U Minski harvykankam padadziena zajaŭka na praviadzieńnie 26‑27 maja Kanhresa demakratyčnych sił (KDS). Pra heta 7 maja na pres‑kanfierencyi ŭ Minsku paviedamiŭ kiraŭnik arhkamiteta pa padrychtoŭcy KDS Alaksandr Buchvostaŭ.
Arhanizatary taksama nakiravali listy z prośbaj pradastavić pamiaškańnie dla praviadzieńnia KDS u try arhanizacyi, što majuć dla hetaha nieabchodnyja ŭmovy, — Pałac respubliki, kancertnuju zału «Minsk» i Pałac kultury Minskaha aŭtazavoda. Aprača hetaha, nakiravany list u Administracyju prezidenta z prośbaj dazvolić praviadzieńnie KDS, bo, pavodle słoŭ A.Buchvostava, «takija mierapryjemstvy nie pravodziacca biez dazvołu vyšejšaha kiraŭnictva krainy». Adkaz arhanizatary kanhresa prosiać dać da 16 maja, kab da daty praviadzieńnia KDS paśpieć vyrašyć usie prablemy.
Rehijanalnyja kanfierencyi pa padrychtoŭcy KDS užo prajšli ŭ troch abłaściach — Minskaj, Homielskaj i Hrodzienskaj. Usie schody, pavodle słoŭ A.Buchvostava, mieli nieabchodny kvorum, dla ŭdziełu ŭ KDS na ich dadatkova abrany 21 delehat (usiaho, jak čakajecca, u pracy kanhresa voźmie ŭdzieł pryblizna tysiača delehataŭ). Bolšaść udzielnikaŭ praviedzienych rehijanalnych schodaŭ — 117 čałaviek — prahałasvali za abrańnie niekalkich sustaršyniaŭ Palitsavieta abjadnanych demakratyčnych sił. Za abrańnie adzinaha lidera Palitsavieta vystupili 112 čałaviek. Pa pytańni, jakim čynam budzie vybiracca kiraŭnictva Palitsavieta — na KDS abo členami Palitsavieta, hałasy raźmierkavalisia nastupnym čynam: 118 i 114 adpaviedna.
Asnoŭnyja dakumienty, što vynosiacca na KDS, — «Pazityŭnaja alternatyva dla hramadstva», «Małaja Kanstytucyja» i «Ekanamičnaja płatforma abjadnanych demakratyčnych sił» — uchvaleny bolšaściu ŭdzielnikaŭ rehijanalnych kanfierencyj.
10 maja kanfierencyja pa padrychtoŭcy KDS projdzie ŭ Minsku, 12 maja — u Bresckaj vobłaści, 13 maja — u Mahiloŭskaj i Viciebskaj abłaściach.
