Pucin pierad samitam "vialikaj vosiemki" nastrašyŭ Zachad novymi zajavami. Jon pryhraziŭ pieranacelić rakiety na Eŭropu, kali amerykancy raźmieściać u Polščy dy Čechii elementy procirakietnaj abarony. Ci aznačaje heta, što dziela "asymetryčnaha adkazu" Kramla buduć zapatrabavanyja vajskovyja pasłuhi Biełarusi?
Kali budzie dalejšaja eskalacyja napružanaści, to vykarystańnie biełaruskaha placdarmu całkam imaviernaje. Tak ličyć mienski vajskovy ekspert Alaksandar Alesin, ź jakim ja tolki što mieŭ havorku.
Ź jahonych słoŭ, našaja terytoryja moža spatrebicca ŭ dvuch varyjantach. Pa-pieršaje, rasiejskija bambavozy Tu-95 i Tu-160 (jany niasuć rakiety, zdolnyja źniščać tyja samyja elemienty PRA) mohuć skarystoŭvać tutejšyja "aeradromy padskoku". I hety varyjant metadyčna adpracoŭvajecca apošnimi hadami padčas vajskovych maneŭraŭ.
Pa-druhoje, kaža Alesin, nie vypadkova rasiejcy dniami vyprabavali rakietu "Iskander". Heta aperatyŭna-taktyčnaja zbroja moža vykarystoŭvacca na adlehłaści da 500 km. I naturalna, jaje ŭ vypadku "asymetryčnaha adkazu" varta raźmiaścić jak maha dalej na zachad. Rasiejskija stratehi pakul što kažuć pra Kalininhradzkuju vobłaść. Ale Biełaruś u hetym vypadku — najzručniejšy varyjant.
Tym bolej što ajčynnaje kiraŭnictva apošnim časam nastojliva reklamuje adpaviednyja pasłuhi. Hetaja tema vyrazna prahučała padčas niadaŭniaha vizytu ŭ Miensk krasnajarskaha hubernatara Chłaponina. Biełaruski aficyjny lider pieradaŭ praź jaho vyrazny syhnał Kramlu, skazaŭšy naŭprost, što "Rasieja tolki ŭ chaŭrusie ź Biełaruśsiu moža dać samy adekvatny i asymetryčny adkaz na raźmiaščeńnie PRA u Eŭropie".
Paśla śviežaj zajavy Pucina vajskovaje łobi ŭ Maskvie paciraje ruki. Hienerał Ivašoŭ, prezydent Akademii hieapalityčnych prablemaŭ, faktyčna paćvierdziŭ prahnozy našaha eksperta Alesina: "Pa-pieršaje, varta razharnuć ŭ Kalininhradzkaj vobłaści i Biełarusi kompleks "Iskander". Pa-druhoje, treba rezka padniać značeńnie našaj stratehičnaj avijacyi z kryłatymi rakietami, pakolki heta bolš tanna, nadziejna i nijakimi PRA nie pierachoplivajecca. I pa-treciaje, treba papracavać što da farmavańnia hieapalityčnych chaŭruśnikaŭ, u tym liku i ŭ Eŭropie — najpierš ź Biełaruśsiu — i napoŭnicu realizavać ideju adzinaj abaronnaj prastory".
Zaŭvažym: toje, što dla hienerała vyhladaje "tanna dy siardzita", moža doraha abyścisia biełarusam. Kali dojdzie da vajennaj katavasii, dyk mała nia zdasca.
Inšaja reč, nakolki daloka zachoča pajści Kreml u kanfrantacyi z Zachadam. Usio ž na rymejk chałodnaj vajny treba zanadta šmat srodkaŭ. Dyj kamercyjnymi intaresami rasiejski isteblišment nadta ž źnitavany z terytoryjami "imaviernaha praciŭnika".
"Usie rakiety ŭžo daŭno nacelenyja i pieranacelenyja kudy treba, — vydaŭ vajskovuju tajamnicu kiraŭnik rasiejskaj Rady zamiežnaj dy abaronnaj palityki Siarhiej Karahanaŭ. — A voś kali my budziem razhortvać lišnija, to heta možna nazvać tolki idyjatyzmam!".
Tak što ŭ vajaŭničych zajavach Kramla — vialiki pijaraŭski składnik. U pryvatnaści, kab zachodniki adčapilisia i dali spakojna pravieści aperacyju "Pierajemnik" (dla naiŭnych: čarhovyja vybary prezydenta Rasiei).
Adpaviedna i nadziei Miensku na ekanamičny vyjhryš ad uzmacnieńnia stratehičnaha aljansu mohuć akazacca pierabolšanymi.
