Da inicyjatyŭnaj hrupy dałučyŭsia Viktar Šałkievič. Tym časam ułady praktykujuć psychalahičny cisk na abaroncaŭ horadu
Pradstaŭniki haradzienskaj intelihiencyi inicyjavali praviadzieńnie haradzkoha referenduma. Žycharam horada prapanujuć vykazać svajo staŭleńnie da prablemy zachavańnia historyčnaha centru Horadni, a taksama raźvićcia haradzkoj transpartnaj systemy.
Inicyjatarami referendumu vystupili daktary histaryčnych navuk Aleś Smalančuk i Alaksandar Kraŭcevič, mastaki Aleś Suraŭ i Uładzimier Kisły, historyki Siarhiej Salej i Andrej Vaškievič, kaval‑restaŭratar Juraś Macko, zasnavalnik i hanarovy staršynia HA «Sajuz palakaŭ u Biełarusi» Tadevuš Havin, staršynia Haradzienskaha HA «Civinie» Alhis Dzirhinčus, deputat Haradzienskaha harsavieta deputataŭ 2003‑2007 hh. Siarhiej Kuźmianok, žurnalisty Natalla Makušyna, Aleś Zaleŭski i Pavał Mažejka.
U padtrymku praviadzieńnia referenduma inicyjatyŭnaj hrupie nieabchodna budzie sabrać podpisy nia mienš 10% ad kolkaści vybarcaŭ Horadni. Siabram inicyjatyŭnaj hrupy maje prava stać hramadzianin Biełarusi, prapisany ŭ Horadni, jakomu na momant uvachodžańnia ŭ inicyjatyŭnuju hrupu spoŭniłasia 18 hod. Tolki siabra inicyjatyŭnaj hrupy maje prava źbirać podpisy ŭ padtrymku referenduma. Kaardynaty inicyjataraŭ praviadzieńnia referendumu možna znajści na staroncy sajtu harodnia.com.
Adzin ź inicyjataraŭ praviadzieńnia plebiscytu Pavał Mažejka raspavioŭ NN pra chadu kampanii. Pavodle zakanadaŭstva, nieabchodna pravieści schod inicyjatyŭnaj hrupy, u jakim pavinnyja pryniać udzieł nia mienš za pałovu siabraŭ hrupy. Schod adbudziecca 20 traŭnia. Zatym u harvykankam padaduć nieabchodnyja dakumenty dla rehistracyi inicyjatyŭnaj hrupy. «Kab nabrać nieabchodnuju kolkaść podpisaŭ, nam dastatkova 100‑150 čałaviek i takuju hrupu my lohka nabiarem, u pieršuju čarhu za košt pradstaŭnikoŭ hramadzkich arhanizacyjaŭ i palityčnych partyjaŭ» — kaža sp. Mažejka. Adnak inicyjatary referendumu imknucca zhurtavać bolš značnyja siły: inicyjatyŭnaja hrupa ŭ 300 čałaviek chutčej by spraviłasia z pastaŭlenymi zadačami, a 1000 čałaviek — heta ŭžo vielmi surjozna dla Horadni. Pa słovach P. Mažejki, nadajecca ŭvaha i jakasnamu składu hrupy. U jaje zaprašajuć pradstaŭnikoŭ intelihiencyi, znanych i pavažanych u horadzie asobaŭ. Adnym ź pieršych dałučyŭsia haradzienski aktor i bard Viktar Šałkievič. «Sprava biesperspektyŭnaja, bo my viedajem staŭleńnie da hramadzkaha mierkavańnia, ale maŭčać taksama nielha — hety referendum jość sprobaj vykazać svajo staŭleńnie da prablemy» — prakamentavaŭ sp. Šałkievič svoj udzieł u inicyjatyŭnaj hrupie.
Praviadzieńnie referendumu ŭ Horadni dazvolić pravieści šyrokuju infarmacyjnuju kampaniju, danieści da mieścičaŭ chavanuju ad ich haradzkimi ŭładami infarmacyju pra sapraŭdnuju sytuacyju vakoł tak zvanaj rekanstrukcyi histarčynaha centru, a taksama paznajomić haradziencaŭ z alternatyŭnym prajektam transpartnaj systemy, raspracavanym niezaležnymi ekspertami.
Tym časam haradzkija ŭłady pačynajuć reahavać na inicyjatyvu haradziencaŭ. Adnym ź inicyjataraŭ plebiscytu zacikaviłasia milicyja. Da baćkoŭ Alesia Zaleŭskaha zavitaŭ učastkovy, jaki paprasiŭ pieradać jamu pozvu ŭ milicyju. Sp. Zaleŭskaha vyklikaŭ na hutarku Siarhiej Viečar, jakoha nibyta cikaviła palityčnaja aktyŭnaść haradzienskaha žurnalista. S. Viečar viadomy tym, što časta arhanizoŭvaŭ preventyŭnyja zatrymańni haradzienskich apazycyjnych aktyvistaŭ, a taksama vystupaŭ u jakaści śviedki na palityčna matyvavanych pracesach. Intares da svajoj asoby sp. Zaleŭski tłumačyć tym, što apošnim časam aktyŭna ŭdzielničaje ŭ akcyjach suprać rujnavańnia histaryčnaha centru Horadni. Mienavita jon zdoleŭ sfatahrafavać incydent kala sinahohi, kali staršynia harvykankamu Alaksandar Antonienka zahadaŭ milicyjantaŭ zatrymać haradzienskich historykaŭ.
Ułady zanialisia taksama i dačkoj doktara histaryčnych navuk Alesia Smalenčuka Volhaj, vučanicaj 11 klasy. Dziaŭčyna raspaviała, nibyta dyrektar škoły ŭ jakoj jana navučajecca, zahadaŭ praz klasnych kiraŭnikoŭ vučniam starejšych klasaŭ abmiežavać ź joju ŭsialakija kantakty. «Pra heta mnie raskazali vučni paralelnych klasaŭ — nibyta klasnyja kiraŭniki zahadali im nie razmaŭlać sa mnoju i ničoha ad mianie nia brać» — kaža Volha. Na jaje dumku, takim čynam sprabujuć abmiežavać raspaŭsiud siarod školnikaŭ niepažadanaj infarmacyi pra padziei ŭ horadzie.
