Abvinavaŭca zapatrabavaŭ pakarać Chviedaruka, Hareckaha, Korbana, Janušeŭskaha štrafam u 500 bazavych vieličyniaŭ. Nastu Pałažanku -- vychavaŭčymi pracami. Pryčyna — MF nie ŭjaŭlaje saboj značnaje niebiaśpieki.
Z samaje ranicy la budynku sudu Savieckaha r‑nu Mienska (Łahojski trakt, 3) dziažuryli ludzi ŭ cyvilnym z racyjami. Jany nikoha nie puskali da budynku, dzie a 10‑j pavinien byŭ pačacca sud. Ludzi ŭ cyvilnym mieli zahad puskać tolki tych, chto maje pozvy. Žurnalisty pozvaŭ nia mieli. Kali Źmicier Chviedaruk zapatrabavaŭ, kab ludzi ŭ cyvilnym pakazali dakumenty -- adzin ź ich prademanstravaŭ paśviedčańnie bajca PMSP. Sproby pierakanać, što sud adkryty i na im moža prysutničać kožny achvotny, plonu nie dali.
Urešcie damoŭlenaść była dasiahnuta, i milicyjanty dazvolili, kab u zalu ŭvajšli rodnyja, pradstaŭniki dypmisijaŭ, palityki i žurnalisty. U zalu sudu prajšli Alaksandar Milinkievič, Ina Kulej, Stanisłaŭ Šuškievič, Valer Ščukin, Okie Petersan, Karen Stjuart, Hary Pahaniajła dy inš.
Źmicier Chviedaruk, Aleh Korban, Alaksiej Janušeŭski i Barys Harecki ŭ 10:40 zaniali miesca na łavie padsudnych. Praź dziesiać chvilin sudździa Rusłan Aniskievič raspačaŭ praces.
Prykładna ŭ hety čas pad voknami moładź pačała skandavać «Svabodu palitviaźniem», «Žyvie Biełaruś!», «Hańba», «Moładź za Biełaruś», «Za svabodu». Hałasy byli dobra čuvać u zali pasiedžańnia. Heta nervavała sudździu i dziaržabvinavaŭcu. Sp.Aniskievič navat niejak zaznačyŭ: «Ja prašu zachoŭvać cišyniu, ci vam niedastatkova razmovaŭ, jakija viaducca na vulicy?». Ludzi ž pad voknami vykonvali «Mahutny Boža», «Pavietrany šar», «Try čarapachi». Paźniej Pavał Sieviaryniec skazaŭ, što prysutnych kala sudu pieraličyŭ: było 372 čałavieki.
Napačatku sudździa skazaŭ: «Ja viedaju, što ŭsie vy pasłuhoŭvajeciesia biełaruskaj movaj, ci patrebien vam pierakładčyk»? Usie, aproč Hareckaha, zapatrabavali pierakładčyka. Paśla sudździa pastaviŭ pytańnie: ci mahčymy razhlad spravy Alaksieja Janušeŭskaha bieź jahonaj prysutnaści ŭ zali? Adkaz byŭ stanoŭčy.
Paśla hetaha ŭ «maładafrontaŭcaŭ» pačali brać pakazańni. Prakurora Michonskuju cikaviła, ci prymali jany ŭdzieł u schodach MF, ci treba zajava, kab ustupić u arhanizacyju, jakija mety ŭ «Maładoha frontu», kolkasny skład, chto kiraŭnik, chto za što ŭ MF adkazvaje, ci patrebnyja siabroŭskija ŭnioski, ci viedali što siabry arhanizacyi, što jana niezarehistravanaja. Na bolšaść pytańniaŭ abvinavačanyja adkazvać admaŭlalisia.
Abvinavačvańnie hruntavałasia na kanfiskavanych padčas pieratrusaŭ na kvaterach «maładafrontaŭcaŭ» drukavanych materyjałach, a taksama na razdrukoŭkach telefonnych razmovaŭ i aŭdyjozapisie schodaŭ 29 vieraśnia 2006 h., 25‑ha, 29 studzienia, 1, 4 lutaha 2007 hodu. Z.Chviedaruka, abvinavačvali ŭ tym, što jon kiravaŭ Pieršamajskaj radaj MF, A. Korbana — Partyzanskaj, A. Janušeŭskaha — Zavodzkaj. B. Hareckaha — u tym, što jon byŭ pres‑sakratarom arhanizacyi, Nastu Pałažanku, što jana ačolvała arhanizacyjny adździeł MF.
