«Навошта» — новая кніга народнага паэта Беларусі Рыгора Барадуліна, аздобленая здымкамі фатамастака Джона Кунстадтэра, пабачыла свет у Мінску.
Рыгор Барадулін. Навошта: вершаказы. уклад. Алесь Камоцкі. Фотамастак Джон Кунстадтэр. — Мінск: Медысонт, 2009. — 162 с., 1000 ас.
Беларускія вершаказы, запачаткаваныя яшчэ Алесем Разанавым, — згусце паэтычнай мудрасці, зашыфраванае ў кароткія, амаль тэлеграфічныя словаспалучэнні, якія вядуць свой радавод ад пазачасовых трапнасцяў старазапаветных прарокаў, ад зачараванага трапяткасцю прыроды японскага хоку і ад сцюдзёнай вытанчанасці сярэднявечных афарызмаў.
Буслянкі, крыжы, бабулькі-сялянкі і сцэны з вясковага жыцця, знятыя амерыканскім фатографам Джонам Кунстадтэрам, — адно праваднікі ў свет сталай барадулінскай паэзіі, у высокачастотны мысленчы рэгістр, дзе замілаванне прыродай і светам рэчаў нябачна узносіцца ў замілаванне людствам.
Яшчэ:
Рыгор Барадулін
Вершасказы
***
Наступнае наступае на мазалі мінуламу.
***
Дарога расце ўсё жыццё.
***
Неахвотна старэе святло.
***
Хмары — неслухі неба.
***
Аўтары праекту выказваюць шчырую падзяку МГА «Згуртаванне беларусаў свету «Бацькаўшчына»» і кіраўніку Дабрачыннага фонду «Этнічны голас Амерыкі» (ЗША) Ірэне Калядзе-Смірновай за дапамогу ў яго ажыццяўленні.
***
Джон Кунстадтэр працаваў намеснікам амбасадара ЗША у Беларусі ў 2000-2001 гг. Вялікі аматар фота, ён зрабіў цэлую калекцыю беларускіх фотаздымкаў, пабачыць якія можна на сайце www.radzimaphoto.com. Там жа можна даведацца пра аўтара падрабязней.
