Kazaski prezydent Nazarbajeŭ ad samaha pačatku žorstka kankuravaŭ z Łukašenkam za laŭry pieršaha intehratara na postsavieckim absiahu. I voś nadyšoŭ jahony zorny čas. Biełaruskaje kiraŭnictva adpačyvaje.
Nazarbajeŭ ža zdymaje viarški z sytuacyi, kali Maskva choča lubym koštam nie dapuścić alternatyŭnych maršrutaŭ pastaŭki vuhlevadarodaŭ z Centralnaje Azii ŭ Eŭropu. Dziela hetaha Pucin vypraviŭsia ŭ biesprecedentnaje šaścidzionnaje turne pa Kazachstanie i Turkmenistanie (Ašhabad taksama maje atrymać svajo ŭ handli z Kramlom).
Siońnia ŭ Astanie hučała rytoryka, jakaja, peŭna, vyklikała ŭ Miensku prystupy intehracyjnaj reŭnaści. Pucin nazvaŭ Kazachstan stratehičnym partneram i padkreśliŭ, što družba zahartavanaja jašče vajennym lichalećciem. Natchniony Nazarbajeŭ, u svaju čarhu, nazvaŭ dvuchbakovyja stasunki ŭzoram dla ŭsioj postsavieckaj prastory.
Hałoŭnaje ž — ekanamičnyja bonusy. Rasieja paabiacała kazacham vyhadnyja ŭmovy prapampoŭki ichnaj nafty praz systemu Kaśpijskaha trubapravodnaha kansorcyjumu, zhadziłasia kuplać ichny haz u paŭtara razy daražej (pa 145 dalaraŭ zamiest sta za tysiaču kuboŭ), prapanavała vyhadnyja prajekty ŭ halinie atamnaj enerhietyki (u pryvatnaści, udzieł u pierapracoŭcy ŭranu, jakoha ŭ Kazachstanie da čorta).
Svaim vizytam Pucin prymusiŭ Nazarbajeva admovicca ad udziełu ŭ Krakaŭskim enerhietyčnym samicie, jaki adkryvajecca zaŭtra i budzie pryśviečany šlacham pastaŭki enerhanośbitaŭ u Eŭropu ŭ abychod Rasiei.
Darečy, Lech Kačyński nia pieršy, chto atrymaŭ ad Nazarbajeva siurpryz takoha kštałtu. Stanisłaŭ Šuškievič raspaviadaŭ mnie, što kazaskaha lidera čakali i ŭ Viskulach, kab razam "razvalić Sajuz". Ale toj sieŭ na paŭdarozie ŭ Maskvie i ŭsio nijak nia moh dazapravić samalot :-)
Što ž da ciapierašniaha biełaruskaha kiraŭnictva, to reč nia ŭ tym, što adabranaja palma pieršynstva ŭ intehracyjnaj rytorycy. Chalera ź joj, tut jakraz usio da lepšaha! Inšaja reč, što, jak nahadaŭ u etery "Svabody" Jury Drakachrust, "Biełaruś, pry ŭsich jaje sajuźnickich adnosinach z Rasiejaj, abjektyŭna zacikaŭlenaja ŭ pośpiechu prajektaŭ alternatyŭnych trubapravodaŭ. Varta pryhadać niadaŭni vizyt Alaksandra Łukašenki ŭ Azerbajdžan, dzie hetaja tema była adnoj z hałoŭnych. Darečy, Azerbajdžan biare ŭdzieł u enerhietyčnym samicie ŭ Krakavie".
Inačaj kažučy, abjektyŭna Biełaruś apynajecca ŭ adnoj łodcy z Eŭropaj, zacikaŭlenaj ŭ supraćdziejańni enerhietyčnamu dyktatu Kramla. Kali chočacie, heta vydatny histaryčny šaniec. Ale vyhladaje na toje, što jon stračvajecca. Bo sastupać Bruselu ŭ jahonych viadomych palityčnych patrabavańniach Miensk, miakka kažučy, nie śpiašajecca. Naadvarot, apošnim časam raz-poraz čujucca notki zalacańnia da Kramla.
Ź inšaha boku, praŭda, adbyvajucca vyciečki infarmacyi pra abmierkavańnie varyjantu vyzvaleńnia palitviaźniaŭ. Tutejšaje kiraŭnictva choča ŭsiedzieć na dvuch kresłach? Čym dalej, tym bolej pryvidnaja perspektyva.
