 |
Sioletni konkurs piaćdziesiat pieršy i prachodzić u stalicy Finlandyi, Chelsynkach. Biełaruski vykanaŭca Dźmitry Kałdun vyjšaŭ u finał i budzie vystupać tam u subotu pad trecim numaram.
21-hadovy Kałdun vykanaŭ pieśniu «Work Your Magic» na vieršy Karena Kavalerana i muzyku Filipa Kirkorava.
Kałdun vystupaŭ čaćviortym, paśla artystaŭ z Baŭharyi, što vystupali z elementami folku, supiarečlivaj hrupy ź Izrailu, jakaja vykanała pieśniu "Naciśni na huzik", u jakoj Iran ubačyŭ zaklik da bambiožki fundamentalistaŭ atamnymi bombami, i Kipru. Usiaho ŭ paŭfinale spaborničali 28 vykanaŭcaŭ. U finał prajšli pradstaŭniki 14 krainaŭ.
Upieršyniu ŭ konkursie ŭdzielničajuć Čechija, Hruzija, a taksama Serbija i Čarnahoryja paasobku. Raniej hetyja krainy žyli ŭ sajuzie.
Dźmitry Kałdun staŭ pieramožcam Nacyjanalnaha televizijnaha muzyčnaha prajektu «EŭraFest» pavodle vynikaŭ finalnaha hała-kancertu «Daroha na «Eŭrabačańnie».
U minułyja hady ŭdzielniki «Eŭrabačańnia» ad Biełarusi — duet «Alaksandra i Kanstancin», Anžalika Ahurbaš i Palina Smołava — u finał nie prabivalisia.
Pieśnia Kałduna ničym asablivym nie vyłučałasia. Praŭda, u biełaruskaha vykanaŭcy jość hołas i plastyka. U pradstaŭnikoŭ inšych krainaŭ najčaściej nie było ci taho, ci taho, a časam ni taho ni taho.
Varta adznačyć, što ŭ bolšaści eŭrapiejskich krainaŭ konkursu «Eŭravizii» nie nadajecca takoha značeńnia, jak u Biełarusi. Hetak. u Polščy jaho tranślacyju zvyčajna hladzić mienša za 2 % telehledačoŭ. Dyj papsa nie zajmaje takoha miesca ŭ žyćci, jak u Biełarusi, dzie nacyjanalnyja rok-vykanaŭcy zabaronienyja da tranślacyi pa hałoŭnych radyjokanałach.
Ličycca, što najbolšyja šancy na pieramohu sioleta maje humarnoje travesty z Ukrainy Vierka Siardziučka, a taksama Maryja Šaryfavič z Serbii, jakaja adkryta zajaŭlaje pra svaju nietradycyjnuju aryjentacyju. U paraŭnańni ź imi Dźmitry Kałdun, prateže Kirkorava, jašče niedastatkova zajaviŭ pra siabie.
Fota eurovision.tv
