U aŭtorak uviečary ŭ Londanie lider biełaruskaj apazycyi Alaksandar Milinkievič zajaviŭ, što nie źbirajecca vyłučać svaju kandydaturu na pasadu adnaho z sustaršyniaŭ demakratyčnaj kaalicyi. Milinkievič zastajecca viernym svaim raniejšym pierakanańniam, što apazycyi nieabchodny adziny lider. «Budzie krok nazad», ‑‑ skazaŭ Milinkievič u interviju radyjo «Svaboda».
Razam z tym Milinkievič paviedamiŭ, što nia budzie ihnaravać Kanhres, jaki projdzie 26‑27 traŭnia, mahčyma, što ŭ pałacy kultury mienskaha aŭtazavodu. Palityk źbirajecca vystupić na im z dakładam, dzie ahučyć svoj punkt pohladu na biahučuju sytuacyju.
Ad paniadziełka Alaksandar Milinkievič znachodziŭsia pa zaprašeńni MZS Vialikaj Brytanii ź vizytam u Londanie. Tam jon pravioŭ sustrečy ŭ brytanskim parlamencie, z kiraŭnikom Kamisii pa zamiežnych spravach kirujučaj lejbarysckaj partyi Erykam Džojsam, jakomu prapanavaŭ pradstaŭlać intaresy biełaruskaj apazycyi ŭ Vialikaj Brytanii, pravaabaroncami z arhanizacyjaj «ARTICLE 19» i «Amnesty International», jakija zmahajucca za vyzvaleńnie biełaruskich palitviaźniaŭ i svabodu ŚMI ŭ Biełarusi, a taksama pradstaŭnikami kanservatyŭnaj i lejbarysckaj partyjaŭ.
Hałoŭnymi temami pieramovaŭ stali: stanovišča biełaruskich ŚMI, novyja akcyi ŭ abaronu palitviaźniaŭ i ŭ padtrymku niezaležnaści Biełarusi, prahramy padtrymki biełaruskaj moładzi, pracaŭładkavańnie zvolnienych pa palityčnych matyvach.
