U aficyjnym vinšavańni z nahody 3 lipienia siarod inšych standartnych pasažaŭ źviartaje na siabie ŭvahu voś hety: "Biełaruski narod adziny i źjadnany".
Heta nia prosta kliše. Heta adzin z narožnych kamianioŭ idealohii ciapierašniaj ułady. Chto suprać jaje — toj užo nia jość pradstaŭnikom narodu. Jašče bolej. Pakolki ŭłada dzień i noč dbaje pra narodnaje ščaście, to apazycyjaner — heta vorah narodu.
Voś tak nibyta kansalidacyjny lozunh vyjaŭlaje svoj sapraŭdny źmiest, prasiaknuty kanfrantacyjnaściu, nieprymirymaściu da inšadumstva.
A hramadztva nasamreč raskołataje, pryčym rysy padziełu usio bolej vyraznyja. Kali abmaloŭvać vielmi schiematyčna, to praporcyja 50:20:30. Pałova schilnaja padtrymlivać uładu (chacia nie ŭsie jany ćviordyja łukašysty, bahata banalnych kańjunkturnikaŭ), adsotkaŭ 20 — "bałota", kala traciny suajčyńnikaŭ pavodle roznych sacyjalahičnych zamieraŭ paśladoŭna vykazvajucca suprać ciapierašniaj kiroŭnaj palityki.
Pryčym charaktarystyki supraćlehłych hrupaŭ vielmi vyraznyja. Čym lepiej adukavany čałaviek, čym dalej ad kazionnaha chlebu, čym aktyŭniej spažyvaje alternatyŭnuju infarmacyju — tym bolej imavierna, što jon vyznaje kaštoŭnaści rynkavaj ekanomiki, demakratyi, pravoŭ čałavieka, biełaruskaści, eŭrapiejskaha vybaru.
Viadoma, lubaja schiema ŭmoŭnaja. Siarod tych, chto musić słužyć uładzie, niamała ludziej, jakija lubiać hety paradak nia bolej, čym sabaka pałku. Ź inšaha boku, u lahiery supraciŭnikaŭ režymu staje prajaŭ vuzkałobaha mentalitetu. I ŭvohule, naiŭna dumać, nibyta demakratyčny ład zdymaje ŭsie supiarečnaści i ŭsich robić razumnymi dy talerantnymi.
Adnak važna mieć narmalovyja aryjentyry. 13 hadoŭ palityčnaj anamalii, hetaha pošuku "samabytnaha" šlachu — ad vyviadzieńnia ŭ intehracyjnaj prabircy dźviuchhałovaha monstra "sajuznaj dziaržavy" da ekzatyčnych aljansaŭ z vorahami "ackaha satany" — pryviali da raźbitych nočvaŭ. Maskva biare za horła; Zachad, nie pavioŭšysia na imitacyjnyja žesty, padciskaje sankcyjami; "vialikaja duha" zamiežnaj palityki — usie hetyja spadzievy na ščodrych šejchaŭ, "Samandy", fantany čornaha zołata ŭ dalinie Arynoka — zastajecca aptyčnaj iluzijaj, pustelnym miražom aficyjnaha Miensku.
Karaciej, hienijalny kurs akazaŭsia kursam padvodnaje łodki ŭ piaskach Karakumaŭ.
"Vielmi pakazalna, što paśla 13 hadoŭ kiravańnia Łukašenki davodzicca praktyčna z nula šukać novyja apiryščy ŭ śviecie, novych chaŭruśnikaŭ, novuju mižnarodnuju identyčnaść. Stolki času zmarnavana!", — zaznačaje palitolah Valer Karbalevič.
Dadamo: navat Dzień niezaležnaści u nas pakul što "płavaje". U roznych hrupovak — roznyja sakralnyja daty. Pryčym adepty z roznych lahieraŭ, nasupierak kansalidacyjnym zaklikam abjadnanych demakrataŭ, naŭrad ci hatovyja da parazumieńnia. Voś vam i "adziny dy źjadnany" narod!
