Źniać pryvatnyja spadarožnikavyja televizijnyja anteny patrabujuć na hety raz ad žycharoŭ Pinska (Bresckaja vobłaść). Abviestki z adpaviednym zahadam na hetym tydni źjavilisia na padjezdach žyłych damoŭ pa ŭsim horadzie.
Jak paviedamiŭ słužbie manitorynhu BAŽ namieśnik načalnika Pinskaha haradskoha vytvorčaha abjadnańnia «Žyllova‑kamunalnaja haspadarka» Mikałaj Bazan, rasparadžeńnie abviaścić žycharoŭ šmatpaviarchovych damoŭ ab nieabchodnaści źniać anteny atrymali na płaniorcy 28 maja ŭsie načalniki ŽEU Pinska.
«Pryčyna patrabavańnia vielmi prostaja: anteny psujuć fasady budynka i pakryćcio dachu, u vyniku zataplajucca vadoj kvatery vierchnich pavierchaŭ», — patłumačyŭ Mikałaj Bazan. Pa jaho słovach, uładalniki spadarožnikavych anten paviny demantavać ich samastojna, inakš ryzykujuć atrymać štraf.
Žycharka Pinska, siabra BAŽ Valancina Navaryč pračytała, miž inšym, ŭ abviestcy na padjeździe svajho doma, što nieabchodna źniać anteny z dachaŭ. Dalej tłumačyłasia, tamu što heta niebiaśpiečna dla dachu.
— Ale spadarožnikavaja antena, jakaja naležyć mnie, prymacavanaja da cahlanaj ściany ŭ śpiecyjalnaj nišy, jaje navat nie bačna z vulicy. Dach antena nie zakranaje i, bolš za toje, nie psuje jaho, — kaža Valancina Navaryč.
— Ja patelefanavała načalniku ŽEU №1 Ninie Hardziejevaj i patłumačyła heta. Adnak mnie adkazali, što patrabavańnie abaviazkovaje dla ŭsich žycharoŭ doma. Maŭlaŭ, dyskutavać — marnavać čas: «Vykonvajcie zahad, inakš budzie składzieny administracyjny pratakoł i zapłacicie štraf».
Namieśnik staršyni Pinskaha harvykankama, jaki kuryruje ŽKH, A. Sacuta, admoviŭsia adkazać na pytańni, spasłaŭšysia na terminovy adjezd, i paraiŭ usio vyśviatlać u kiraŭnictva žyllova‑kamunalnaj haspadarki horada.
U adździele pa ideałohii Pinskaha harvykankama adkazali, što ničoha nie viedajuć pra patrabavańnie ŽEU horada, ale, kali jano jość, treba vykonvać.
Pakul masavaha źniaćcia anten‑«talerak» u Pinsku nie nazirajecca.