Metaj ža dziejnaści «Maładoha frontu», na dumku abvinavačvańnia, jość zachop biełaruskaj ułady šlacham masavych vuličnych akcyjaŭ.
Aleh Korban zajaviŭ, što jon užo nie źjaŭlajecca siabram arhanizacyi — kali ŭstupiŭ u siłu artykuł 193, jon napisaŭ zajavu ab vychadzie z MF. Aleh Korban zajaviŭ, što źjaŭlajecca staršynioj Partyzanskaj rady AHP.
Byli zasłuchanyja pakazańni śviedkaŭ. Na sud źjaviłasia ŭsiaho siamiora ź 19 vyklikanych. Avacyi prysutnych sarvaŭ 13‑hadovy Mikita Broŭka, jaki adrazu admoviŭsia davać jakija‑niebudź pakazańni.
Paśla taho, jak byli vysłuchanyja śviedki, pa chadajnictvie Z.Chviedaruka, sud abvieściŭ pierapynak na abied. Na hanku sudu sa słovam vystupiŭ A.Milinkievič, jaki skazaŭ, što ŭ znak salidarnaści ŭstupaje ŭ Małady Front i zaklikaŭ usich prysutnych zrabić toje ž samaje.
Paśla pierapynku sudździa Aniskievič pryznaŭ, što razhlad aŭdyjozapisaŭ schodaŭ niemahčymy, bo na ich nie było adpaviednych sankcyj i ekspertyzy. Advakaty adrazu ž padali chadajnictva ab spynieńni spravy, adnak sudździa skazaŭ, što pakul niemahčyma razhladać hetaje chadajnictva.
Byli začytanyja pakazańni troch śviedkaŭ, jakija nie zmahli źjavicca na sud. Byli začytanyja śviedčańni byłoha namieśnika P. Sieviarynca Sieržuka Lisičonka, u jakich było napisana, što jon «syšoŭ z Maładoha Frontu, bo nie chacieŭ bolš zajmacca fantomnymi hłupstvami».
Dalej pačalisia sudovyja sprečki. Advakaty abvinavačanych nastojvali na tym, kab sprečki prachodzili zaŭtra, ale sudździa adchiliŭ hetuju prapanovu. Padałosia, što jon choča skončyć praces za adzin dzień.
Urešcie, prakuror Michonskaja ŭ suviazi z tym, što «Małady front» nie ŭjaŭlaje saboj vialikaj niebiaśpieki hramadztvu», zapatrabavała aštrafavać Chviedaruka, Hareckaha, Janušeŭskaha i Korbana na 500 bazavych vieličyń (7 200 dalaraŭ). Dla Nasty Pałažanki jak niepaŭnaletniaj vykarastać «prymusovyja miery vychavaŭčaha charaktaru». Zala z palohkaj uzdychnuła.
U apošnim słovie Źmicier Chviedaruk skazaŭ, što ŭ hety momant da spravy «Maładoha frontu» prykavanaja cikavaść usiaho śvietu, tamu zalikaŭ sudździu jašče raz padumać pierad tym, jak vynosić prysud.
Amal usie byli pierakananyja, što praces skončycca ŭ adzin dzień, i sudździa začytaje prysud užo ŭ paniadziełak, adnak u spravie byŭ abvieščany pierapynak. Na hanku sudu junakoŭ sustrakali jak sapraŭdnych hierojaŭ.
Prysudy abjaviać zaŭtra a 15:00.
***
Z ranicy na sajcie "NN" vioŭsia onłajn z zały suda.
17.25 Sudovy paniadziełak skončany. Vystupili advakaty, jakija zaklikali apraŭdać abvinavačanych. Vystupili Z. Chviedaruk, A. Korban, N. Pałažanka, B. Harecki.
Sudździa zajaviŭ, što prysud budzie abvieščany zaŭtra ŭ aŭtorak, a 15-j hadzinie.
Maładafrontaŭcaŭ sustrakajuć jak hierojaŭ na hanku sudu.
16.38
Abvinavaŭca Michonskaja patrabuje pakarać Chviedaruka, Hareckaha, Korbana, Janušeŭskaha štrafam u 500 bazavych vieličyniaŭ (15 młn 500 tys. rubloŭ, abo 7 225 dalaraŭ kožnamu. Nastu Pałažanku -- vychavaŭčymi pracami. Pryčyna -- MF nie ŭjaŭlaje saboj značnaje niebiaśpieki.
Pačali vystupać advakaty.
