Bolšaść novych nazvaŭ ušanoŭvajuć dziejačoŭ biełaruskaj kultury. Žestam prymireńnia z Polščaj vyhladaje źjaŭleńnie ŭ stalicy Biełarusi vulicy imia Ježy Hiedrojca.
29 červienia deputaty Mienharsavietu na 4‑j sesii pryniali rašeńnie prysvoić nazvy dziesiaci vulicam Miensku.
Žyłomu mikrarajonu Družba‑1,2,3, što budujecca na paŭdniovym zachadzie stalicy, budzie dadziena najmieńnie Brylevičy‑1,2,3. Heta pa naźvie falvarku Brylevičy, viadomaha pa dakumentach XVI st. Novamu mikrarajonu kala Masiukoŭščyny dajecca nazva Dambroŭka‑3,4,5.
Vulicam u hetych rajonach dajuć nazvy vidnych biełaruskich dziejačoŭ abo znanych uradžencaŭ Biełarusi. U Brylevičach vulicy buduć nasić nazvy Jana Čačota, Karalinskaja, Napaleona Ordy, Ježy Hiedrojca.
Jan Čačot byŭ adnym z udzielnikaŭ antyrasiejskaha studenckaha ruchu XIX st., a paśla prasłaviŭsia jak piśmieńnik. Napaleon Orda — mastak, kampazytar, navukoviec z XIX st., jaki, niby tytany epochi Adradžeńnia, pajadnoŭvaŭ u sabie samyja roznyja talenty. Mahčyma, jon adnačasova byŭ adnym z kaardynataraŭ nacyjanalna‑vyzvolnaha paŭstańnia.
U Dambroŭcy pralahuć vulicy Ŭładzisłava Hałubka, Jazepa Žynoviča, Usievałada Ihnatoŭskaha, Alesia Haruna i imia suženstva Aładavych.
Teatrał Hałubok i pieršy kiraŭnik Akademii navuk Biełarusi Ihnatoŭski zahinuli ŭ časy stalinizmu. Imia paeta i revalucyjanera Haruna, jaki paśla viartańnia z carskaj vysyłki aktyŭna ŭdzielničaŭ u stvareńni vajskovych farmavańniaŭ Biełaruskaj Narodnaj Respubliki, było ŭ savieckija časy pad zabaronaj, až da 1980‑ch hadoŭ. Žynovič (sapraŭdnaje proźvišča Žydovič) zasłužyŭsia zboram biełaruskaj piesiennaj spadčyny.
Vuličku Svabody na Ŭschodzie pierajmienujuć u vulicu Źmitra Hvišyjani, pa imieni kursanta‑hieroja, jaki zahinuŭ, hasiačy pažar u ciahniku.
Žestam prymireńnia z Polščaj vyhladaje źjaŭleńnie ŭ stalicy Biełarusi vulicy imia Ježy Hiedrojca. Narodžany ŭ Miensku, Hiedrojc byŭ vialikim polskim intelektuałam XX stahodździa, redaktaram časopisu «Kultura». Jon adnym ź pieršych u polskim niezaležnym hramadztvie zaklikaŭ admovicca ad pretenzij na Horadniu i padtrymać biełaruski nacyjanalny ruch.
