U paniadziełak hieneralny prakuror Biełarusi Piatro Mikłaševič daŭ pres‑kanferencyju z nahody z nahody 85‑hodździa prakuratury, jakoje adznačajecca 26 červienia.
Na joj henprakuror paviedamiŭ, što ŭ dačynieńni da byłoha kiraŭnika «Biełnaftachimu» Alaksandra Baroŭskaha zaviedziena ŭ sumie try kryminalnyja spravy: pa artykule 210 «Kradziež šlacham złoŭžyvańnia zajmajemaj pasadaj» i 424 «Złoŭžyvańnie słužbovymi paŭnamoctvami». Aproč hetaha, viadziecca śledztva pa artykule 375 «Razhałošvańnie słužbovaj tajamnicy». Pavodle prakurora, kradziažy byli ŭčynieny Baroŭskim padčas zakupki j realizacyi naftapraduktaŭ.
Aproč Baroŭskaha, u spravie jašče piać-šeść fihurantaŭ, proźviščy jakich Mikłaševič nazvać admoviŭsia, tolki dadaŭ, što heta pradstaŭniki «Biełnaftachimu» i kiraŭniki inšych kamercyjnych arhanizacyj.
Na pytańnie, ci prachodzić pa hetaj spravie dyrektar firmy «Trajpł» Jury Čyž, Mikłaševič zaŭśmichaŭsia i paŭtaryŭ, što ŭ intaresach śledztva proźviščy pakul nazyvać nia budzie.
Hienprakuror paćvierdziŭ, što 31 traŭnia prakuratura zaviała kryminalnuju spravu na dvuch pałkoŭnikaŭ KDB i pałkoŭnika MUS. Ich vinavaciać u atrymańni chabaru ŭ asabliva vialikich pamierach.
U spravie zatrymanaha dva tydni tamu ŭ Maskvie byłoha namieśnika Vasila Lavonava ŭ kałhasie «Rasśviet» Mikałaja Hiecmana hienprakuror paviedamiŭ, što ciapier idzie praces jaho ekstradycyi. Ale sprava ŭskładniajecca tym, što Hiecman choča pryniać rasiejskaje hramadzianstva.
Pavodle Piatra Mikłaševiča, u lipieni skončycca raśśledavańnie spravy nakont karupcyi na pierachodzie «Zachodni Buh» i haradzienskaj mytni. Pierad sudom paŭstanuć dvaccać dva čałavieki, siarod ich — dzieviać mytnikaŭ. Ich abvinavačvajuć u niezakonnym uvozie ŭ krainu bujnych partyj kamputarnaj i pobytavaj techniki dy miasa.
Praź niejki čas pieradaduć u sud jašče adnu kryminalnuju spravu suprać mytnikaŭ. 25 čałaviek vinavaćć va ŭčynieńni škody dziaržavie na 90 młrd. rubloŭ.
«My majem spravu z sapraŭdnymi złačynnymi arhanizacyjami na mytni», — zaznačyŭ Mikłaševič.
Letaś byli zaviedzienyja 797 kryminalnych spravaŭ pa fakcie chabaru, 464 — kradziažu z vykarystańniem słužbovych paŭnamoctvaŭ, 316 — złoŭžyvańnia słužbovymi paŭnamoctvami. Heta na 18,1% mienš, čym pazaletaś.
Akramia taho, hienprakuror paviedamiŭ, što Kamitetam dziaržbiaśpieki ŭsčataja kryminalnaja sprava pa fakcie hibieli ŭ Samali biełaruskich samalotaŭ. Adnak istotnych zruchaŭ u joj pakul niama.
U cełym ža, pa słovach Piatra Mikłaševiča, hieneralnaja prakuratura ŭ svajoj dziejnaści kirujecca lozunham Łukašenki «U nas niama niedatykalnych».