Z 1 lipienia staršynstva ŭ Eŭrasajuzie na paŭhodu pierajšło da Partuhalii. U Biełarusi pasolstva Partuhalii niama, tamu ŭ našaj krainie abaviazki staršyni ES ad imia Partuhalii budzie vykonvać Słavaččyna.
Krainy ES, vialikija j małyja, pa radoŭcy vykonvajuć funkcyi hałavy ES. Z 1 studzienia da 1 lipienia 2007 hodu ŭ ES staršyniavała Hiermanija, a pierad joju — Finlandyja. U hety peryjad adbyłasia intensifikacyja biełaruskaj palityki ES. Eŭrasajuz źviarnuŭ da Biełarusi prapanovu narmalizavać adnosiny ŭzamien za ekanamičnuju dapamohu ŭ ramkach «Eŭrapiejskaj palityki dobraha susiedztva».
Hiermanija taksama nia raz zaklikała vyzvalić usich politviaźniaŭ.
Kanclerka Anhieła Merkiel, vystupajučy 25 sakavika na śviatočnym pasiedžańni z nahody 50‑hodździa ES, admysłova zhadała pra Biełaruś: «Eŭropa z vami!» — skazała jana, źviartajučysia da biełarusaŭ.
