Za minułyja 10 dzion byli vyzvalenyja try palitviaźni, spynienyja niekalki palityčna matyvavanych kryminalnych spravaŭ, vyniesienyja miakkija prysudy maładafrontaŭcam i nivodzin čałaviek nia byŭ pakarany aryštam za palityku. Hetyja rašeńni vynosiać tyja samyja sudździ, jakija jašče miesiac tamu biaźlitasna sadzili za try ŭlotki. Kamentar redakcyi.
Za minułyja 10 dzion byli vyzvalenyja try palitviaźni, spynienyja niekalki palityčna matyvavanych kryminalnych spravaŭ, vyniesienyja miakkija prysudy maładafrontaŭcam i nivodzin čałaviek nia byŭ pakarany aryštam za palityku. Hetyja rašeńni vynosiać tyja samyja sudździ, jakija jašče miesiac tamu biaźlitasna sadzili za try ŭlotki. Chodziać čutki pra ŭhodu Piatkievič‑Kremera, pavodle jakoj biełaruskija ŭłady majuć vyzvalić usich palitviaźniaŭ da 10 červienia, a ŭ jakaści kroku ŭ adkaz niekalki eŭrapiejskich sajuźnikaŭ ZŠA zablakujuć źniaćcio handlovych preferencyj dla Biełarusi. Rašeńnie ab preferencyjach maje być pryniataje 21 červienia. Niadoŭha zastałosia čakać, kab pabačyć, jak daloka zojdzie hetaja hulnia.
Nia budziem padmanvacca. Palitviaźniaŭ vyzvalajuć nie tamu, što za hramadzianami raptoŭna pryznali prava na vykazvańnie niezaležnych palityčnych pohladaŭ ci zachavańnie nacyjanalnaj kultury. Nie tamu, što admovilisia ad manapolii na ŭładu. Havorka idzie pra zvyčajny rozyhryš u abmien za finansavyja vyhady, za ščaście spažyŭcoŭ — kab ekanamičnaja stabilnaść umacavała represiŭnuju systemu. Bolš za toje, prapahanda vykarystoŭvaje sytuacyju, kab jašče raz abyłhać dysydentaŭ, vydaŭšy ich za ahientaŭ Zachadu. Pryhadvajecca, jak HDR dazvalała Zachodniaj Hiermanii vykupać palitviaźniaŭ. Dziela prapahandysckaha efektu Chonekier na kožnaha palityčnaha ŭ nahruzku jašče davaŭ dva kryminalniki.
Adnačasova z vyzvaleńniem palitviaźniaŭ pracesy na miescach praciahvajucca ŭ zvyčajnym paradku. Vydatnika Jurasia Alejnika ideolahi vyhaniajuć z Akademii kiravańnia za palityčnyja pohlady i nie saromiejucca heta pryznavać). Nijakaha praŭdzivaha raŭnapraŭja ŭ krainie nia budzie, pakul nia budzie demantavany represiŭny i prapahandyscki aparat idealahičnaj vertykali.
Hledziačy na radasnyja tvary junakoŭ i junačak z Maładoha frontu, mižvoli paraŭnoŭvaješ ich ź dziejačami minułaha. Takimi jak Raścisłaŭ Łapicki, čyj nacyjanalny podźvih adkryŭ historyk Michaś Čarniaŭski. Jakoje ščaście, što jany žyvuć u lepšy čas, čym Raścisłaŭ. Hutarkaj z Čarniaŭskim adkryvajecca čarhovy Histaryčny sšytak «NN». U sšytku taksama znojdziecie intryhoŭny archiealahičny artykuł sp.Kryvalceviča, recenziju na novuju knihu Aleha Łatyšonka, uspaminy pra ruch chipi ŭ padsaviecki čas.
Vialikuju temu składajuć materyjały pra Kanhres demakratyčnych siłaŭ. Jak piša Piotra Rudkoŭski, ad samaha pačatku ciomnymi byli mety i matyvy hetaha mierapryjemstva. Mnohija kamentatary ź niepakojem zaŭvažali rasiejskija nitki, što vilisia vakoł forumu. Adnak u samim padziele na mnohapartyjnuju kaalicyju i Ruch za Svabodu trahiedyi niama, u hetym sychodziacca i Rudkoŭski, i Alaksandar Kłaskoŭski. Palitykam ciažej budzie zvalvać adkaznaść z adnoj hałavy na druhuju, a kankurencyja stanie bolš vyjaŭnaju.
