Dniami rumynskija ŚMI paviedamili, što futbolnaja zbornaja Bałharyi, mahčyma, zdabyła ŭ Minsku pieramohu niespartovymi mietadami. Heta ŭžo nie pieršaje abvinavačańnie našaj kamandy ŭ «prodažy» matčaŭ. Nahadajem, družyna Juryja Puntusa ŭ subotnim matčy na minskim stadyjonie «Dynama» zhulała vielmi słaba i sastupiła bałharam ź likam 0:2.
Publikacyja ŭ rumynskaj haziecie «ProSport» maje nazvu «Pośpiech pa błacie». Vydańnie adznačaje niezvyčajna nizkija kaeficyjenty, jakija prymali bałharskija bukmiekiery na pieramohu svajoj nacyjanalnaj kamandy. U toj čas, kali ŭ inšych krainach jany byli bolšymi. Zhadvajecca i viadomy biznesoviec Michaił Čarny, jaki, nibyta, paŭpłyvaŭ na vynik minskaha matča. Hetuju publikacyju pieradrukavali ŭpłyvovyja bałharskija ŚMI.
Kamandy Rumynii i Bałharyi majuć pryblizna roŭnyja šancy, kab patrapić na čempijanat Jeŭropy. Jany zmahajucca za druhoje miesca ŭ hrupie, bo pieršaje «zabraniravali» hałandcy. Tamu rumyny, biezumoŭna, zacikaŭlenyja ŭ pośpiechu biełarusaŭ i niaŭdačy bałharaŭ.
Hałoŭny redaktar haziety «Priessboł» Uładzimir Bieražkoŭ amal upeŭnieny, što matč byŭ damoŭlenym. Pavodle jaho słovaŭ, za heta havorać i situacyja na poli, i taja lohkaść, ź jakoj bałhary zabili hały:
«Heta vielmi surjoznaja infarmacyja. U heta pačynaješ vieryć, kali analizuješ padziei na poli. Jak lohka Bierbataŭ zastavaŭsia adzin na adzin z hałkipieram, navat kali toj stajaŭ. Da taho ž, jak lohka pierad im rastupalisia našyja futbalisty, kali jon abyhryvaŭ 4‑ch!»
Pa słovach spadara Bieražkova, našaja zbornaja nie ŭpieršyniu «źlivaje» matčy. Hazieta «Priessboł» nahadvaje pra skandał z matčami Biełaruś—Čechija i Małdova—Biełaruś, jakija adbylisia ŭ vieraśni 2003 hoda. Ich hetaje spartovaje vydańnie nazvała damoŭlenymi. U abodvuch naša kamanda prajhrała z «patrebnym» likam. Hałoŭnaje ŭpraŭleńnie pa baraćbie z arhanizavanaj złačynnaściu i karupcyjaj MUS Biełarusi pravodziła apieratyŭnyja mierapryjemstvy. Praciahvaje Uładzimir Bieražkoŭ:
«Upieršyniu ŭ našaj krainie była raspačataja kryminalnaja sprava pa artykule «Podkup udzielnikaŭ i arhanizataraŭ spartovaha mierapryjemstva». Sprava rasśledujecca ŭžo z 2004‑ha hodu. vinavatyja ŭžo daŭno vyśvietlenyja, abvinavačańnie možna vystaŭlać. Čamu heta nie robicca, ja asabista nie viedaju.
Na minułym tydni ja patelefanavaŭ śledčamu pa hetaj spravie. Jak jon skazaŭ: jaho nie tolki zvolnili na piensiju, ale raspuścili sam adździeł pa baraćbie z arhanizavanaj złačynnaściu i karupcyjaj HUUS Minharvykankama».
Jeŭraradyjo datelefanavałasia da hałoŭnaha treniera zbornaj Biełarusi Juryja Puntusa. Jon jašče nie viedaŭ pra źjaŭleńnie publikacyj u rumynskich i bałharskich ŚMI:
«Ja heta čuju tolki ad vas. Kolki hod ja pracavaŭ u kłubnym futbole, zaŭsiody byŭ upeŭnieny ŭ svaich chłopcach. Takoha prosta nie mahło zdarycca, bo ja sam hetym nikoli nie zajmaŭsia i zajmacca nie budu! Ja dumaju, što taksama ja vychavaŭ i maich padnačalenych.
Na moj pohlad, heta prosta psichałahičny chod z boku rumynaŭ na našu kamandu. Uličvajučy, viadoma, što ŭ nas jašče adzin matč u Bałharyi. Tak, rumyny prosta sprabujuć takim čynam nas raspalić».
Ale ŭdzieł hałoŭnaha treniera ŭ vyrašeńni losu damoŭlenaj hulni nieabaviazkovy. Spravy mohuć vyrašacca i ŭ abychod treniera. Takuju mahčymaść taksama dapuskaje Uładzimir Bieražkoŭ:
«Kali heta asnoŭnyja hulcy: aporny paŭabaronca i hałkipier ci dva centralnyja abaroncy,‑‑ to heta zrabić vielmi lohka. Da taho ž, pry najaŭnaści takoha forvarda, jak Bierbataŭ, — jamu navat dapamahać nie treba, jamu prosta treba nie pieraškadžać. A kolki momantaŭ Bierbataŭ mieŭ u pieršym tajmie — usie bačyli. Jon zabiŭ adzin, a moh jašče čatyry…»
