Naftahazavaja vajna dadała biełarusam patryjatyzmu. Heta vynikaje z travieńskaha apytańnia, zładžanaha NISEPD.
Na sajcie hetaj vycisnutaj ŭ Litvu niezaležnaj daśledčaj instytucyi źjaviŭsia šerah novych materyjałaŭ. Badaj, jašče budzie nahoda praanalizavać ich bolej padrabiazna. A zaraz — niekalki admietnych štrychoŭ.
Siarod biełarusaŭ słabiejuć prarasiejskija nastroi. Praces idzie marudna, ale niaŭchilna. Voś dynamika adkazaŭ na pastaŭlenaje rubam (dziakuj bohu, čysta hipatetyčnaje) pytańnie: kali b daviałosia vybirać miž abjadnańniem z Rasiejaj i ŭstupleńniem u Eŭraźviaz, što b vy vybrali? Hod tamu było 56,5% vs 29,3% na karyść uschodniaha varyjantu. Zaraz — 47,3% vs 34,7%.
Jašče bolej pakazalnyja nastupnyja ličby. Kali ŭ studzieni 14,5% ličyli, što dziela vyrašeńnia enerhietyčnych prablemaŭ varta źlicca z Rasiejaj u adnu dziaržavu, to ŭ traŭni takich akazałasia tolki 8,2%.
Narešcie, zadavałasia i takoje pytańnie: "Kali nastupstvy padvyšeńnia cenaŭ na rasiejskija enerhanośbity buduć ciažkimi asabista dla vas i vašaje siamji, ci ŭchvalicie vy dałučeńnie Biełarusi da Rasiei?". Dyk voś, u studzieni skazali "nie" 49%, u traŭni — 56,9% ("tak" — adpaviedna 35,1% i 31,7%). Bač, choć i zakidajuć našyja pasijanary suajčyńnikam-abyvatalam "kaŭbasny mentalitet", ale ž fakt: hatovych abmianiać niezaležnaść na sytniejšy kavałak prykmietna pamienieła :-)
Admietna i toje, što patryjatyzm, jaki farmujecca na našych vačoch, nia jość kazionnym. Ułada, jak jana ni ŭbirałasia ŭ tohu abaroncy nacyjanalnych intaresaŭ, u vačoch elektratu ŭpała. Mienavita za apošnija paŭhodu — i sacyjolahi pierakananyja, što heta jość naŭprostavym nastupstvam enerhietyčnaha kanfliktu z Maskvoj — źmienšyŭsia indeks davieru dziaržaŭnym instytucyjam i vyras davier da šerahu niedziaržaŭnych.
Asabliva ŭražvaje rakiroŭka, u vyniku jakoj niezaležnyja medyi pavodle hetaha pakaźniku pieraŭzyšli dziaržaŭnyja ŚMI. To bok, kanflikt z Maskvoj kapitalna pasadziŭ kazionnuju prapahandu ŭ haloš. U kazki pra biełaruski cud zhadžalisia vieryć, pakul z uschodu płyli tannyja enerharesursy. Prypiakło — stali šukać niezaležnuju infarmacyju dy analityku.
U pryvatnaści, ad studzienia vyras davier da niezaležnych daśledčych centraŭ, pravaabarončych arhanizacyjaŭ, svabodnych prafsajuzaŭ... Na hetym tle jašče nižej spoŭz uzrovień davieru da apazycyjnych palityčnych partyjaŭ. Jany — u samym chvaście adpaviednaj tablicy (nižej za CVK, KDB dy FPB :-).
I hetaje fijaska taksama zakanamiernaje: u toj čas jak ułada mižvoli rabiła svaim praciŭnikam šykoŭnyja pijaraŭskija padarunki (pravał enerhietyčnaje palityki, kielejnaje rašeńnie pra AES, skasavańnie lhotaŭ i h.d.) — tyja adno što kanhresili...
Miž tym kazać, što plebsu ŭsio pa barabanie, prabačcie, nie vypadaje. Pracujcie, šanoŭnyja, z masaj! Bo hladziecie: na pytańnie, ci musić być u krainie apazycyja dziejnaj uładzie, stanoŭča adkazvajuć 55,7% (suprać — 29,6%). Jašče bolej uražvajuć ličby padtrymki apazycyjnych patrabavańniaŭ. Naprykład, za źmienu vybarčaha zakanadaŭstva dziela zabieśpiačeńnia svabodnych i spraviadlivych vybaraŭ — 70,5%!
U pryncypie, jak bačym, masa — za palityčnuju kankurencyju. Za alternatyvu. Ale sapraŭdnuju, a nie butaforskuju.
Naturalna, za hetymi ličbami — šmat niuansaŭ, jakija ŭ karotkim kamentary nie achopiš. Ale fakt toje, što stereatypnaje ŭjaŭleńnie pra "kaŭbasnuju mentalnaść" — jaŭna pierabolšanaje. Pakrysie ŭ hramadztvie vyśpiavajuć čyńniki pieramienaŭ. Palityčnaje ž mastactva palahaje ŭ tym, kab asiadłać ich :-)
