłoha ministra ŭnutranych spraŭ nia viedajuć pra jahony los. Siabry AHP naviedajuć siońnia na Homielščynie maci Jurja Zacharanki, a aktyvisty moładzievych arhanizacyj praviaduć šerah akcyj, kab nahadać hramadztvu, što pamiatajuć źnikłych lideraŭ i patrabujuć ad ułady dać adkaz pra los jaje vykradzienych apanentaŭ.
Siońnia hrupa siabraŭ Abjadnanaj Hramadzianskaj Partyi na čale z Anatolem Labiedźkam naviedaje maci Jurja Zacharanki.
«Hety čałaviek z abojmy nacyjanalnych lideraŭ. Jon byŭ adnym z kandydataŭ na prezydenckija vybary 2001 hodu, i toje, što jaho nia stała, toje, što ź im zrabili, śviedčyć, što ŭ jaho byŭ mocny patencyjał... Škada jaho rodnych, blizkich. Siońnia našy ludzi z kiraŭnictva partyi, z presavaj słužby pajeduć na Homielščynu da maci Jurja Zacharanki, jakaja čakaje, kali zaskrypiać maśnicy, adčyniacca dźviery, i jana ŭbačyć svajho Jurku... I tak doŭhich vosiem hadoŭ», — havoryć Anatol Labiedźka.
Anatol Labiedźka raspavioŭ «Svabodzie», što sioleta na hadavinu źniknieńnia Jurja Zacharanki siabry AHP nia buduć ładzić tradycyjny łancuh nieabyjakavych ludziej na Kastryčnickaj płoščy:
«Kali akcyi pravodzić, to ich treba rychtavać, a padrychtoŭka zajmaje peŭny čas. Siońnia šmat času zajmaje padrychtoŭka da Kanhresu, infarmacyjnaja kampanija. My b chacieli, kali b była akcyja, to, kab jana była kaalicyjnaja. A łancuh, kali adbudziecca stychijna, to našy ludzi voźmuć u im udzieł».
Aktyvisty moładzievych niezarehistravanych arhanizacyj planujuć siońnia ciaham dnia praviadzieńnie fłeš‑mobaŭ, kab nahadać hramadzkaści pra vykradzienych apanentaŭ ułady.
«Na siońniašni dzień zaplanavany šerah mierapryjemstvaŭ ź liku moładzievych fłeš‑mobaŭ, pryśviečanych źniknieńniu viadomych u Biełarusi ludziej. My pavinny nahadać u hety dzień, što moładź, u pryvatnaści, nie zabyvajecca pra svaich lideraŭ, nie zabyvajecca na tych ludziej, jakija zmahalisia i zmahajucca za niezaležnaść i svabodu Biełarusi», — havoryć moładzievy aktyvist partyi BNF Franak Viačorka.
Moładź planuje ładzić karotkačasovyja akcyi ŭ roznych miescach Miensku, kab paźbiehnuć zatrymańniaŭ.