Na biełaruska‑polskaj miažy zatrymanyja čatyry pradstaŭniki biełaruskaj apazycyi. Jak paviedamiŭ uviečary 24 červienia Pieršy kanał, u noŭtbukach u apazycyjaneraŭ byli znojdzienyja dapamožniki pa teraryźmie. Elektronnyja dapamožniki, pa źviestkach telekanału, znachodzilisia ŭ schavanych fajłach. Siužet pra zatrymańnie apazycyjaneraŭ byŭ pakazany ŭ prahramie «Panarama tydnia».
«U čatyroch aktyvistaŭ radykalnaj biełaruskaj apazycyi, jakija navučajucca ŭ Polščy, na mytni byli adabranyja dva noŭtbuki z elektronnymi dapamožnikami pa teraryźmie», — paviedamiŭ Pieršy kanał.
Barys Harecki |
Pavodle źviestak telekanała, u schavanych fajłach adnaho z zatrymanych, znojdzienych u noutbuku, znachodziłasia elektronnaja encyklapedyja min i ŭzryvalnikaŭ, «Nastolnaja kniha terarysta», materyjały pa praviadzieńni teraktaŭ, a taksama «100 sposabaŭ samahubstva». Pra ziemieściva druhoha noŭtbuka, adabranaha ŭ zatrymanych, ničoha nie paviedamlajecca.
Jak paviedamlaje «Interfaks», pa fakcie vyjaŭleńnia elektronnych dapamožnikaŭ pa teraryźmie na biełaruska‑polskaj miažy byli zatrymanyja presavy sakratar niezarehistravanaj arhanizacyi «Małady front» Barys Harecki, aktyvist Haradzienskaj jačejki frontu i dva siabry Partyi BNF.
U dačynieńni da aktyvistaŭ «Maładoha frontu» raniej užo ŭsčynalisia kryminalnyja spravy pa artykule «dziejnaść ad imia niezarehistravanaj arhanizacyi».
Jak vyśvietliŭ presavy centar Chartyi‑97, nasamreč apazycyjanery na voli. Presavy sakratar «Maładoha frontu» Barys Harecki vylecieŭ u Strasburh, kab uziać udzieł u sesii Parlamenckaj asamblei Rady Eŭropy, jakaja prachodzić z 25 da 29 červienia. Vidać, siužet pa BT pakazany z metaj dyskredytacyi aktyvista ŭ vačach suśvietnaj supolnaści.
Jak paviedamiŭ presavamu centru Chartyi‑97 adzin ź lideraŭ «Maładoha frontu» Antur Fińkievič, moładzievych aktyvistaŭ nasamreč zatrymlivali, adnak niekalki miesiacaŭ tamu. Tady ŭ Hareckaha sapraŭdy byŭ adabrany noŭtbuk, jaki dahetul nie viarnuli.
Sytuacyju Chartyi‑97 prakamentavaŭ pravaabaronca Ŭładzimier Łabkovič:
Uładzimier Łabkovič |
Prahlad infarmacyi, jakija zachoŭvajecca na noŭtubukach, moža ažyćciaŭlacca tolki z sankcyi prakurora. Tak što toje, što pakazała BT, — vidavočnaja pravakacyja, skiravanaja na toje, kab dyskredytavać nacyjanalnyja siły apazycyi. Pracesualnyja dziejańni, jakija nieabchodnyja, nie pravodzilisia. Ja nie sumniavajusia, što takich materyjałaŭ na samoj spravie nie było. Aktyvisty «Maładoha Frontu» — hłyboka relihijnyja ludzi, jany nia mohuć być prychilnikami hvałtoŭnaha zrynańnia ŭłady. Ich maralnyja j duchovyja pryncypy nie dazvolili b mieć takija materyjały. Mienavita tamu hetych ludziej i vyrašyli źniasłavić. Systema pracuje hetaksama, jak u 2006 hodzie, pierad prezydenckimi vybarami. Paśla pacukoŭ staršyni KDB Sucharenki, kanfiskacyi niejkich materyjałaŭ, jakich nichto nia bačyŭ, abvinavačvańniaŭ naziralnikaŭ za vybarami ŭ teraryźmie, užo nikoha ničym nia ździviš. Heta treba razhladać jak palityčnuju hulniu, u vyinku jakoj z apazycyi sprabujuć zrabić amaralnych ludziej, heta zvyčajnaje naviešvańnie jaryłykoŭ. Jakija‑kolviek sproby adstajać svoj honar i hodnaść u dačynieńni BT nikoli nia mieli pośpiechu».