16.26 Pačalisia sudovyja sprečki. Vystupaje dziaržabvinavaŭca.
16.01 A 16-j pačali začytvać pakazańni troch śviedkaŭ, jakija nie pryjšli na sud. Nia vyklučana, što prysud budzie vyniesieny ŭžo siońnia
15.55 Advakaty padali chadajnictva ab spynieńni spravy, adnak sudździa skazaŭ, što pakul niemahčyma razhladać hetaje chadajnictva.
15.19 Prachodzić razhlad materyjałaŭ spravy junakoŭ. Sudździa pryznaŭ, što razhlad aŭdyjozapisaŭ schodaŭ niemahčymy, bo nie było adpaviednych sankcyj i ekspertyzy.
14.33 Sudovaje pasiedžańnie praciahvajecca.
14.05
Dziaržaŭny abvinavaŭca zajaviła padčas vystupu, što "Małady front" choča ŭziać palityčnuju ŭładu ŭ krainie šlacham masavych vuličnych akcyj. Dokazam hetaha jość razdrukoŭki telefonnych razmovaŭ, a taksama aŭdyjozapisy schodaŭ MF, što adbylisia 29 vieraśnia 2006 h., 25 studzienia, 29 studzienia, 1 lutaha, 4 lutaha 2007 h.
Źmitra Chviedaruka, u pryvatnaści abvinavačvajuć, u tym, što jon kiravaŭ Pieršamajskaj radaj MF, A. Korbana - Partyzanskaj, A. Janušeŭskaha - Zavodzkaj. B. Hareckaha ŭ tym, što jon byŭ pres-sakratarom arhanizacyi, Nastu Pałažanku ŭ tym, što jana ačolvała arhanizacyjny adździeł. Aleh Korban zajaviŭ, što jon užo nie źjaŭlajecca siabram MF, što kali ŭstupiŭ usiłu art. 193, jon napisaŭ zajavu ab vychadzie z MF. Aleh Korban zajaviŭ, što źjaŭlajecca staršynioj Partyzanskaj rady Abjadnanaj hramadzianskaj partyi.
Usie abvinavačvańni hruntujucca na kanfiskavanych padčas drukavanych materyjałach abo skanfiskavanych nośbitach infarmacyi, u pryvatnaści systemnych blokach i vinčestarach.
Maładafrontaŭcam zadavali pytańni: ci prymali jany ŭdzieł u schodach u tych dniach, razdrukoŭki razmovaŭ ź jakich prykładajucca, ci treba zajava, kab ustupić u MF, jakija mety arhanizacyi, kolkasny skład, chto kiraŭnik, chto za što ŭ MF adkazvaje, ci patrebnyja siabroŭskija ŭnioski, ci viedali što siabry arhanizacyi, što jana niezarehistravanaja.
Z 19 śviedkaŭ źjavilisia 7. 13-cihadovy Mikita Broŭka admoviŭsia davać śviedčańni, zajaviŭšy, što nia budzie rabić heta u adsutnaść baćkoŭ
Davali pakazańni Uładzimier Siarhiejeŭ, Kiryła Šymanovič, Jahor Babroŭ, Alaksiej Babicki dy inš.
U sudzie dobra čuvać usio, što adbyvajecca na vulicy. Pieśni, što śpiavajuć ludzi na vulicy, padbadziorvajučyja słohany i h.d.
Navat suddździa zajaviŭ, kali pačuŭ razmovy ŭ zali, što "ŭ zali pavinna być cišynia, chopić taho, što tut čuvać, što adbyvajecca na vulicy"
13:30 . Milinkievič kala sudu padpisaŭ symbaličnuju zajavu na ŭstupleńnie ŭ Małady Front i zaklikaŭ usich prysutnych zrabić toje samaje.
13:25 . Chviedaruk zajaviŭ chadajnictva ab pierapynku na abied. Sud pierapynieny da 14.15. Z 19 śviedkaŭ, jakija musili źjavicca siońnia, pryjšli tolki 7. Jany ŭ bolšaści admaŭlalisia davać pakazańni.
13:10 . U zali sudu słaba čuvać sudździa i śviedki. Ich zahłušajuć pratestoŭcy, jakija skandujuć łozunhi ŭ padtrymku maładafrontaŭcaŭ. Na mnohich ludziach, što sabralisia kala sudu, nadzietyja majki z nadpisami "Ja maładafrontaviec", "Ja kiraŭnik niezarehistravanaj arhanizacyi", "Ja Małady Front".
