Dyplamatyja apazycyi moža i pavinna zmahacca za viartańnie preferencyj. Kamentar Redakcyi.
Rašeńnie pryniataje. Biełaruś pazbyłasia preferencyj u handli z Eŭrasajuzam.
Heta aznačaje, što ES nia ličyć pahrozu dałučeńnia Biełarusi da Rasiei realnaj. Jon nia bačyć biady ŭ dadatkovaj pieraaryjentacyi biełaruskich handlovych patokaŭ na Rasieju.
Eŭrasajuz vieryć u metazhodnaść metadu sankcyj. ES ličyć mahčymym źmianić uładu ŭ Biełarusi i nie vyklučaje chutkaj destabilizacyi ekanamičnaj sytuacyi. Pry hetym ES pryjšoŭ da razumieńnia, što łukašenkaŭcy reahujuć tolki na finansavyja arhumenty. I miarkuje, što Łukašenka nia budzie biaskonca pavialičvać svaju zaležnaść ad Maskvy. Mižnarodnaje prafsajuznaje i pravaabarončaje łobi ŭpłyvaje na Brusel u pytańni Biełarusi ŭ bolšaj stupieni, čym u pytańni, skažam, Uzbekistanu, što tłumačycca mienšym upłyvam biznes‑hrupaŭ, u Biełarusi nieprysutnych.
Sankcyi — heta materyjalizavanaje nieprymańnie eŭrapiejcami samaje natury biełaruskaha režymu. Jak skazaŭ pasoł Benet, jany chutčej z płoskaści psychalahičnaj, a nie praktyčnaj.
Rasieja kiravałasia zusim inšymi matyvami, kasujučy svaje handlovyja preferencyi z pačatku hetaha hodu. Damovu ab źniaćci barjeraŭ u handli łabiravali jakraz pramysłovyja hrupy. Pry hetym u znak padtrymki palityčnaha kursu Maskva zachavała istotnyja enerhietyčnyja preferencyi, uzamien za «Biełtranshaz».
Niepasrednyja ekanamičnyja straty ad rašeńnia ES buduć nievialikimi. Zakranuty biełaruski ekspart u pamiery prykładna 400 młn eŭra, dyk straty dziaržaŭnaha biudžetu, imavierna, nie pieravysiać 10—20 % ad hetaj sumy. Heta nie śmiarotna. Takija nieistotnaści nie daduć imhnienny palityčny efekt. Adnak jany, niby, parušeńnie abmienu rečyvaŭ, buduć upłyvać na arhanizm biełaruskaj ekanomiki. Kali parušeńnie akažacca zaciažnym, jahony efekt budzie vyklučna nehatyŭnym.
Biełaruś maje patrebu ŭ eŭrapiejskim rynku, pryčym nia tolki dla naftapraduktaŭ, a ŭsio bolš dla chimii, charčovych praduktaŭ, tekstylu. Miž tym biez preferencyj my budziem zaŭždy prajhravać kankurentam z susiednich krainaŭ. Sankcyi adšturchoŭvajuć Biełaruś ad eŭrapiejskaha rynku, a eŭrapiejskich investaraŭ — ad Biełarusi.
U nacyjanalnych intaresach Biełarusi — zmahacca za viartańnie preferencyj. Dyplamatyja apazycyi moža i pavinna padklučycca da vyrašeńnia hetaj zadačy. U hetym bačycca palityčny šaniec dla jaje.
