Mienski rajvykankam z treciaj sproby valavym rašeńniem pryznačyŭ svajho kandydata staršyniom Kaładziščanskaha sielsavietu. Bolšaść deputataŭ zastajucca niazhodnyja z hetym rašeńniem i šukajuć praŭdy ŭ prakuratury
U časie studzieńskich vybaraŭ u miascovyja saviety ŭ Kałodziščach abrali dvuch niezaležnych deputataŭ: Michaiła Zujenka i Volhu Kiścień. Rajonnaje načalstva razam z supracoŭnikami milicyi ŭ noč na 15‑ie studzienia sprabavali «vyratavać sytuacyju», adnak novaabranyja deputaty apynulisia vopytnymi ludźmi i nie dapuścili hetaha.
Kažuć, paśla taho rajonnaje načalstva mieła vialikija niepryjemnaści. Kali nastaŭ čas abirać staršyniu savietu, niepryjemnaści pačalisia ŭ deputataŭ. Rajvykankam trojčy adchilaŭ kandydaturu Anatola Buračeŭskaha, prapanavanaha deputatami na pasadu staršyni savietu. Zamiest jaho staršyniom nastojliva raili abrać Aleha Ivańko. Na treciuju sesiju savietu pryjechaŭ asabista staršynia rajvykankamu Michaił Hlinski ŭ supravadžeńni vialikaj kolkaści milicyjantaŭ.
Deputaty i hetym razam prahałasavali bolšaściu suprać staŭlenika rajonu i pasprabavali zakryć sesiju. Adnak Michaił Hlinski nia daŭ hetaha zrabić: «Budziecie hałasavać usiu noč, pakul nie daścio patrebny vynik». U znak pratestu siem deputataŭ ź piatnaccaci pakinuli sesiju, tym samym pazbaviŭšy jaje kvorumu. Heta nie pieraškodziła haściam pravieści paŭtornaje hałasavańnie i pryznačyć svajho kandydata staršyniom sielsavietu.
Niazhodnyja ź dziejańniami rajonnaha načalstva deputaty skłali skarhu ŭ abłasnuju prakuraturu, ale adtul jana trapiła ŭ mižrajonnuju. Nieŭzabavie pryjšoŭ adkaz, napisany niby pad dyktoŭku z rajvykankamu. Deputatam patłumačyli, što peŭnyja punkty rehlamentu Kaładziščanskaha sielsavietu piarečać Zakonu «Ab miascovym kiravańni i samakiravańni ŭ Respublicy Biełaruś». Mižrajonny prakuror I. H. Škatuła nie znajšoŭ u hetaj spravie nahody dla prakurorskaha reahavańnia. Miž inšym u narodnych abrańnikaŭ zastajucca pytańni da apošniaj «načnoj» sesii — jakim zakonam tłumačycca praviadzieńnie paŭtornaha hałasavańnia, kali sesija była ŭžo zakrytaja, ci nia źnik pratakoł taho pasiedžańnia. Majuć deputaty pytańni i da novaabranaha staršyni, jaki dahetul zajmaje apłatnuju pasadu načalnika ŽES. Niavyznačany pakul los zvolnienaha z pasady vykonvajučaha abaviazki namieśnika staršyni sielsavietu A. Buračeŭskaha. Jaho zvolnili, nie atrymaŭšy na toje zhody deputataŭ savietu, jak taho patrabuje zakon. Čakajecca sudovaje raźbiralnictva.
«Samaje prykraje, što z nami nie pažali sustrecca ni ŭ prakuratury, ni ŭ raj‑ ci abłvykankamie, ni ŭ administracyi prezydenta» — aburajucca deputaty. Jany zadajucca pytańniem, navošta ŭvohule patrebnyja vybary, kali da abrańnikaŭ narodu staviacca takim čynam. Pakul zakon budzie vykarystoŭvacca advolna, kali patrebna kiroŭnaj vertykali, paradku nia budzie nidzie, miarkuje Volha Kiścień. Jana ličyć, što sytuacyja ŭ Kałodziščach typovaja dla ŭsioj krainy i vyjšła na pavierchniu tolki dziakujučy aktyŭnaj pazycyi kupki deputatŭ, što navažylisia supraćstajać svavoli rajonnaha načalstva.
Pra padziei ŭ Kałodziščach nie paviedamiła nivodnaja ź dziaržaŭnych ŚMI. Napisała tolki «Narodnaja vola», što dała nahodu staršyni mienskaha rajvyankamu abvinavacić deputatŭ sielsavietu ŭ apazycyjnaści. Miž inšym aŭtar artykułu padaje adnoj z pryčynaŭ supraćstajańnia kaładziščanskich deputataŭ i kiraŭnictva mienskaha rajvykankamu ziamielnaje pytańnie. Sielsaviet vałodaje nadzvyčaj łasym kavałkam – terytoryjaj byłoha vajskovaha palihonu. Tut planujecca zbudavać novy kompleks holf-klubu ź piacizorkavym hatelem. Košty na lepšyja ziamielnyja ŭčastki ŭžo siahajuć za 30 tysiačaŭ dalaraŭ, a pavodle novych rascenak mohuć uzraści ŭ 30 razoŭ. Z versijaj hazety pahadžajucca i apalnyja deputaty: «Tolki ziamla». Varta nahadać, što byłaja staršyńka Kaładziščanskaha sielskaha Savieta Taciana Bonda vosieńniu minułaha hodu była abvinavačanaja abłasnoj prakuraturaj pavodle art. 126 KK (Pieravyšeńnie ŭłady i słužbovych abaviazkaŭ). Joj zakidajuć machinacyi z vydzialeńniem ziamielnych nadziełaŭ.
