Adzin z abvinavačanych u spravie «Maładoha frontu» Alaksiej Janušeŭski zdoleŭ vyjechać ź Biełarusi. Heta adbyłosia jašče 24 krasavika. Jechaŭ praz Rasieju, Ukrainu, Polšču. Prykładna tym samym šlacham, jak Aleś Kazakoŭ i Źmicier Zubro.
Ciapier Alaksiej žyvie ŭ Prazie ŭ baćki, jaki tam pracuje. Praŭda, užo najbližejšym časam daviadziecca pierasialicca ŭ internat dla ŭciekačoŭ — heta nieabchodnaja ŭmova, kab atrymać u Čechii prytułak. U vypadku, kali jaho sprava ŭ Biełarusi skončycca štrafam ci ŭmoŭnym pakarańniem Janušeŭski źbirajecca viarnucca na Radzimu.
Alaksiej kaža, što rašeńnie pra ŭcioki davałasia dosyć ciažka, chacia i z razumieńniem, što inšaha vyjścia niama. «Źjechaŭ nie praź siabie, ja nie źbirajusia apraŭdvacca, źjechaŭ praz «Małady front». Bo ŭ turmie ja rabić toje, što ja rablu tut, nia mieŭ by mahčymaści. Chacia, kali b mnie, naprykład, skazali, što budzie dakładna pałova hodu, ja b zastaŭsia. Zaraz sprava idzie, uratavać arhanizacyju, tamu j źjechaŭ. Funkcyi, jakija ja vykonvaŭ u Biełarusi, całkam vykonvaju i tut», ‑‑ kaža Janušeŭski.
Nahadajem, što 30 traŭnia ŭ Savieckim sudzie Miensku pačniecca praces «maładafrontaŭcaŭ». Źmitra Chviedaruka, Barysa Hareckaha, Nastu Pałažanku, Aleha Korban i Alaksieja Janušeŭskaha abvinavačvajuć u parušeńni 193‑ha artykułu kryminalnaha kodeksu «Dziejnaść ad imia niezarehistravanaj arhanizacyi». Užo dakładna viadoma, što Janušeŭskaha na sudzie nia budzie.
***
Alaksiej Janušeŭski naradziŭsia 29 traŭnia 1987 hodu ŭ Miensku. Skončyŭ siaredniuju škołu № 200 (2005). Vučyŭsia ŭ Biełaruskim dziaržaŭnym pedahahičnym universytecie imia Maksima Tanka na biełaruskaj filalohii.
Napačatku 2006 hodu Alaksieja vyklučyli adtul za palityčnuju dziejnaść. Letaś ža pastupiŭ u Vilenski pedahahičny ŭniversytet. Dałučyŭsia da "Maładoha frontu" ŭ 2004 h. U pačatku 2006 hodu prachodziŭ jak padazravany ŭ kryminalnaj spravie ŭ dačynieńni da siabry MF Artura Fińkieviča. Pravioŭ niekalki dzion u izalatary časovaha ŭtrymańnia. Adnak tady sprava suprać Janušeŭskaha była spynienaja.
Cikavicca ŭeb-dyzajnam, prahramavańniem, historyjaj.
Hreka-katalik.
Fatazdymak Julii Daraškievič
