U piatnicu ŭ Krakavie pačałasia sustreča prezydentaŭ Polščy, Litvy, Ukrainy, Hruzii i Azerbajdžanu. Prezydentaŭ Kazachstanu i Turkmenistanu na joj nia budzie — jany prymajuć u siabie Ŭładzimiera Pucina. Rasiejskaja presa tryjumfuje.
Nursułtan Nazarbajeŭ i Uładzimier Pucin abviaścili padčas učorašniaj sustrečy, što abiedźvie krainy buduć imknucca da dvuchbakovaha ekanamičnaha supracoŭnictva ŭ paliŭna‑enerhietyčnym sektary, atamnaj enerhietycy i ŭ halinie sučasnych technalohijaŭ.
‑ Kazachstan całkam padtrymlivaje toje, kab bolšaja častka, kali nia ŭsia nafta prachodziła mienavita praz terytoryju Rasiei. My zaŭždy pra heta kažam — skazaŭ Nazarbajeŭ. Jon nahadaŭ, što ŭ minułym hodzie jahonaja kraina pierasłała 52,3 młn. tonaŭ svajoj nafty, z čaho 42 młn. tonaŭ prajšli praz Rasieju.
Mahčyma, što Nazarbajeŭ i Pucin padpišuć dźvie damovy — pra stvareńnie asiarodku ŭzbahačeńnia ŭranu, a taksama pra adkryćcio handlovych pradstaŭnictvaŭ. Taksama nia vyklučana, što kiraŭniki abiedźviuch dziaržavaŭ razhledziać prajekt pavieličeńnia prapusknoj zdolnaści naftapravodu Atyrau — Samara.
Rasiejski prezydent mienavita z Kazachstanu raspačaŭ svajo dvuchtydniovaje padarožža pa Centralnaj Azii. Nastupnym budzie Turkmenistan. Ułady Kazachstanu i Turkmenistanu ličać, što Rasieja krychu złoŭžyvaje atrymanaj u spadčynu paśla SSSR manapolijaj na tranzyt nafty i hazu.
Adnak z nahody vizytu Pucina prezydenty abiedźviuch krainaŭ nia buduć udzielničać u enerhietyčnym samicie ŭ Polščy.
«Farmat 'antyrasiejskaha' samitu ŭ Polščy byŭ źmienieny. Z mocnaj 'piaciorki' jon pieraŭtvaryŭsia ŭ słabuju 'čaćviorku'. I budzie adbyvacca na fonie demanstratyŭnaj sustrečy kiraŭnika Rasiei ź liderami dźviuch dziaržavaŭ, na enerhietyčnuju syravinu jakich tak raźličvajuć eŭrapiejcy», — piša «Kommiersant'».
«Dla Rasiei budaŭnictva transkaśpijskaha hazapravodu budzie aznačać nia tolki stratu dachodaŭ z tranzytu, ale taksama i pasłableńnie pazycyi ŭ dyjalohu z Zachadam, jak i pazycyi ŭ Samoj Centralnaj Azii» — piša hazeta «Viedomosti». Na dumku hazety, kali Ŭładzimier Pucin pierakanaje prezydentaŭ Kazachstanu i Turkmenistanu razhledzieć alternatyŭnuju mahistral, to Maskva značna ŭzmacnić svaju hieapalityčnuju vahu ŭ rehijonie.
Kali, adnak, jana pierakanaje prezydenta Turkmenistanu realizavać nadkaśpijski prajekt, to heta budzie aznačać hieapalityčnaje źbližeńnie Maskvy i Ašchabadu.
«Viedomosti» dadajuć, što sumnieŭna, kab Zachad prapanavaŭ turkmenskamu prezydentu palityčnyja i ekanamičnyja harantyi, jakija jon atrymaje z boku Maskvy. Pamiž inšym heta stabilnaść pastavak praz svaju terytoryju — u adroźnieńnie ad niebiaśpiečnaha šlachu praz kaŭkazski rehijon.
