Donary kažuć, što takaja skrajniaja miera — adziny sposab pryciahnuć da siabie ŭvahu
U Mahilovie pačynajecca masavy pratest donaraŭ. Bolš za 100 hanarovych donaraŭ Biełarusi vykazali namier pačać zabastoŭku na znak pratestu suprać admieny lhotaŭ.
«Spačatku my praviadziem papieradžalnuju zabastoŭku», — kaža hanarovy donar Biełarusi Ihar Kavalenka. — «Ciaham tydnia nia budziem chadzić na abłasnuju stancyju pieralivańnia kryvi. Kali heta nia daść vynikaŭ, pačniem biasterminovuju zabastoŭku. Budziem źjaŭlacca na punkty zdačy kryvi tolki ŭ vypadkach, kali kroŭ budzie patrebnaja dzieciam ci ludziam, čyjo žyćcio ŭ niebiaśpiecy».
Pratest vyklikany admienaj bolšaści lhotaŭ. Takich, jak 50‑adsotkavaja źnižka na pratezavańnie zuboŭ, 50‑adsotkavaja źnižka na leki dy 40‑adsotkavaja prybaŭka da pensyi.
«Ludzi, jakija rehularna zdajuć kroŭ, u niejkim sensie achviarujuć svaim zdaroŭjem», — aburajecca spadar Kavalenka. — «Naprykład, u časie zdačy płazmy arhanizm hublaje kalcyj, razburajucca zuby... Tamu źnižka na pratezavańnie była ŭziataja nia ź nieba».
Hanarovyja donary kažuć, što takaja radykalnaja forma pratestu była abranaja ad biezvychodnaści. Maŭlaŭ, heta adziny sposab pryciahnuć da siabie ŭvahu, bo pa‑inšamu čynoŭniki i vucham nie viaduć.
Nahadajem, 23 traŭnia Pałata pradstaŭnikoŭ amal adnahałosna pryniała Zakon ab admienie balšyni lhotaŭ, u tym liku studentam, pensyjaneram dy likvidataram Čarnobylskaje katastrofy. Suprać prahałasavała tolki deputatka Volha Abramava. 28 traŭnia hety Zakon uchvaliŭ Saviet Respubliki. Suprać nie hałasavaŭ nichto.
