"Vaš vielmi aperatyŭny pryjezd u Biełaruś u chutkim časie paśla majho vizytu ŭ Iran śviedčyć ab tym, što ŭ nas ustalavalisia dačynieńni stratehičnaha partnerstva". Voś taki sylahizm prahučaŭ siońnia z vusnaŭ biełaruskaha aficyjnaha kiraŭnika na sustrečy ź iranskim kaleham.
"Stratehičnaje partnerstva" ź Iranam miž tym vymiarajecca bolej čym ścipłaj ličbaj 35,5 miljonu dalaraŭ — taki byŭ letašni tavarazvarot. Dziela paraŭnańnia: biełaruski handal ź Niamieččynaj letaś dasiahnuŭ $2,423 miljardu. Heta ŭ 68 razoŭ bolej. Vo dzie de-fakta absiah našych stratehičnych intaresaŭ! Ale ž čortava Eŭropa tyckaje pravami čałavieka! A voś siabar Achmadynežad u hetym sensie biez pretenzijaŭ.
Siońnia vysoki hość zajaviŭ, što ličyć Łukašenku adnym z najlepšych siabroŭ i što stasunki miž dźviuma krainami majuć "vialiki patencyjał na doŭhaterminovuju perspektyvu".
Tam, dzie zašmat rytoryki, zvyčajna brakuje realnaha plonu. Voś i siońnia padpisanyja pieravažna deklaracyjnyja abo ramkavyja dvuchbakovyja dakumenty. Miž tym Eŭropa sapraŭdy mahła b dać nam kredyty, investycyi, najnoŭšyja technalohii. Ale hetyja bonusy mahčymyja tolki ŭ abmien na pastupovaje vykanańnie letašnich 12 umovaŭ. Nam heta nie pad nos! U vyniku Miensk vybiraje iranskuju technalahičnuju "asiatrynu druhoj śviežaści" kštałtu zborki "Samandaŭ" — kopii daloka nie apošniaj madeli "Pežo". Navat Łukašenkaŭ małodšy syn acaniŭ "Samandy" biez zališniaj palitkarektnaści: "Heta dychtoŭnaja VAZaŭskaja "dziaviatka". Cana 12 500 dalaraŭ mnie padajecca zavyšanaj. Spadziajusia, jašče dapracujuć".
Jak skazać... Admysłoŭcy śćviardžajuć, što prajekt zborki ŭ nas "Samandaŭ" faktyčna ŭžo lasnuŭsia. "Skakun" (tak pierakładajecca z farsi "Samand") złamaŭ nahu na samym starcie. Uvohule, kab aŭtazborka była rentabelnaj, treba rabić sto tysiačaŭ lehkavikoŭ za hod. U našaj ža krainie ŭvieś rynak novych aŭto skłaŭ letaś dziesiać tysiačaŭ.
"Iran i Biełaruś — nia tyja krainy, jakija mohuć dapamahčy adna adnoj realna", — tolki što zaznačyŭ u razmovie sa mnoj palitolah Andrej Fiodaraŭ. Na jahonuju dumku, tearetyčna sfery supracy jość. Ale ŭsio heta ciažka ŭvasobić u žyćciazdolnyja prajekty. Bo, naprykład, naftazdabyča ŭ Iranie vymahaje šmatmiljonnych układańniaŭ. "Ź inšaha boku, mała chto viedaje, što ŭ Iranie — limit na benzyn, — kaža Fiodaraŭ. — Nie staje mahutnaściaŭ naftapierapracoŭki! Ale Biełaruś i ŭłasnyja NPZ musić madernizavać z zamiežnaj dapamohaj, tak što dapamahčy Tehieranu raźvivać hetuju halinu nam naŭrad ci pad siłu".
Tak što, reziumuje ekspert, u suchoj astačy ad takich vizytaŭ zastajecca pijar dla ŭnutranaha spažyvańnia.
Karaciej, šarahovym persam i biełarusam davodziać, što bajki pra mižnarodnuju izalacyju — heta vydumki "vialikaha djabła". Tak Achmadynežad nazyvaje Ameryku ŭ svaim internet-dziońniku :-)
Fota z błohu M.Achmadynežada.
