Sud Centralnaha rajonu Miensku pakaraŭ pastara pratestanckaj carkvy Jana Chryściciela Antonija Bokuna aryštam na troje sutak za praviadzieńnie niesankcyjanavanaha ŭładami nabaženstva.
Pastary inšych pratestanckich cerkvaŭ, jakija pryjšli na sud, zajavili, što pakarańnie Antonija Bokuna jość śviedčańniem taho, što biełaruskija ŭłady pravakujuć relihijnuju varožaść i napružanaść u hramadztvie.
Antonija Bokuna zatrymali 3 červienia padčas nabaženstva, jakoje adbyvałasia ŭva ŭłasnym domie pastara.
Antonija Bokuna sudzili paśla taho, jak vynieśli pakarańnie zatrymanym udzielnikam fłeš‑mobu suprać skasavańnia lhotaŭ. Vierniki carkvy, a taksama baćki pastara, jahonaja ciažarnaja žonka ź piacihadovym synam Adamam čakali sudu ad 10‑j ranicy. Tolki a pałovie na vośmuju pačaŭsia sud.
Antonija Bokuna abvinavacili ŭ praviadzieńni niesankcyjanavanaha nabaženstva. Pastar patłumačyŭ sudździ Tacianie Paŭlučuk, što ŭłady dazvoł na nabaženstva nie dajuć, a viernikam treba źbiracca kožnuju niadzielu. Pastar u sudzie patłumačyŭ, što tydzień tamu jaho ŭžo zatrymlivali i pakarali štrafam 620 tysiač rubloŭ pavodle analahičnaha abvinavačańnia.
Sudździa Taciana Paŭlučuk pastanaviła ŭličyć termin zatrymańnia pastara ad niadzieli. Takim čynam, jon vyjdzie na volu ranicaj u sieradu, 6 červienia, u 11:45 ranicy.
