Kancepcyja enerhietyčnaj biaśpieki praduhledžvaje naładžvańnie pastavak nafty z alternatyŭnych krynicaŭ praz try hady ŭ abjomie 20 adsotkaŭ ad patreby. U časie sustrečy biełaruskaha pasła ŭ Litvie Ŭładzimiera Dražyna sa śpikieram litoŭskaha parlamentu Viktarasam Muncianasam viałosia pra mahčymaść transparciroŭki nafty praź litoŭskija terminały.
U. Dražyn raspavioŭ pra hatovaść biełaruskaha boku pačynajučy z nastupnaha hodu zavozić praź Litvu naftu z Venesueły dy Iranu. Abjom impartu — da 7 młn tonaŭ nafty štohod. Premjer‑ministar Litvy Hiedyminas Kirkiłas u suviazi z hetym paviedamiŭ, što litoŭski bok hatovy padtrymać hety prajekt pry ŭmovie atrymańnia aficyjnaj prapanovy z boku biełaruskaha ŭradu. Umovaj dalejšaha raźvićcia supracoŭnictva ŭ hetym nakirunku, pa słovach H. Kirkiłasa, jość taksama pašyreńnie mahutnaśćjaŭ terminału ŭ Bucinhe.
Pavodle aficyjnaj Litvy, realizacyja prajektu pa pastaŭkach nafty praź litoŭskija terminały najpierš zaležyć ad zacikaŭlenaści Biełarusi ŭ doŭhaterminovym supracoŭnictvie. Niesakret, što vyrašeńnie hetaha pytańnia patrabuje istotnych investycyjaŭ z boku litoŭskich kampanijaŭ u infrastrukturu Kłajpedzkaha portu i terminału ŭ Bucinhe. Adnak z boku aficyjnaha Miensku pakul nie pastupała nijakich prapanovaŭ. Uskosna heta možna patłumačyć časovaj niapeŭnaściu na litoŭskim naftavym rynku: polski kancern RKN Oplen, uładalnik Mazejkiu nafta, maje svaje investycyjnyja plany ŭ Litvie. U tym liku kiraŭnictva kancernu viadzie pieramovy ź litoŭskim uradam ab nabyćci kantrolnaha pakietu akcyjaŭ terminału Klaipedos nafta. Vierajemna biełaruskija ŭradoŭcy čakajuć vynikaŭ pieramovaŭ, kab vyrašać pytańnie z kankretnym uładalnikam terminałaŭ. Tady, mahčyma, i stanie zrazumiełym sapraŭdny sens zajavaŭ pra alternatyŭnyja šlachi pastavak nafty.
Čakaje prapanovaŭ ź Biełarusi i Łatvija. Pieršy vice‑premjer Uładzimier Siamaška jašče ŭ studzieni ahučyŭ varyjant pastavak nafty na navapołacki «Naftan» praz terminał u Ventśpiłsie. Nibyta ŭžo j papiarednija pieramovy z kampanijaj Vitol (suŭładalnicaj chołdynhu Ventspils nafta) praviali. Prajekt acanili ŭ $15‑30 młn, i jon musiŭ realizavacca za 2,5 hady. Takaja nierašučaść biełaruskaha boku, na dumku ekspertaŭ, moža śviedčyć pra adsutnaść vyraznaha bačańnia perspektyvaŭ raźvićcia ŭłasnaj naftapierapracoŭki, i, adpaviedna, tranzytu nafty.
Tym nie mienš, reziumuje «BR», litoŭskija i łatyskija terminały pakul zastajucca ci nie adzinymi alternatyŭnymi Rasiei šlachami pastavak nafty adkul by to nie było.
Siamion Piečanko, pavodle «Biełorusy i rynok»
