Pramyja repartažy karespandentaŭ «NN» z Byčkoŭ i Ŭschodnich mohiłak.
***
Miensk. Uschodnija mohiłki. 18.10
Kala mahiły Bykava sabrałasia kala 100 čałaviek, uźniaty bieł-čyrvona-bieły ściah. Kali jechać praspektam, bačna, jak na mohiłki kirujucca ludzi, najpierš moładź ź bieł-čyrvona-biełymi stužkami.
Siarod prysutnych - udava Bykava Iryna Michajłaŭna, siabra piśmieńnika Valancin Taras, Vital Taras, pasoł Izrailu Zejeŭ ben Arje, akademik Radzim Harecki, Hienadź Buraŭkin, Arsień Lis, Michaś Tyčyna, Jury Chadyka.
Bahata moładzi. Prysutničajuć maładafrontaŭcy Barys Harecki i Źmicier Chviedaruk, nad imi bieł-čyrvona-bieły ściah.
Byčki. U Byčkach, na radzimie piśmieńnika, sabrałasia 35-40 čałaviek. Pryjechali Alaksandar Milinkievič ź Inaj Kulej, Vincuk Viačorka, piśmieńnik Uładzimier Arłoŭ, Siarhiej Zakońnikaŭ, Iryna Žarnasiek. Prysutničaje siastra Vasila Bykava sp-nia Valancina. Arhanizavała mierapryjemstva - hramadzkaja dziajačka Ada Rajčonak.
***
Miensk. Uschodnija mohiłki.
18.20
Valancin Taras ad imia Biełaruskaha PEN-centru adkryŭ imprezu i zaprasiŭ usich žadajučych vystupać i padzialicca ŭspaminami pra Narodnaha piśmieńnika.
18.23
Pramaŭlaje Hienadź Buraŭkin.. Jon, u pryvatnaści, skazaŭ, «U hety dzień ja nie chaču ŭspaminać pra toje, što Bykava z nami niama. Naadvarot 83 hady tamu Bykaŭ pryjšoŭ u Biełaruś i nazaŭsiody z nami zastaniecca».
18.29
Pa-biełarusku vystupiŭ pasoł Izrailu Ziejeŭ ben Arje. Jon skazaŭ, što dziakujučy Bykavu prykipieŭ da biełaruskaj kultury .
Śledam vystupiŭ akademik Radzim Harecki «Vielmi škada. što z nami ŭ taki niaprosty čas niama Vasila Bykava», zaznačyŭ jon.
Radzim Harecki taksama zajaviŭ, što zasłuha Bykava ŭ tym, što jon pieršym pastaviŭ pytańnie pra ŭšanavańnie pamiaci achviaraŭ represij.
***
Byčki (Vušaččyna)
18.36
Vystupaje Alaksandar Milinkievič. Jon zajaviŭ, što Ruch «Za svabodu» zasnoŭvaje premiju imia Vasila Bykava. Jon skazaŭ, što premija budzie štohadovaj i ŭručacca budzie "mocnym" ducham. Pavodle słovaŭ sp-ra Milinkieviča, jana budzie ŭručacca ludziam, jakija pracavali nad umacavańniem biełaruskaha duchu, dziakujučy jakim ludzi vychodziać na Płoščy. Pieršaje ŭručeńnie adbudziecca pry kancy hodu.
Ludziej užo kala 50 čałaviek: ź Mienska, Połacka, Viciebsku. Źjavilisia Pavał Sieviaryniec i piśmieńnica Volha Ipatava. Sp-nia Ipatava razdaje prysutnym niadaŭna vydadzienuju knihu Volhi Hrycuk «My stvarali svaju Biełaruś», układalnicaj jakoj i była sama piśmieńnica.
***
Miensk. Uschodnija mohiłki
18.47
Naprykancy znoŭ uziaŭ słova piśmieńnik Valancin Taras. Jon skazaŭ: «Kožny čas maje svajo siaredniaviečča, a kožnaje siaredniaviečča svaju inkvizicyju, i ciapier taki čas našaha siaredniaviečča, kali panuje inkvizycyja. Ale my žyvyja, tvorčaść Bykava žyvaja. (...) U siońniašniaj litaratury jość dźvie linii: Linija Stalina-Čarhinca i Linija Bykava-Adamoviča i ŭsich nas. Ja nie sumniajusia ŭ tym, što ŭrešcie Linija Stalina apyniecca tam, dzie joj naležyć być».
Iryna Michajłaŭna Bykava padziakavała ŭsim, chto pryjšoŭ adznačyć dzień narodzinaŭ piśmieńnika.
18.48
Prysutnyja śpiavajuć himny «Mahutny Boža», «Nie zahasnuć zorki ŭ niebie».
* * *
Mierapryjemstva ŭ Byčkach skončyłasia. Siarod vystupoŭcaŭ była i siastra Vasila Bykava, sp-nia Valancina, jakaja jašče ranicaj lažała ŭ navapołackaj bolnicy, ale ŭciakła adtul i pryjechała ŭ Byčki, kab paprysutničać na imprezie, pryśviečanaj pamiaci brata. Sp-nia Valancina zaznačyła, što Vasil Bykaŭ sapraŭdy pačynaŭ pisać vieršy, «ale nie pajšło» i jon pieraklučyŭsia na prozu.
Admysłova ŭ Byčki pryjechaŭ były namieśnik pasła ZŠA ŭ Biełarusi sp-r Kunštater, jaki ciapier žyvie ŭ Turcyi.
- Fotarepartaž Julii Daraškievič
