Alaksandar Łukašuk, radyjo «Svaboda»: Jon byŭ samym maładym supracoŭnikam Biełaruskaj słužby Radyjo Svaboda, kali pačaŭ pracavać veb‑redaktaram u 2004 hodzie. Za try dni da svajho 30‑hodździa, u soniečny dzień 15 červienia 2006‑ha Ŭładzia i jaho žonka Janada, vierahodna, adzinaja hramadzianka Albanii ź biezdakornaj biełaruskaj movaj, patrapili ŭ aŭtamabilnuju katastrofu ŭ centry Prahi. Žonka straciła nahu, Uładzia z taho času znachodziŭsia ŭ hłybokaj komie. 25 traŭnia ŭnačy, paśla amal hodu baraćby za jaho žyćcio, baćkoŭskaj štodzionnaj šmathadzinnaj vachty la jaho, Uładzia pamior.
Jon byŭ bliskučy veb‑majstar, błohier, entuzijast biełaruskaha Internetu. Heta Ŭładzia damohsia, kab samy viadomy ŭ śviecie pošukavik Google zapracavaŭ i pa‑biełarusku.
Hałoŭny plon pracy Ŭładzi — sajt svaboda.org, jaki siońnia źjaŭlajecca samym papularnym sajtam na biełaruskaj movie ŭ śviecie, najlepšym z dvuch dziasiatkaŭ sajtaŭ Radyjo Svaboda/Radyjo Svabodnaja Eŭropa pavodle statystyki.
Jaho niki rydel23 i BR23 dobra viadomyja ŭ Internet supolnaści ŭ Biełarusi, a taksama siarod anhłamoŭnych karystalnikaŭ, jakija cikaviacca Biełaruśsiu. Uładzimier Katkoŭski letaś atrymaŭ Hran‑Pry 4‑ha konkursu biełaruskich kantent‑prajektaŭ, jaki pravodziŭ partał TUT.BY — pieršym miescam byli adznačanyja jahony błoh i sajt http://www.br23.net/be/2006/03/31/tut_by_contest_/
Uładzimier uviedaŭ pra ŭznaharodu, ale nie paśpieŭ atrymać jaje.
Vidać, možna było b napisać, što Ŭładzia byŭ biełaruskim nacyjanalistam, nastolki apantana jon zajmaŭsia ŭlubionaj spravaj, nia ličačy hadziny, vychodnyja dni, volny čas, hetak ščyra žyŭ usimi biełaruskimi spravami. Hetaksama pravilna nazvać Uładziu sučasnym eŭrapiejcam, jaki paśla zakančeńnia liceju pry BDU dva hady vyvučaŭ fizyku va ŭniversytecie, paśla hod vučyŭsia ŭ Amerycy, zatym vyvučaŭ prahramavańnie i žurnalistyku ŭ Amerykanskim universitecie ŭ Błahojeŭhradzie (Baŭharyja), dzie sustreŭ svaju budučuju žonku Janadu Rapo, jakaja ciapier pa‑biełarusku havoryć jak na rodnaj albanskaj. Paśla zakančeńnia pracavaŭ u Budapešcie, Frankfurcie‑na‑Majnie, Prazie. Z takimi, jak Uładzia, źviazanaja budučynia svabodnaj Biełarusi ŭ Eŭropie.
Apošni hod Uładzia lažaŭ u komie ŭ adnym z špitaloŭ Prahi, i zaŭsiody pobač ź im byli baćki, Iryna i Leanid, mužnyja i hłyboka intelihientnyja ludzi, etalon pavodzinaŭ u takoj trahičnaj sytuacyi.
Narodny paet Biełarusi Ryhor Baradulin pryśviaciŭ byŭ Uładziu takija radki:
Katkoŭski — rupny web‑mastak,
Umieje zrušana, niazmušana
Sajt pa‑kryvicku ŭbačyć tak,
Što sajt rašuča źbiełarušvaje
Ŭsich praz dapytny internet,
Kamu balić kryvicki śviet.
Siońnia balić usim siabram Uładzi.
* * *
Adam Hlobus na śmierć Uładzia Katkoŭskaha
2007. Katkoŭski (1976-2007) i travień
Maje ŭzajemaadnosiny z Uładzimiram Katkoŭskim vychodzili za miežy budzionaj realnaści. Anioł śmierci nieadnojčy pralataŭ pamiž nami mienavita viasnoju. 20 traŭnia na rachunu za kavu va ŭniviersamie “Centralny”, što ŭ Miensku, ja napisaŭ čarnavik vierša. Peŭna, jon składaŭsia i dla Uładzimira…
Śmierć u traŭni
Dažyć ty zmožaš tolki da viasny,
I bolš ničoha, sapraŭdy, ničoha…
Niadoŭhaja, nažal, tvaja daroha.
Karotkaja, jak ranišnija sny.
Chacieŭ by da nastupnaje viasny
Spaznać pabolej słodyčy i bolu,
Chacieŭ by šmat svabody, prahi, voli…
Dy čas pryjšoŭ tabie niaradasny.
Bez pad daždžami budzie krasavać,
I rassypać karunkavuju kviecień,
Viasna-krasna bujaćmie pa ŭsim śviecie,
A ty zaśnieš i budzieš miortva spać.
P. S.
25 traŭnia Vałodzia pakinuŭ naš śviet. Amal hod jon prabyŭ u komie, paśla darožnaj avaryi, što zdaryłasia ŭ Prazie. Śmierć nie viedaje litaści. Zastajecca adno spačuvać siabram i rodnym Uładzi Katkoŭskaha.
* * *
Piša Vital Silicki:
Ja nikoli nie viedaŭ Uładziu asabista. Heta jon pačaŭ Pozirk, tady jašče TOL blog, hod tamu. U červieni, Uładzia trapiŭ u žudasnuju avaryju ŭ Prazie. Jaho žonka vyžyła, straciŭšy nahu. Daj boh nam usim zrabić dla Biełaruščyny stolki, kolki zrabiŭ Uładzia za svaje 30 hod, kali jon bačyŭ śviet. Astatniaje skazaŭ Aleś Łukašuk.
Śvietłaja pamiać!
Vital Silicki
