Da hramadzianskaj kampanii «Vyratujem Horadniu» dałučajucca biełaruskija i zamiežnyja mastaki. U niadzielu 10 červienia ŭ Horadni adbudziecca adkryty mastacki płener‑akcyja «Mastaki suprać razbureńnia Harodni». Zhodu ŭziać udzieł u płenery ŭžo vykazali bolš za 20 ajčynnych mastakoŭ, siarod jakich Aleś Puškin, Alaksiej Maračkin, Michał Aniempadystaŭ. Mastaki pakinuć na pałotnach vyjavy Staroha horadu, histaryčnyja budynki, jakija haradzienskija ŭłady vyznačyli pad znos.
Mienski mastak Michał Aniempadystaŭ, kamentujučy NN svoj udzieł u płenery, zaznačyŭ, što daŭno ŭžo źbiraŭsia ŭ Horadniu. «Chočacca kali nie zafiksavać u vyhladzie malunku stary horad, to choć pabačyć na svaje vočy, što jašče zastałosia, pakul nie zrujnavali».
Aleś Puškin, mastak ź vioski Bobr, planuje nia tolki malavać, ale j zładzić perfomans. «Malavać ja budu ŭdzień, a kali ściamnieje, zładžu nievialiki perfomans. Nazyvacca jon budzie «Zachavańnie». Scenar nastupny: mastak u siaredniaviečnym stroi pobač sa ścianoju, na jakuju padajecca śviatło, robić šamanskija ruchi. Zatym zachoŭvaje ŭ ziamli kamień, abo askiepak, ci kapsułu. Chutčej za ŭsio pryviazu z Babra askiepak hierbu. Heta budzie symbalizavać zachavańnie dla budučych pakaleńniaŭ enerhietyki Staroj Horadni. U ideale ŭsio adbudziecca pad śpievy Viktara Šałkieviča». Naša siła, reziumuje sp. Puškin, u tym, što tvorčyja ludzi abjadnalisia dziela takoj vartaj spravy.
Mienski mastak Alaksiej Maračkin ličyć, što takim čynam mastaki padtrymajuć u pieršuju čarhu moładź, što baronić staraśvieččynu Horadni. «Svoj pratest vykažam mastackimi srodkami», — zaznačaje sp. Maračkin. Na jaho dumku, farmat klasyčnaha mastackaha płeneru nie zusim adpaviadaje zaplanavanaj akcyi ŭ Horadni: «My budziem pracavać adzin dzień, a nie 3‑4, ale heta ž budzie j niezvyčajny płener». Mastak pryhadvaje historyju, što zdaryłasia ź im u Hurzufie ŭ 70‑ia hady. Jon malavaŭ staryja vułki, što vielmi zachapili jaho svajoj niepaŭtornaściu. Minak zrabiŭ jamu zaŭvahu, maŭlaŭ, što vy hetuju staryznu malujecie, daŭno ŭžo jaje treba było zrujnavać. Na pytańnie, čamu ž dahetul nie zrujnavali, mieścič adkazaŭ: «U 20‑ia hady tut viadomyja rasiejskija mastaki malavali, to paśla hetyja krajavidy stali historyjaj i ich nie dajuć čapać». Alaksiej Maračkin upeŭnieny, što kali b nie Napaleon Orda dy Jazep Drazdovič, sučasnyja biełarusy šmat by čaho nie pabačyli ź histaryčnych pomnikaŭ. «Kali b našyja ŭłady tak šanavali mastakoŭ, prysłuchoŭvalisia da mierkavańnia intelihiencyi, usio było b inakš» — miarkuje mastak.
