***
Mikałaj Karniajčuk: Jakaja dynamika popytu ŭ Biełarusi na licenzijnaje prahramnaje zabieśpiačeńnie kampanii Microsoft?
Valeryj Łanavienka: My całkam zadavolenyja tempami raźvićcia biznesu ŭ Biełarusi. U paraŭnańni ź minułym hodam abjomy prodažaŭ našych biełaruskich partnioraŭ padvoilisia. Dla paraŭnańnia: jeŭrapiejski rynak raście tempami prykładna ŭ 10‑15% štohod. Tamu možna skazać, što ŭ Biełarusi my bačym nadzvyčajnuju cikavaść da pradukcyi Microsoft.
Što datyčycca Windows Vista, popyt na jaje my bačym u asnoŭnym u śfiery chatnich spažyŭcoŭ. Siońnia ŭ Biełarusi karparatyŭnyja klijenty davoli strymana staviacca da hetaha praduktu, ale ja dumaju, što heta pytańnie času. Paśla taho, jak projdzie pačatkovaja stadyja testavańnia na infrastruktury karparacyj, popyt na Windows Vista budzie dosyć vysoki i tam.
Mikałaj Karniajčuk: Chto źjaŭlajecca samymi bujnymi klijentami Microsoft u Biełarusi?
Valeryj Łanavienka: Heta šerah bujnych pradpryjemstvaŭ u bankaŭskaj śfiery i ŭ halinie telekamunikacyj, jakija vyjaŭlajuć cikavaść da budavańnia bolš surjoznaj, intehravanaj infrastruktury svaich kampjutarnych sistem.
Mikałaj Karniajčuk: Ci płanuje Microsoft dadatkovaje stymulavańnie biełaruskaha rynku? U jakim stanie, naprykład, praces adaptacyi Windows dla biełaruskamoŭnych karystalnikaŭ?
Valeryj Łanavienka: Paśla kansultacyj z šeraham dziaržaŭnych ustanoŭ, a taksama z našymi partniorami my bačym, što popyt na biełaruskamoŭny varyjant našych praduktaŭ budzie nievysoki.
Microsoft — kamiercyjnaja kampanija. Kali my prymajem rašeńni pa łakalizacyi našych praduktaŭ, my aryjentujemsia na spažyŭcoŭ. Prajekt, pra jaki vy kažacie, napeŭna, budzie raźvivacca, ale nie ŭ tyja terminy, jakija my pieršapačatkova płanavali.
Mikałaj Karniajčuk: U Internecie jość infarmacyja, što ŭ 2000 hodzie pamiž kampanijaj Microsoft i ŭradam Biełarusi było padpisanaje pahadnieńnie, jakoje praduhledžvała nabyćcio orhanami dziaržaŭnaj ułady krainy licenzijnaha prahramnaha zabieśpiačeńnia. Ci sapraŭdy byli takija pahadnieńni?
Valeryj Łanavienka: Vykarystańnie licenzijnaha prahramnaha zabieśpiačeńnia — heta patrabavańnie zakanadaŭstva. Tamu anijakich dadatkovych pahadnieńniaŭ pamiž uładalnikam pravoŭ i dziaržavaj u hetym vypadku nie patrabujecca.
Ź inšaha boku, ja vielmi rady, što ŭrad Biełarusi zaćvierdziŭ apošnim časam niekalki pastanoŭ, jakija rehulujuć hetuju halinu i, u pryvatnaści, uskładajuć na kiraŭnikoŭ pradpryjemstvaŭ piersanalnuju adkaznaść za karystańnie nielicenzijnym PZ. Heta, na maju dumku, prahresiŭny krok, jaki nabližaje Biełaruś da Jeŭrapiejskaha sajuza i da normaŭ, pryniatych va ŭsim śviecie.
Mikałaj Karniajčuk: Jak by Vy acanili ŭzrovień kampjutarnaha piractva ŭ Biełarusi?
Valeryj Łanavienka: Microsoft nie zajmajecca acenkaj uzroŭniu nielicenzijnaha prahramnaha zabieśpiačeńnia. Hetym zajmajucca inšyja kampanii, takija, naprykład, jak IDC. Škada, ale apošnim časam Biełaruś nie traplała ŭ śpis krain, dzie pravodziacca takija daśledavańni, tamu situacyju acanić davoli składana. Ale ja ŭžo adznačaŭ nadzvyčajnuju cikavaść da našaha licenzijnaha PZ u Biełarusi i častkova źviazvajem heta sa źmianieńniem staŭleńnia biełarusaŭ da intelektualnaj ułasnaści.
U minułym hodzie ŭzrovień piractva ŭ Rasii kampanijaj IDC byŭ acenieny ŭ 85%. Mnie składana kazać, vyšej ci nižej hetaja ličba ŭ Biełarusi, ale dyjapazon prykładna toj samy.
Mikałaj Karniajčuk: Ci praŭda, što składanaja situacyja z abaronaj intelektualnaj ułasnaści ŭ Biełarusi źjaŭlajecca asnoŭnym barjeram na šlachu adkryćcia pradstaŭnictva Microsoft u našaj krainie?
Valeryj Łanavienka: Pry adkryćci pradstaŭnictva my kirujemsia šeraham faktaraŭ. Achova intelektualnaj ułasnaści i aŭtarskich pravoŭ, biezumoŭna, važny kampanient i hraje svaju rolu, ale heta tolki adzin z takich faktaraŭ.
Da taho ž, u lubym svaim rašeńni my kirujemsia intaresami akcyjanieraŭ. Siońnia my nie bačym nieabchodnaści ŭ adkryćci asobnaha pradstaŭnictva ŭ Biełarusi, ale situacyja moža źmianicca ŭ luby čas.