13:08 . Pavał Sieviaryniec pravioŭ "pierapis" udzielnikaŭ stychijnaha mitynhu kala sudu. Naličyłasia na hety momant 372 asoby.
13:05 . Havoryć Alaksiej Janukievič, namieśnik staršyni Partyi BNF: "Praces niezakonny, haniebny i navat antyhumanistyčny. Dzikaść, kali moładź sudziać nie za złačynstva i nie za akcyi, a prosta za naležnaść da demakratyčnaj arhanizacyi. Dziejańni sudździ, śledčych, prakuratury nia majuć apraŭdańnia". U časie kali Alaksiej heta paviedamlaŭ, cichary sprabavali schapić junaka ź bieł-čyrvona-biełym ściaham, ale moładź jaho adbiła.
13:00 . Specnazaŭcy i cichary ŭ cyvilnym sprabujuć zapałochać ludziej, jakija sabralisia. Była sproba vyrvać z ruk u moładzi adnu z raściažak. Razam z moładździu ŭ prateście ŭdzielničajuć Viačasłaŭ Siŭčyk, Alaksiej Janukievič.
12:55 . U sudzie praciahvajecca dopyt śviedkaŭ. Jany ŭ bolšaści admaŭlajucca davać pakazańni.
12:00 . Kala čatyrochsot čałaviek na čale z Paŭłam Sieviaryncam biaruć udzieł u akcyi salidarnaści la Savieckaha sudu. La budynku žančyny pastavili stolik i kresły, razdajuć ludziam vadu.
11:15 U pracesie abjaŭleny pierapynak. Sudździa Aniskievič razhladaje mahčymaść razhladu spravy A. Janušeŭskaha ŭ jahonuju adsutnaść. Astatnija abvinavačanyja, advakat Janušeŭskaha i dziaržaŭny abvinavaŭca nia suprać. Taksama sudździa spytaŭsia ŭ abvinavačanych, ci patrabujuć jany pierakładčyka. Usie, akramia Hareckaha, paprasili pierakładčyka. Taksama abvinavačanym byli zadadzienyja niekatoryja farmalnyja pytańni.
11:00 Kala sta piacidziesiaci čałaviek biaruć udzieł u akcyi salidarnaści z maładafrontaŭcami kala sudu na Łahojskim trakcie. Sud acepleny specnazaŭcami.
10:54 Pad vokličy z vulicy «Svabodu palitviaźniam» raspačaŭsia praces piaci maładafrontaŭcaŭ.
10:50 Sud jašče nie pačaŭsia. U zalu zapuścili kala 50 čałaviek. U pamiaškańni čuvać z vulicy vokličy padtrymki ad ludziej, što nie zmahli trapić na pasiedžańnie.
10:04 U zalu sudu puścili kala 20 čałaviek. Siarod ich dyplamaty, palityki, niekalki žurnalistaŭ, u tym liku kiraŭnik ofisu ABSE ŭ Miensku Okie Petersan, ambasadarka ZŠA Karyn Stjuart, Alaksandar Milinkievič, Stanisłaŭ Šuškievič, Valer Ščukin i inš. Vincuk Viačorka, Anatol Labiedźka i Siarhiej Kalakin zastalisia za dźviaryma.
9:59 Padsudnyja maładafrontaŭcy admaŭlacca prachodzić u zalu sudu, pakul nie prapuściać tych, chto pryjšoŭ ich padtrymać. Kala budynku sudu stajać kala sta čałaviek.
9:50 Tym, chto pryjšoŭ padtrymać maładafrontaŭcaŭ, nie dajuć padyści da sudu. Milicyjanty spasyłajucca na toje, što masavyja akcyi nielha pravodzić pablizu ad dziaržaŭnych ustanoŭ. Adnak niekatorych viadomych asobaŭ prapuskajuć u sud. Tak, pavodle našaha karespandenta, da budynku prapuścili ambasadarku ZŠA Karyn Stjuart, piśmieńnika Uładzimiera Arłova.
9:30 La sudu ludzi ŭ supracoŭniki pravaachoŭčych struktur u cyvilnym pieraharadzili chodnik i prapuskajuć da budynku tolki tych, chto maje paviestki. Na arhument, što pasiedžańnie sudu maje być adkrytym, jany kažuć, što ŭsie miescy ŭ zali ŭžo zaniatyja. Žurnalistaŭ taksama nie prapuskajuć za kardon.
Na padychodach da sudu sabrałosia kala 30 čałaviek, jakija pryjšli padtrymać maładafrontaŭcaŭ.
