U hutarcy z žurnalistami krainaŭ "vialikaj vosiemki" rasiejski kiraŭnik zhadaŭ i pra Biełaruś. Pryčym u suvora-iraničnym tonie: ach, maŭlaŭ, maleńkaja niebaraka!
Heta prahučała na tle jahonych razvahaŭ, što hodzie ŭžo Rasiei subsydavać postsavieckija krainy praz tannyja enerhanośbity.
Pucin nahadaŭ, što kali Kramlu zakidali, nibyta jon dušyć pamarančavuju Ŭkrainu, ale padtrymlivaje režym Łukašenki, to było abiacana: "Čas nadydzie — my zrobim heta i ź Biełaruśsiu".
"My heta zrabili. Jak tolki my heta zrabili, usčaŭsia šum, u tym liku ŭ zachodniaj presie: jak ža tak, što my tam robim, našto my kryŭdzim maleńkuju Biełaruś. Heta niejkaje sumlennaje, hodnaje staŭleńnie, ci što, da Rasiei ŭ hetym planie?" — rytaryčna spytaŭsia Pucin.
Hetyja žorstkija tyrady možna ličyć uskosnym adkazam na syhnały ź Miensku ab hatovaści palepšyć stasunki i navat viarnucca da niejkaha "sajuznaha budaŭnictva" na raŭnapraŭnym padmurku. Zvarotu nia budzie. Abo ŭvachodźcie "subjektam", abo płaciecie za niezaležnaść biaź źnižak.
A kali z hrašyma niahusta? Pucin patłumačyŭ mechaniku na prykładzie Armenii: "...u rešcie reštaŭ my zrazumieli adzin adnaho, znajšli sposab. Jany nia mohuć płacić usiu canu "žyvymi" hrašyma, zatoje jany raspłočvajucca majomaściu. "Žyvymi", realnymi aktyvami...".
Ekanamist Leanid Zaika prakamentavaŭ mnie hetyja zajavy tak: "Maskva ŭžo vyznačyłasia ź Biełaruśsiu i jaje ciapierašnim lideram. Kantekst vykazvańnia Pucina, mahčyma, taki, što u Biełarusi byŭ inšy šaniec, ale Łukašenka abraŭ toj šlach, jaki abraŭ".
Šancy biełaruskich uładaŭ atrymać ekanamičnyja bonusy praz pasłuhi ŭ planie "asymetryčnaha adkazu" na amerykanskija supraćrakiety ŭ Eŭropie ekspert ličyć vielmi sumnieŭnymi.
Ź jahonych słovaŭ, Maskva damahałasia ad Miensku dźviuch rečaŭ: referendumu ab "bolej ščylnaj intehracyi" i ŭviadzieńnia rasiejskaha rubla. Kali ž nie atrymałasia, to była zroblena vysnova, što "subsydyi nie dali naležnaha vyniku", kaža Leanid Zaika.
Dadamo: kaniešnie ž, nia varta kidać kamień u ajčynnuju ŭładu za toje, što jana ŭrešcie ŭpierłasia roham. Prykrym jość toje, što hady intehracyjnych hulniaŭ stali zmarnavanym histaryčnym časam. Enerhietyčnuju durnicu nie skarystali navat dziela ekanamičnaje madernizacyi. Siońnia naša ekanomika źviedvaje łomku, jakaja ŭžo nia strašnaja tym ža krainam Bałtyi. Dyj u planie palityčnym čaho my, adrozna ad ich, dasiahnuli? Statusu "čornaje dzirki Eŭropy"? Pryčym nia skažaš, što siońnia z hetaj jamy Miensk sprytna vyłazić...
